A Comunidade Autónoma de Galicia é titular dos inmobles procedentes das extintas cámaras agrarias provinciais da Coruña, Lugo, Ourense e Pontevedra, de acordo co disposto no punto primeiro da disposición adicional cuarta da Lei 1/2006, do 5 de xuño, do Consello Agrario Galego.

Unha vez obtida a súa inscrición no correspondente rexistro da propiedade a nome da Comunidade Autónoma de Galicia do local de oficinas de Ourense, procede declarar a súa alleabilidade de conformidade co disposto no artigo 24 da Lei 3/1985, do 12 de abril, do patrimonio da Comunidade Autónoma de Galicia, e no artigo 60 do Decreto 50/1989, do 9 de marzo, polo que se aproba o seu regulamento, co obxecto de posibilitar o seu tráfico patrimonial.

Na súa virtude, por proposta da Secretaría Xeral e do Patrimonio,

DISPOÑO:

Artigo único.-Declárase a alleabilidade dos inmobles que se describen a continuación:

Local de oficinas, sito na planta primeira do edificio sinalado co nº 6 da avenida de José Antonio, hoxe rúa do Paseo. Ten unha superficie construída de 328,36 m2 e útil de 246,25 m2 e linda: norte propiedade de Carmen Calvo Morazo e con bloque xeral da escaleira; sur, en parte, co mencionado bloque de escaleira e con servidume de luces que constitúe o propio lindeiro sur do inmoble xeral; leste coa fachada a parte posterior do edificio; e oeste co bloque xeral da escaleira, co bloque de servizos sanitarios e co predio sétimo, letra C. Inscrito no Rexistro da Propiedade nº 1 de Ourense no tomo 2213, libro 1468, folio 151, predio 26.679. R.c. 3784032NG9838S0007FA.

Unha setenta e tres avas partes indivisas (1/73), que se concretan na utilización en exclusiva da praza de garaxe nº 5, situada na planta primeira do edificio sito detrás da casa número 35 da rúa de Santo Domingo con acceso desde a dita rúa e desde a avenida ou rúa José Antonio, hoxe rúa do Paseo. R.c. 3784031NG9838S0005EO.

Valoración económica: 700.000 €.

Santiago de Compostela, 26 de xaneiro de 2009.

P.D. (Orde 18-9-2006)

Mª Inmaculada Viña Carregal

Secretaria xeral e do Patrimonio da Consellería

de Economía e Facenda