Mediante Resolución do 23 de decembro de 2008, do presidente do Instituto Galego da Calidade Alimentaria (Ingacal), publicada no Diario Oficial de Galicia do 24 de decembro de 2008, abriuse o prazo de presentación de solicitudes para a convocatoria de once prazas de persoal laboral fixo, pola quenda de acceso libre, no devandito instituto.

A citada resolución recolle na base 3.2 os requisitos mínimos de cada categoría, indicando, para a categoría de tecnólogo/a II na especialidade de viticultura, o requisito de posuír as titulacións de enxeñaría agronómica ou licenciatura en enoloxía.

Dentro do prazo legalmente establecido para iso, presentáronse dous recursos de reposición contra a citada resolución coa pretensión de que sexa admitida a titulación de licenciatura en ciencias biolóxicas para optar ao posto anteriormente indicado.

O Consello de Dirección do Ingacal, en sesión do 11 de febreiro de 2009, acordou estimar os citados recursos e modificar, en consecuencia, as bases da convocatoria, polo que se fai necesaria a publicación do citado acordo.

Por todo o exposto e no uso das facultades que me foron conferidas no artigo 8 do Decreto 259/2006, do 28 de decembro, polo que se aproba o Regulamento do Instituto Galego da Calidade Alimentaria,

DISPOÑO:

Artigo 1º.-Obxecto.

O obxecto desta resolución é a modificación da convocatoria de once prazas de persoal laboral fixo, pola quenda de acceso libre, para o Instituto Galego da Calidade Alimentaria (Ingacal).

Artigo 2º

Modificación da Resolución do 23 de decembro de 2008 pola que se anuncia a convocatoria de once prazas de persoal laboral fixo, pola quenda de acceso libre, para o Instituto Galego da Calidade Alimentaria (Ingacal).

A base 3.2 queda redactada como segue:

3.2. Requisitos mínimos para as diferentes prazas.

Os requisitos mínimos particulares que deben reunir os/as aspirantes para seren admitidos/as na convocatoria de cada categoría e praza convocada son os seguintes:

Ver referencia pdf "03500D026P102.PDF"

Artigo 3º.-Apertura dun novo prazo para a presentación de solicitudes.

Ábrese un novo prazo para a presentación de solicitudes de licenciados en ciencias biolóxicas para a categoría de tecnólogo/a II na especialidade de viticultura. O prazo será de vinte días naturais contados desde o día seguinte ao da publicación desta resolución no Diario Oficial de Galicia.

Santiago de Compostela, 12 de febreiro de 2009.

Alfredo Suárez Canal

Presidente do Instituto Galego da Calidade Alimentaria