Dentro do programa de actividades que a Academia Galega de Seguridade Pública ten previsto realizar no ano 2009, e conforme coas funcións atribuídas pola Lei 1/2007, do 15 de xaneiro, de creación da Academia Galega de Seguridade Pública, anúnciase a convocatoria dun curso superior de protección civil, que deberá desenvolverse conforme as seguintes bases:
Obxectivos.
A formación, capacitación e perfeccionamento profesional do persoal técnico en temas de protección civil, tendo en conta as súas funcións de responsabilidade na planificación, coordinación, dirección e toma de decisións en todo tipo de emerxencias.
Destinatarios.
-Persoal técnico de protección civil da Administración autónoma de Galicia.
-Persoal técnico, funcionarios con responsabilidade en protección civil da Administración local (bombeiros, policía local, funcionarios municipais con responsabilidade en protección civil) e da Administración xeral do Estado en Galicia.
-Xefe, subxefe ou xefe de unidade das agrupacións de voluntarios de protección civil da Comunidade Autónoma de Galicia que teñan realizado o curso básico e dous cursos de segundo nivel.
Desenvolvemento.
1. Prazas: vinte e sete (27).
2. Duración: 130 horas lectivas.
3. Datas: do 13 de abril ao 2 de xuño de 2009.
O curso desenvolverase os luns e martes todo o día.
O horario será o seguinte:
-Mañás: das 9.30 ás 14.00 horas.
-Tardes: das 16.00 ás 20.00 horas.
4. Lugar: o curso realizarase na sede da Academia Galega de Seguridade Pública no concello da Estrada.
Solicitudes e prazo de inscrición.
1. A inscrición dos/das participantes é gratuíta.
2. As persoas interesadas poderán cubrir a solicitude que se amosa na páxina web http://agasp.xunta.es, ou o modelo anexo á convocatoria da actividade.
3. As solicitudes deberán vir asinadas pola persoa responsable da correspondente unidade e co selo desta. Este será requisito indispensable para ser admitido no curso.
4. Presentación das solicitudes:
-Por correo á sede da Academia Galega de Seguridade Pública: avenida da Cultura, s/n 36680, A Estrada
-A través do fax nº 886 20 61 23 do Servizo de Formación-Sección de Protección Civil e Bombeiros da AGASP, ou
-Segundo o previsto no artigo 38.4º da Lei 30/1992, do 26 de novembro, de réxime xurídico das administracións públicas e do procedemento administrativo común.
5. O prazo para a presentación de solicitudes rematará o día 23 de marzo de 2009.
Contido.
O curso consta de once módulos con clases teórico-prácticas:
Módulo I: Riscos naturais
-Temporais, choivas, xeadas, fortes ventos.
-Predición meteorolóxica, interpretación de boletíns, de fenómenos meteorolóxicos e mapas.
- Movementos sísmicos.
- Encoros.
Módulo II: Riscos tecnolóxicos.
-Risco químico.
-Transportes de mercadorías perigosas.
-Risco radioactivo.
-Risco gas natural.
Módulo III: Prevención e protección contra os incendios urbanos e forestais.
Módulo IV: Tráfico e seguranza viaria.
Módulo V: Cartografía, orientación e localización. Interpretación de planos.
Módulo VI: Asistencia sanitaria e apoio psicolóxico en situacións de catástrofes e accidentes.
Módulo VII: Normativa legal.
-A protección civil como servizo público.
-Agrupacións de voluntarios de protección civil.
-Responsabilidade civil e penal.
Módulo VIII: Análise de risco.
Módulo IX: Prevención: Autoprotección e planificación.
Módulo X: Dirección e xestión das emerxencias.
Módulo XI: Información á poboación e aos medios de comunicación.
-Telecomunicación e sistemas de información.
Criterios de selección.
Para ser admitidos no curso, no caso de haber máis dunha solicitude da mesma entidade terase en conta a orde de preferencia establecida polo/a presidente/a da agrupación ou xefe/a do organismo a que estea adscrito.
Relación de admitidos.
A relación de admitidos/as farase pública o día 2 de abril de 2009 na páxina web http://agasp.xunta.es.
Asistencia.
É obrigatoria a asistencia e puntualidade en todas as actividades do curso. A falta de asistencia, mesmo cando sexa xustificada, en máis dun 10% das horas lectivas programadas determinará a cualificación de non apto no curso.
Certificado de aproveitamento.
Ao final do curso entregaráselles un certificado de aproveitamento a aquelas persoas que acrediten a súa asistencia continuada e superen as correspondentes probas de coñecementos e a realización dun traballo escrito, relativo aos módulos que o compoñen.
Modificacións.
Academia Galega de Seguridade Pública poderá modificar o desenvolvemento dos cursos para adaptalos ás necesidades da Administración e ás continxencias que poidan xurdir.
A Estrada, 10 de febreiro de 2009.
P.S. (Disp. 1ª Orde 31-1-2008;
DOG nº 23, do 1 de febreiro)
Mª Isabel Durántez Gil
Directora xeral de Interior
Ver referencia pdf "03400D014P044.PDF"