En cumprimento do disposto no artigo 18.2º da Lei 3/1985, do 12 de abril, do patrimonio da comunidade autónoma e 46.2º do seu regulamento, e á vista das competencias que teño atribuídas conforme o Decreto 79/2007, do 19 de abril, polo que se fixa a estrutura orgánica da Consellería de Economía e Facenda,

RESOLVO:

Facer pública a utilización do procedemento de contratación directa na adquisición de tres inmobles no parque empresarial de Curtis-Teixeiro de titularidade da entidade pública estatal Sepes, solicitado pola Consellería de Medio Ambiente e Desenvolvemento Sostible con destino ao establecemento dunha planta de tratamento de pneumáticos usados, posto que tal como comunicou esa consellería en escrito do 1 de decembro de 2008, a adquisición nesa localización esta motivada por: 1. Este parque esta situado nunha zona céntrica dentro do territorio da comunidade autónoma, garantindo que os custos de transporte para o tratamento destes residuos sexan similares con independencia do seu lugar de produción. 2. Dispón dunhas axeitadas liñas de comunicación que facilitan a loxística de transporte. 3. Está plenamente operativo, o que permitirá acometer a obra de xeito inmediato, dada a urxencia da súa execución.

Santiago de Compostela, 26 de decembro de 2008.

Mª Inmaculada Viña Carregal

Secretaria xeral e do Patrimonio da Consellería de Economía e Facenda