A Lei orgánica 6/1999, do 6 de abril, de transferencia de competencias á Comunidade Autónoma de Galicia, establece que lle corresponde á Comunidade Autónoma galega a competencia de desenvolvemento lexislativo e execución en materia de ordenación do crédito, banca e seguros. En aplicación da citada lei orgánica, polo Real decreto 1748/1999, do 19 de novembro, transferíronse á comunidade autónoma as funcións e servizos da Administración do Estado en materia de mediadores de seguros. No exercicio das referidas competencias publicouse o Decreto 118/2001, do 10 de maio, polo que se regulan as competencias da comunidade autónoma en materia de mediación en seguros privados e, posteriormente, a Orde do 17 de xuño de 2005 sobre os libros-rexistro e o deber de información estatístico-contable dos corredores de seguros e as sociedades de corredoría de seguros.
A Lei 26/2006, do 17 de xullo, de mediación de seguros e reaseguros privados, derrogou a anterior Lei 9/1992, do 30 de abril, de mediación en seguros privados, en desenvolvemento da cal a Administración do Estado publicou o Real decreto 301/2004, do 20 de febreiro, polo que se regulan os libros-rexistro e o deber de información estatístico-contable dos corredores de seguros e as sociedades de corredoría de seguros, recollendo na súa disposición derradeira primeira que teñen a consideración de bases da ordenación dos seguros os artigos 1, 2, o punto 2º do artigo 3 e a disposición transitoria única.
A entrada en vigor da Lei 26/2006 supuxo, entre outras, a aparición de novas figuras da mediación de seguros, de novos requisitos de inscrición destes mediadores no rexistro administrativo e dar cobertura legal, a través do correspondente desenvolvemento regulamentario, á obrigatoriedade de presentación por medios telemáticos da documentación que estes profesionais están obrigados a subministrar ao seu órgano de control.
Co obxecto de recoller os cambios introducidos pola Lei 26/2006, publicouse o Decreto 298/2008, do 18 de decembro, polo que se regulan as competencias da Comunidade Autónoma de Galicia en materia de mediación de seguros e reaseguros privados, que derrogou o anterior Decreto 118/2001.
Na disposición derradeira primeira do mencionado Decreto 298/2008, facúltase a/o conselleira/o competente en matería de economía para regular a información que deban remitir á dirección xeral con competencias en materia de supervisión de seguros as/os mediadoras/es de seguros e reaseguros inscritos no Rexistro administrativo especial de mediadores de seguros, corredores de reaseguros e dos seus altos cargos na Comunidade Autónoma de Galicia.
Neste sentido, esta norma substitúe a Orde do 17 de xuño de 2005, modificando os modelos contidos no seu anexo para adaptalos aos cambios introducidos pola Lei 26/2006, así como ampliando esta obriga ás/aos corredoras/es de reaseguros e ás/aos axentes de seguros vinculados e operadores de banca-seguros vinculados de acordo cos artigos 21, 25, 48 e 49 da citada lei. Por outra parte, posibilita a remisión desta información por medios telemáticos do mesmo xeito que fai o Ministerio de Economía e Facenda a través da Orde EHA/1805/2007, do 28 de maio.
Por todo o anterior, de acordo coa habilitación de desenvolvemento establecida na disposición derradeira primeira do mencionado Decreto 298/2008,
DISPOÑO:
Artigo 1º.-Libros-rexistro.
As/os corredoras/es de seguros e reaseguros inscritos no Rexistro administrativo especial de mediadores de seguros, corredores de reaseguros e dos seus altos cargos na Comunidade Autónoma de Galicia, creado polo Decreto 298/2008, do 18 de decembro, polo que se regulan as competencias da Comunidade Autónoma de Galicia en materia de mediación de seguros e reaseguros privados, deberán levar os libros-rexistro, conforme o establecido no Real decreto 301/2004, do 20 de febreiro, polo que se regulan os libros-rexistro e o deber de información estatístico-contable dos corredores de seguros e as sociedades de corredoría de seguros.
Artigo 2º.-Obrigas contables e de información das/os corredoras/es de seguros e reaseguros.
As/os corredoras/es de seguros e reaseguros inscritos no Rexistro administrativo especial de mediadores de seguros, corredores de reaseguros e dos seus altos cargos na Comunidade Autónoma de Galicia estarán, así mesmo, sometidos ás obrigas contables e de información establecidas no citado Real decreto 301/2004, e deberán remitir esta información á dirección xeral con competencias en materia de supervisión de seguros mediante os modelos contidos no anexo I desta orde.
Artigo 3º.-Obrigas de información das/os axentes de seguros vinculados e dos operadores de banca-seguros vinculados.
De conformidade co establecido no artigo 48 da Lei 26/2006, do 17 de xullo, de mediación de seguros e reaseguros privados, e en consonancia cos artigos 21 e 25 da citada lei, as/os axentes de seguros vinculados e os operadores de banca-seguros vinculados, inscritos no Rexistro administrativo especial de mediadores de seguros, corredores de reaseguros e dos seus altos cargos na Comunidade Autónoma de Galicia, deberán remitir á dirección xeral con competencias en materia de supervisión de seguros a información contida no anexo II desta orde.
Artigo 4º.-Órgano competente.
As referencias que no Real decreto 301/2004 se fan ao Ministerio de Economía e Facenda e á Dirección Xeral de Seguros e Fondos de Pensións entenderanse feitas á consellería competente en materia de economía e á dirección xeral con competencias en materia de supervisión de seguros, para as/os mediadoras/es de seguros e reaseguros inscritos no rexistro autonómico.
Artigo 5º.-Presentación da documentación.
A remisión á dirección xeral con competencias en materia de supervisión de seguros da información contida nos anexos desta orde, deberá facerse por medios telemáticos e como data límite o 31 de xullo do ano seguinte a aquel ao que se refire a información.
Os requisitos técnicos para o acceso e utilización da remisión telemática, xunto coas instrucións para cubrir os diferentes modelos, serán publicados pola citada dirección xeral a través da páxina web da consellería competente en materia de economía.
Disposicións transitorias
Primeira.-Remisión da documentación estatístico-contable polas/os corredoras/es de seguros e reaseguros.
Con efectos unicamente para a documentación estatístico-contable referida ao exercicio 2008, a remisión da información contida no anexo I desta orde deberá levarse a cabo mediante unha das seguintes opcións:
a) Por medios telemáticos ata o 31 de xullo de 2009.
b) Mediante papel impreso ata o 31 de maio de 2009.
Segunda.-Remisión da información polas/os axentes de seguros vinculados e os operadores de banca-seguros vinculados.
Con efectos unicamente para a información referida ao exercicio 2008, a remisión desta información contida no anexo II desta orde poderá levarse a cabo mediante papel impreso.
Disposición derrogatoria
Queda derrogada a Orde do 17 de xuño de 2005 sobre os libros-rexistro e o deber de información estatístico-contable dos corredores de seguros e as sociedades de corredoría de seguros.
Disposicións derradeiras
Primeira.-Habilitación para o desenvolvemento da orde.
Facúltase o director xeral con competencias en materia de supervisión de seguros para ditar cantas disposicións sexan necesarias para o desenvolvemento e execución desta orde e, en particular, para realizar as modificacións que resulten necesarias nos modelos que compoñen a documentación anual que figuran nos anexos desta orde.
Segunda.-Entrada en vigor.
Esta orde entrará en vigor o día seguinte ao da súa publicación no Diario Oficial de Galicia.
Santiago de Compostela, 10 de febreiro de 2009.
José Ramón Fernández Antonio
Conselleiro de Economía e Facenda
ANEXO I
Documentación estatístico-contable anual das/os corredoras/es de seguros e reaseguros
Modelos que compoñen a documentación estatístico-contable anual:
Modelo 0/PF: declaración das/os corredoras/es de seguros e reaseguros, persoas físicas.
Modelo 0/PX: declaración da/o representante legal dos corredores de seguros e reaseguros, persoas xurídicas.
Modelo 1: estrutura da organización.
Modelo 2: carteira de seguros intermediada.
Modelo 3: distribución en ramos de non vida.
Modelo 4: distribución en ramos de vida.
Modelo 5: datos contables.
ANEXO II
Documentación anual das/os axentes de seguros vinculados e os operadores de banca-seguros vinculados
Modelos que compoñen a documentación anual:
Modelo 0/AF: declaración das/os axentes de seguros vinculados, persoas físicas.
Modelo 0/AX: declaración da/o representante legal dos axentes de seguros vinculados, persoas xurídicas e operadores de banca-seguros vinculados.
Modelo 1/AV: estrutura da organización.
Ver referencia pdf "04000D001P007.PDF"