Dentro do plan de actividades da Escola Galega de Administración Pública para o ano 2009 e de acordo coas funcións atribuídas pola Lei 4/1987, do 27 de maio, de creación da escola, e pola Lei 10/1989, do 10 de xullo, de modificación da anterior, convócanse, en colaboración co Instituto Europeo de Administración Pública-Centro Europeo de Rexións (IEAP-CER), as xornadas Avaliación de políticas públicas: procedementos, métodos, prácticas e normas, conforme as seguintes bases:
1. Obxectivos:
O obxectivo principal destas xornadas é presentar unha ampla introdución ao tema das políticas públicas desde unha perspectiva práctica.
As sesións de dous días dividiranse de acordo co seguinte esquema. O primeiro día, as sesións centraranse nos procedementos, instrumentos e métodos, e en cando e como usar a avaliación de políticas dentro do marco dunha xestión pública moderna e eficaz. O obxectivo deste día é pois que os participantes se familiaricen cos conceptos e marcos clave necesarios para comprender, xestionar e practicar a avaliación.
O segundo día dedicarase a presentar unha serie de experiencias a nivel nacional e local, presentándose casos específicos de avaliación das políticas públicas xunto con casos de como organizar internamente a avaliación a nivel gobernamental. O obxectivo deste día é ofrecerlles aos participantes experiencias que poidan servirlles como referencia para desenvolver as súas propias opcións e modelos específicos.
2. Contidos:
Serán tratados, entre outros, os seguintes temas:
-A avaliación no ciclo de formulación de políticas.
-A institucionalización dun sistema de avaliación e de integración da avaliación nos procedementos orzamentarios. O exemplo da Comisión Europea.
-Desenvolvemento e estratexias da Axencia Estatal de Avaliación e Calidade en España.
-A xestión das avaliacións como un procedemento de negociación.
-O Plan Mellora: a política de calidade de xestión na Xunta de Galicia.
-Retos teóricos e prácticos na avaliación de políticas públicas.
-Métodos e ferramentas de avaliación: técnicas cualitativas.
-Avaliación dun programa de desenvolvemento rural. Unha experiencia práctica no País Vasco.
-O manual da xestión de avaliacións: un caso práctico.
3. Destinatarios:
Persoal ao servizo das administracións públicas de Galicia e interesados en xeral.
4. Desenvolvemento:
Lugar: Escola Galega de Administración Pública (EGAP), rúa de Madrid, 2-4, Santiago de Compostela.
Datas: 26 e 27 de marzo de 2009.
Duración: 10 horas lectivas.
Horario:
-Día 26 de marzo, das 9.30 ás 14.00 horas e das 16.00 ás 18.30 horas.
-Día 27 de marzo, das 9.30 ás 14.00 horas.
5. Número de prazas:
Limitado pola capacidade do local.
6. Solicitudes.
- Tramitación de solicitudes: as solicitudes irán dirixidas ao director da Escola Galega de Administración Pública (Polígono das Fontiñas, rúa de Madrid, 2-4, CP 15707, Santiago de Compostela), segundo o modelo que figura como anexo a esta convocatoria, e serán presentadas no rexistro xeral da EGAP, ou ben de calquera das formas previstas no artigo 38.4 da Lei 30/1992, do 26 de novembro, de réxime xurídico das administracións públicas e do procedemento administrativo común. Serán admitidas inscricións por medio de fax enviado ao número 981 54 63 30 ou por correo electrónico dirixido ao enderezo novas.egap@xunta.es.
-Inscricións fóra de prazo: só serán admitidas, de quedar prazas libres, coa condición de que cumpran os requisitos xerais antes indicados.
As persoas solicitantes poderán obter a confirmación da súa admisión se chaman por teléfono, das 8.30 ás 14.30 horas, aos seguintes números: 981 54 62 41-881 99 70 14.
7. Prazo.
O prazo de presentación de solicitudes finalizará o martes 24 de marzo de 2009.
8. Modificacións.
A EGAP reserva para si a facultade de interpretar e de resolver as incidencias que poidan xurdir no desenvolvemento das xornadas, así como a facultade de cancelalas se o escaso número de solicitudes non xustificase a súa realización.
9. Certificado de asistencia.
Será entregado un certificado de asistencia, ao final das xornadas, a aquelas persoas inscritas que participasen asiduamente, e sempre que a súa asistencia sexa igual ou superior ao 85% das horas lectivas programadas. Neste documento aparecerán de forma expresa a natureza da actividade e a data de realización.
Santiago de Compostela, 13 de febreiro de 2009.
Carlos Suárez-Mira Rodríguez
Director da Escola Galega de Administración
Pública
Ver referencia pdf "03500D021P097.PDF"