Antecedentes.
De conformidade co disposto no artigo 68 do Regulamento de ordenación da pesca fluvial e dos ecosistemas acuáticos continentais (Decreto 130/1997, do 14 de maio), a Consellería de Medio Ambiente e Desenvolvemento Sostible aprobou o Plan de xestión de recursos piscícolas dos seguintes tramos da bacía do río Suarna, situados no concello da Fonsagrada:
-Curso principal do río Suarna:
Límite superior: desembocadura do río de Lamas.
Límite inferior: ponte da Ferraría da Cuíña.
Lonxitude aproximada: 7 km.
-Río de Lamas:
Límite superior: A Ponte de Cereixido.
Límite inferior: desembocadura no río Suarna.
Lonxitude aproximada: 3,5 km.
De conformidade co disposto no artigo 15 do Regulamento de ordenación da pesca fluvial e dos ecosistemas acuáticos continentais (Decreto 130/1997, do 14 de maio), o Servizo Provincial de Conservación da Natureza de Lugo iniciou o expediente de creación do couto de pesca da Fonsagrada.
No expediente de creación do couto de pesca da Fonsagrada consta o informe favorable do Comité Provincial de Pesca Fluvial de Lugo.
No trámite de información pública do expediente de creación do couto de pesca da Fonsagrada presentou alegacións a Sociedade de Pesca A Seimeira, da Fonsagrada. As ditas alegacións, consistentes nunha oposición á creación do couto sen apenas exposición de motivos, recibiron o informe negativo do Comité Provincial de Pesca de Lugo e mais do Servizo Provincial de Conservación da Natureza.
Consideracións legais.
O expediente de creación do couto de pesca da Fonsagrada cumpre os requisitos establecidos na Lei 7/1992, do 24 de xullo, de pesca fluvial, no Decreto 130/1997, do 14 de maio, polo que se aproba o Regulamento de ordenación da pesca fluvial e dos ecosistemas acuáticos continentais, e demais normativa de aplicación.
A Dirección Xeral de Conservación da Natureza é competente para resolver o expediente segundo o disposto na Lei 7/1992, do 24 de xullo, de pesca fluvial, no Decreto 130/1997, do 14 de maio, polo que se aproba o Regulamento de ordenación da pesca fluvial e dos ecosistemas acuáticos continentais, e mais no Decreto 1/2006, do 12 de xaneiro, polo que se establece a estrutura orgánica da Consellería de Medio Ambiente e Desenvolvemento Sostible.
Resolución.
De conformidade con todo o anterior, resolvo crear o couto de pesca da Fonsagrada, cos límites e a normativa que a seguir se establecen:
Ríos: río Suarna e río de Lamas.
Concello: A Fonsagrada.
Límite superior: A Ponte de Cereixido, no río de Lamas.
Límite inferior: ponte da Ferraría da Cuíña, no río Suarna.
Lonxitude aproximada: 10,5 km.
Tramo 1: desde o límite superior do couto ata a ponte da estrada entre Cereixido e Vilagocende, no río de Lamas, dunha lonxitude aproximada de 2,1 km.
Tramo 2: desde a ponte da estrada entre Cereixido e Vilagocende, no río de Lamas, ata o límite inferior do couto, dunha lonxitude aproximada de 8,4 km.
Clasificación: couto de troita e pesca sen morte.
Permisos diarios: 4 permisos de pesca sen morte para o tramo 1 e 8 permisos de terceira categoría para o tramo 2.
Cota de captura: 6 troitas por pescador e xornada.
Tamaño mínimo da troita: 21 cm.
Días inhábiles: segundo a orde anual de pesca continental.
De conformidade co disposto no artigo 15 do Regulamento de ordenación da pesca fluvial e dos ecosistemas acuáticos continentais (Decreto 130/1997, do 14 de maio), inclúense no couto de pesca os 100 m finais de todos os afluentes existentes no tramo coutado.
Contra esta resolución caberá, de conformidade cos artigos 107.1º, 114 e 115 da Lei 4/1999, de modificación da Lei 30/1992, do 26 de novembro, de réxime xurídico das administracións públicas e do procedemento administrativo común, a interposición do recurso de alzada perante o conselleiro de Medio Ambiente e Desenvolvemento Sostible no prazo dun mes, contado desde o día seguinte ao da publicación no Diario Oficial de Galicia.
Santiago de Compostela, 20 de xaneiro de 2009.
Xosé Benito Reza Rodríguez
Director xeral de Conservación da Natureza
