Dentro das actividades programadas para o ano 2009, e conforme as funcións atribuídas pola Lei 1/2007, do 15 de xaneiro, de creación da Academia Galega de Seguridade Pública, anúnciase a realización dunha xornada sobre a utilización do can en determinadas tarefas de seguranza pública, que deberán desenvolverse conforme as seguintes bases:

Obxectivos.

-Saber cales son as necesidades de usar cans especializados para a solución de determinadas problemáticas relacionadas coa seguranza pública.

-Coñecer os aspectos máis salientables das intervencións: rescate de persoas, explosivos, drogas, etc.

-Darse conta da inestimable axuda ao traballo dos especialistas que pode proporcionar o uso do can en tarefas concretas.

Destinatarios/as.

Persoal das forzas e corpos de seguranza, protección civil, bombeiros e outros colectivos interesados pertencentes á Comunidade Autónoma de Galicia.

Inscrición.

A inscrición dos participantes será totalmente gratuíta.

Prazas.

O número de prazas que se ofertan nesta xornada é de 80.

Solicitudes.

1. As persoas que desexen participar nesta actividade formalizarán a súa solicitude de participación a través da páxina web da AGASP http://agasp.xunta.es, na epígrafe Actividades formativas, cursos con inscrición aberta, non sendo admisibles outros modelos de solicitude, sen necesidade de remitir a documentalmente unha vez que teñan completado o correspondente formulario. A aplicación comunicaralle ao/á usuario/a a efectividade de ter cursada a solicitude.

2. O prazo para a presentación de solicitudes de participación rematará o día 4 de marzo, ás 14.00 horas.

Datas e horario.

A xornada desenvolverase o día 10 de marzo en horario das 9.30 ás 14.00 e das 15.30 ás 19.00 horas.

Contido.

1. Referencia histórica e características

2. Elementos básicos para o adestramento

2.1. O guía.

2.2. O can.

2.3. Os instrumentos.

3. O adestramento.

3.1. Comunicación guía-can.

3.2. Premios e castigos.

3.3. Adestramento específico en explosivos e drogas.

4. Operatividade.

4.1. Requisas de explosivos.

4.2. Buscas de substancias estupefacientes.

4.3. Rescate de persoas.

4.4. Colaboración con outras unidades.

Relación de admitidos.

A relación de admitidos farase pública o día 6 de marzo a partir das 14.00 horas, no taboleiro de anuncios da Academia Galega de Seguridade Pública e na páxina web http://agasp.xunta.es, ou ben poden coñecer e confirmar a súa asistencia chamando aos teléfonos 886 20 61 17/118.

Lugar.

A xornada desenvolverase na sala de conferencias da Academia Galega de Seguridade Pública, sita na avda. da Cultura, s/n no Concello da Estrada.

Certificado de asistencia.

Ao final da xornada entregaráselle un certificado de asistencia a aquelas persoas que demostren a súa participación continuada nela.

Baremación da actividade.

Para os efectos do previsto nos anexos II e III da Orde do 28 de xaneiro de 2009 da Consellería de Presidencia, Administracións Públicas e Xustiza, publicada no DOG do 2 de febreiro, esta actividade terá unha baremación de 0,120 puntos.

Modificacións.

A Academia Galega de Seguridade Pública poderá modificar o desenvolvemento da xornada para adaptala ás necesidades da Administración e ás continxencias que poidan xurdir.

A Estrada, 11 de febreiro de 2009.

P.S. (Disp. 1ª Orde 31-1-2009;

DOG nº 23, do 1 de febreiro)

María Isabel Durántez Gil

Directora xeral de Interior