Examinado o expediente de deslindamento do monte Lagoa, número 300 do Catálogo de montes de utilidade pública da provincia de Pontevedra, pertencente á entidade local menor de Queimadelos, e tendo en conta os seguintes

Antecedentes de feito.

Primeiro.-O monte Lagoa, incluído no Catálogo de montes de utilidade pública de Pontevedra co número 300, pertence á entidade local menor de Queimadelos (Mondariz). De acordo co proxecto de xestión, ten unha superficie de 11,1 ha divididas en dúas parcelas (parcela un 9 ha e parcela dúas 2,1 ha).

O monte ten os seguintes lindeiros:

Norte: monte veciñal en man común de Mondariz.

Leste: propiedades particulares.

Sur: propiedades particulares.

Oeste: monte veciñal en man común de Mondariz.

Segundo.-O 26 de setembro de 2007 o director xeral resolveu autorizar a realización do deslindamento total do monte de utilidade pública Lagoa, número 300 do Catálogo de montes de utilidade pública de Pontevedra, pertencente á entidade local menor de Queimadelos, concello de Mondariz. Con data 1 de outubro do 2007 nomeouse a Enrique Martínez Chamorro enxeñeiro operador. O 7 de novembro de 2007 publicouse no Diario Oficial de Galicia número 215 o edicto polo que se anunciaba o comezo do deslindamento do monte de utilidade pública Lagoa. O día 12 de novembro notificouse a todos aqueles estremeiros coñecidos a publicación do edicto.

Con data do 16 de novembro de 2007 foi enviado ao concello de Mondariz o edicto para a súa publicación no seu taboleiro de anuncios.

Durante o prazo de presentación de documentación, que remataba o 22 de decembro do 2007, conforme o establecido no artigo 97 do Decreto 485/1962, do 22 de febreiro, polo que se aproba o regulamento de montes, non se presentou ningunha documentación. Con data de Rexistro de Entrada do 21 de xaneiro de 2008, fóra de prazo, presentáronse tres escritos de Pilar Táboas Villar, Rosa Táboas Barral e Isabel Mariño Táboas. O 31 de xaneiro de 2008 remitiuse ao Gabinete Xurídico Territorial da delegación da Consellería de Presidencia, Administracións Públicas e Xustiza en Pontevedra a documentación presentada polas tres persoas antes indicadas e o 12 de febreiro de 2008 recibiuse informe do letrado Manuel Rodríguez Campos, no cal se indica que non procede clasificar a documentación por terse presentado fóra de prazo.

O 13 de febreiro o enxeñeiro operador emitiu o seu informe de clasificación de predios, que foi aprobado polo xefe do Servizo de Montes e Industrias Forestais. O enxeñeiro operador no seu informe expón que non procede a clasificación de predios de conformidade co informe do letrado do Gabinete Xurídico Territorial, xa que segundo o disposto no artigo 97 do Regulamento de montes os documentos presentados fóra de prazo teñen que ser rexeitados sen que proceda a súa clasificación.

Terceiro.-O deslindamento no monte comezou o 25 de febreiro de 2008 e rematou o 13 de marzo. En maio de 2008 o enxeñeiro operador emitiu o seu informe. Mediante un edicto publicado no Diario Oficial de Galicia do 29 de maio de 2008 abriuse un período de vista do expediente de conformidade co disposto nos artigos 120 e 121 do Regulamento de montes. O 4 de xuño de 2008 notificouse á entidade propietaria, aos estremeiros coñecidos e ao concello de Mondariz o comezo do período de vista.

Durante o período de vista non se presentaron reclamacións.

Fundamentos de dereito.

Primeiro.-De acordo co disposto nos reais decretos 167/1981, do 9 de xaneiro, 1706/1982, do 24 de xullo, e 1535/1984, do 20 de xuño, sobre transferencias de funcións e servizos do Estado á Comunidade Autónoma de Galicia en materia de conservación da natureza, no Decreto 211/2005, do 3 de agosto, polo que se establece a estrutura orgánica da Xunta de Galicia, no Decreto 232/2005, do 11 de agosto, polo que se fixa a estrutura orgánica dos departamentos da Xunta de Galicia, e no Decreto 562/2005, do 1 de decembro, polo que se establece a estrutura orgánica da Consellería do Medio Rural e do Fondo Galego de Garantía Agraria, o conselleiro do Medio Rural é competente para ditar esta orde.

Segundo.-O Servizo de Montes e Industrias Forestais de Pontevedra é competente para levar adiante o devandito deslindamento, cumpridas todas as prescricións legais en canto á publicidade, notificación e demais requisitos exixidos nos artigos 82 ao 125 do Regulamento de montes aprobado polo Decreto 485/1962, do 22 de febreiro.

Terceiro.-A Lei 43/2003, do 21 de novembro, e o Regulamento de montes establecen unha dualidade xurisdicional (contencioso-administrativa e civil) no control xudicial do deslindamento administrativo. Mediante o recurso cabe que se fagan valer todos os vicios en que poidan incorrer os actos administrativos a teor da Lei 30/1992 (artigos 62 e seguintes). Por outra parte, o artigo 21.7º da Lei 43/2003 e os artigos 128 e 129 do regulamento reservan ao coñecemento dos tribunais ordinarios todas as pretensións «…se o que se discute é o dominio, a posesión ou calquera outro dereito real». Polo tanto, será ante a orde xurisdicional civil onde poidan presentarse cuestións relativas ao dominio ou á posesión, ou calquera outra de natureza civil a través de xuízo declarativo correspondente.

Tendo en conta os preceptos legais citados e demais de xeral aplicación e o informe-proposta do xefe do Servizo de Montes e Industrias Forestais de Pontevedra, esta consellaría, por proposta da Dirección Xeral de Montes e Industrias Forestais,

DISPÓN:

Primeiro.-Aprobar o deslindamento do monte Lagoa, número 300 do Catálogo de montes de utilidade pública da provincia de Pontevedra, pertencente á entidade local menor de Queimadelos, no concello de Mondariz, de acordo coas actas, rexistro topográfico e planos que figuran no expediente, excluíndo a parcela de monte denominada Cavada do Tato ou Maceira, limitada polos piquetes números 47, 48, 49 e 50, predio cuxo posuidor non puido, á falla de datos e información fiables, precisar uns lindeiros claros, nin demostrar a súa posesión. Polo tanto, o monte queda formado por dúas parcelas coa descrición seguinte:

1. Parcela Lagoa.

Provincia: Pontevedra.

Termo municipal: Mondariz.

Pertenza: entidade local menor de Queimadelos.

Límites:

Norte: monte veciñal en man común de Mondariz e propiedades particulares.

Leste: propiedades particulares.

Sur: propiedades particulares.

Oeste: monte veciñal en man común de Mondariz.

Descrición de lindeiros:

Comeza o lindeiro norte no piquete núm. 25 que se sinala no marco núm. 30 do monte de Mondariz, limitando con propiedades particulares chégase ás proximidades do cruzamento dos camiños da Lagoa (piquete núm. 26) para posteriormente chegar ao piquete núm. 27 e ao núm. 28 na marxe esquerda da estrada que nace do Carballo da Armada a Lugares. Desde este punto e tomando dirección noroeste-norte chégase ao piquete núm. 31, limitando sempre co monte particular, desde aquí tómase dirección nordeste-leste ata o piquete núm. 36, de novo na estrada Carballo da Armada a Lugares, onde comeza o lindeiro leste, desde este piquete e a través dunha pista forestal en dirección sur chégase ao piquete núm. 40, onde se retoma a dirección oeste ata atoparse coa estrada de Queimadelos-Lugares co piquete núm. 42, desde onde se segue un muro de pedra en dirección suroeste ata o piquete núm. 44, que se une co piquete núm. 45 situado outra vez na mesma estrada (Queimadelos-Lugares). Desde este punto séguese

primeiro a estrada ata o piquete núm. 46 e posteriormente o núm. 1 (aparcadoiro da área recreativa do Carballo de Armada). Desde aquí ata o piquete núm. 7 o linde discorre polo camiño que une o aparcadoiro do camiño da Armada con Maceiras. O lindeiro sur comeza no piquete núm. 7 desde onde se toma a dirección oeste atravesando una liña de media tensión (piquetes núm. 9 e 12), ata chegar ao piquete núm. 13 situado nun camiño que leva ata o camiño da Lagoa (piquete núm. 14). Desde este punto e seguindo a dirección do camiño uns metros ao sur deste chégase ao piquete núm. 18 que se marca na estaca núm. 38 do monte de Mondariz. Desde aquí iníciase o lindeiro oeste seguindo unha devasa en dirección norte-nordeste ata o piquete núm. 25.

Lindeiros: monte veciñal en man común de Mondariz e propiedades particulares.

Enclavados: ningún.

Cabidas: 9,33 ha.

2. Parcela Neno do Corvo.

Provincia: Pontevedra.

Termo municipal: Mondariz.

Pertenza: entidade local menor de Queimadelos.

Límites:

Norte: monte veciñal en man común de Mondariz e propiedades particulares.

Leste: propiedades particulares.

Sur: propiedades particulares.

Oeste: monte veciñal en man común de Mondariz.

Descrición de lindeiros: comeza o lindeiro norte no piquete núm. 51 que se sinala nun marco de pedra co núm. 45 do monte de Mondariz. A seguinte que se marca en dirección leste é a núm. 52. Neste piquete comeza o lindeiro leste, desde este punto báixase un rego en dirección sur ata o piquete núm. 57, deixando un monte particular á esquerda e chegando ata o camiño de Cotos das Maceiras a Mondariz. O lindeiro sur empeza neste piquete tomando un sendeiro en dirección suroeste ata o piquete núm. 61 próximo á marxe do río Sabriña. Neste piquete comeza o lindeiro oeste que discorre por unha devasa que sobe ladeira arriba en dirección norte ata o piquete núm. 65, que se une co núm. 51 a través do camiño de Neno do Corvo á Lagoa.

Lindeiros: monte veciñal en man común de Mondariz e propiedades particulares.

Enclavados: ningún.

Cabidas: 2,05 ha.

Servidumes.-Ao longo do desenvolvemento do deslindamento localizáronse dúas liñas de tendido eléctrico de media tensión así como un camiño de servizo, sen que se teña constancia documental do establecemento destas servidumes.

Segundo.-Que se cancele total ou parcialmente calquera inscrición rexistral en tanto sexa contraditoria coa descrición do monte Lagoa.

Terceiro.-Declarar, expresamente que, no referente ás reclamacións de propiedade, esta resolución esgota a vía administrativa e queda expedita a xudicial civil.

Cuarto.-Que se inmatricule o monte coas características resultantes no Rexistro da Propiedade.

Quinto.-Esta orde entrará en vigor ao día seguinte ao da súa publicación no Diario Oficial de Galicia e contra ela poderá interpoñerse recurso de reposición con carácter potestativo ante o conselleiro do Medio Rural, no prazo dun mes ou ben interpoñer directamente o recurso contencioso-administrativo ante o Tribunal Superior de Xustiza de Galicia no prazo de dous meses, de acordo co disposto nos artigos 109 e 116 da Lei 30/1992, do 26 de novembro, de réxime xurídico das administracións públicas e do procedemento administrativo común, e nos artigos 10 e 46 da Lei 29/1998, do 13 de xullo, da xurisdición contencioso-administrativa.

Santiago de Compostela, 22 de decembro de 2008.

Alfredo Suárez Canal

Conselleiro de Medio Rural