A Lei 30/1992, do 26 de novembro, de réxime xurídico das administracións públicas e do procedemento administrativo común, no seu artigo 17.1º dispón: «Os titulares dos órganos administrativos poderán ser suplidos temporalmente nos supostos de vacante, ausencia ou enfermidade por quen designe o órgano competente para o nomeamento daqueles.

Se non se designa suplente, a competencia do órgano administrativo exerceraa quen designe o órgano administrativo inmediato de quen dependa».

Producido o cesamento da titular da Secretaría Xeral da Igualdade, cómpre adoptar as medidas inmediatas para que, sen prexuízo do posterior nomeamento do novo titular deste órgano administrativo, se asegure o correcto funcionamento do servizo e dos asuntos encomendados ao devandito órgano no artigo 5 do Decreto 517/2005, do 6 de outubro, polo que se establece a estrutura orgánica da Vicepresidencia da Igualdade e do Benestar.

Así mesmo, de conformidade co artigo 1 da Lei 3/1991, do 14 de xaneiro, de creación do Servizo Galego de Promoción da Igualdade do Home e da Muller, e do artigo 2 do Decreto 517/2005, do 6 de outubro, este é un organismo autónomo, de carácter administrativo, dependente da Vicepresidencia da Igualdade e do Benestar e adscrito á Secretaría Xeral da Igualdade.

O Decreto 312/1999, do 11 de novembro, polo que se refunde a normativa existente en materia de muller, modificado polo Decreto 249/2002, do 18 de xullo, regula as funcións que lle correspondan á súa dirección, e non establece regulación ou designación ningunha relativa á suplencia do seu titular.

De acordo con esta regulación e producido o cesamento da titular da dirección do dito organismo autónomo, cómpre adoptar, así mesmo, as medidas inmediatas para que, sen prexuízo do posterior nomeamento do novo titular, se asegure o correcto funcionamento do servizo e dos asuntos encomendados.

Polo tanto, en virtude das atribucións que me confire o artigo 3 do Decreto 517/2005, do 6 de outubro, polo que se establece a estrutura orgánica da Vicepresidencia da Igualdade e do Benestar, en relación co artigo 17 da Lei 30/1992, do 26 de novembro, de réxime xurídico das administracións públicas e do procedemento administrativo común,

DISPOÑO:

Artigo 1º

O despacho dos asuntos da Secretaría Xeral da Igualdade, previstos no artigo 5 do Decreto 517/2005, do 6 de outubro, polo que se establece a estrutura orgánica da Vicepresidencia da Igualdade e do Benestar, será asumido polo secretario xeral da Vicepresidencia da Igualdade e do Benestar ata que se produza a incorporación do novo titular ao devandito órgano.

Artigo 2º

O despacho dos asuntos da dirección do Servizo Galego de Promoción da Igualdade do Home e da Muller, previstos no Decreto 312/1999, do 11 de novembro, polo que se refunde a normativa existente en materia de muller, será asumido polo secretario xeral da Vicepresidencia da Igualdade e do Benestar ata que se produza a incorporación do novo titular ao devandito organismo.

Artigo 3º

1. Sempre que se exerzan competencias con base na suplencia establecida nesta orde, deberá facerse constar así nos actos ou resolucións administrativas correspondentes.

2. A suplencia non implicará alteración da competencia.

Disposición derradeira

Esta orde producirá efectos a partir do mesmo día da súa publicación no Diario Oficial de Galicia.

Santiago de Compostela, 22 de xaneiro de 2009.

Anxo Manuel Quintana González

Vicepresidente da Igualdade e do Benestar