O 13 de febreiro de 2006 publicouse o Decreto 18/2006, do 26 de xaneiro, polo que se establecen as axudas públicas en materia de vivenda a cargo da Comunidade Autónoma de Galicia e se regula a xestión das previstas no Real decreto 801/2005, do 1 de xullo, para o período 2005-2008.

No seu artigo 2 establécese que este decreto será de aplicación na Comunidade Autónoma de Galicia durante o período que comprende desde a súa entrada en vigor ata o día 31 de decembro de 2008.

O día 24 de decembro de 2008 publicouse o Real decreto 2066/2008, do 12 de decembro, polo que se regula o Plan estatal de vivenda e rehabilitación 2009-2012, con entrada en vigor ao día seguinte, que derroga o Real decreto 801/2005, sen prexuízo do previsto nas disposicións transitorias e dos efectos das situacións creadas ao abeiro delas.

Na súa disposición transitoria primeira, de medidas para facer fronte á conxuntura económica do sector, establécese un período transitorio no que se prevé a concesión de préstamos e axudas financeiras para actuacións cualificadas, visadas ou con dereito a subvencións recoñecido polas comunidades autónomas de conformidade coa normativa do Plan estatal de vivenda 2005-2008.

Por esta razón, co fin de poder executar o disposto nas disposicións transitorias e atender situacións creadas ao abeiro do Real decreto 801/2005, cómpre prorrogar o ámbito de vixencia do Decreto 18/2006, do 26 de febreiro, ata a data de entrada en vigor da normativa autonómica que regule a xestión das axudas previstas no Real decreto 2066/2008, do 12 de decembro, polo que se regula o Plan estatal de vivenda e rehabilitación 2009-2012.

Na sua virtude, por proposta da conselleira de Vivenda e Solo e logo de deliberación do Consello da Xunta de Galicia na súa xuntanza do día cinco de febreiro de dous mil nove,

DISPOÑO:

Artigo único.-Prorrógase o período de vixencia do Decreto 18/2006, do 26 de xaneiro, polo que se establecen as axudas públicas en materia de vivenda a cargo da Comunidade Autónoma de Galicia e se regula a xestión das previstas no Real decreto 801/2005, do 1 de xullo, para o período 2005-2008 no seguinte sentido:

-Desde o día 1 de xaneiro de 2009 e ata a entrada en vigor da normativa autonómica que regule a xestión das axudas previstas no Real decreto 2066/2008, do 12 de decembro, polo que se regula o Plan estatal de vivenda e rehabilitación 2009-2012, polo que respecta ás axudas financiadas con cargo á Comunidade Autónoma de Galicia.

-Desde o día 25 de decembro de 2008 e cos límites temporais que resultan das disposicións transitorias do Real decreto 2066/2008, polo que respecta ás actuacións que nesas disposicións se permiten e, así mesmo, para os efectos das situacións creadas ao abeiro do Real decreto 801/2005.

Disposición derradeira

Este decreto entrará en vigor o mesmo día da súa publicación no Diario Oficial de Galicia.

Santiago de Compostela, cinco de febreiro de dous mil nove.

Emilio Pérez Touriño

Presidente

María Teresa Táboas Veleiro

Conselleira de Vivenda e Solo