O Decreto 37/2007, do 15 de marzo, establece a estrutura da Consellería de Presidencia, Administracións Públicas e Xustiza. As novas funcións asumidas en materia de xustiza, a creación da Axencia Galega de Emerxencias a través da Lei 5/2007, do 7 de maio, que asume parte das competencias que exercía a Dirección Xeral de Protección Civil e o desenvolvemento práctico das competencias e funcións atribuídas ás distintas unidades administrativas fan necesaria a modificación da estrutura da Consellería de Presidencia, Administracións Públicas e Xustiza.

De acordo co exposto, por proposta do conselleiro de Presidencia, Administracións Públicas e Xustiza, logo do informe das consellerías de Presidencia, Administracións Públicas e Xustiza e Economía e Facenda, en uso das atribucións conferidas pola Lei 1/1983, do 22 de febreiro, e logo de deliberación do Consello da Xunta de Galicia, na súa reunión do día trinta de decembro de de dous mil oito,

DISPOÑO:

Artigo único.-Modificación do Decreto 37/2007, do 15 de marzo, polo que se establece a estrutura orgánica da Consellería de Presidencia, Administracións Públicas e Xustiza.

O Decreto 37/2007, do 15 de marzo, polo que se establece a estrutura orgánica da Consellería de Presidencia, Administracións Públicas e Xustiza, queda modificado como segue:

Un. O artigo 7.6º queda coa seguinte redacción:

6. O Servizo do rexistro xeral.

Este servizo exercerá, entre outras, as seguintes funcións:

a) A dirección, seguimento e control do Rexistro Xeral da Xunta de Galicia, así como a súa coordinación cos demais rexistros oficiais da Administración autonómica.

b) A recepción de solicitudes, escritos e comunicacións presentados polos cidadáns, así como dos documentos que os acompañen dirixidos ás administracións públicas.

c) A expedición de recibos de presentación de solicitudes, escritos e comunicacións.

d) A expedición de copias seladas e compulsadas dos documentos que acompañen as solicitudes, escritos e comunicacións, presentados polos cidadáns, dirixidos ás administracións públicas.

e) A anotación de asentos de entrada e saída das solicitudes, escritos e comunicacións.

f) A remisión de solicitudes, escritos e comunicacións aos órganos ou unidades destinatarias.

g) A emisión de certificacións dos asentos do rexistro, das solicitudes, escritos e comunicacións que se presentasen.

h) Facilitar información xeral aos cidadáns.

i) Calquera outra que lle atribúan legal ou regulamentariamente.

Dous. O artigo 9.2º queda redactado como segue:

2. Para o cumprimento das súas funcións, a Subdirección Xeral de Xestión Económica e Persoal contará coas seguintes unidades administrativas:

2.1. Servizo de Xestión Económica.

Este servizo exercerá, entre outras, as seguintes funcións:

a) A execución da xestión orzamentaria efectuando os trámites económico-administrativos dos expedientes de gasto e propostas de pagamentos dos servizos centrais da Secretaría Xeral e outros centros de gasto da consellería.

b) A habilitación de gastos correntes dos servizos correspondentes á área de Administración xeral.

c) A xestión da subministración, a todos os centros directivos da consellería, de material de oficina, imprenta e consumibles informáticos.

d) A xestión, coordinación, seguimento e tramitación dos pagamentos derivados dos procesos selectivos de persoal da Xunta de Galicia e eleccións sindicais.

e) As demais funcións que, incluídas no ámbito respectivo, lle sexan asignadas.

2.2. Servizo de Control e Seguimento Orzamentario.

Son funcións deste servizo:

a) A coordinación do anteproxecto de orzamentos da consellería.

b) O control e seguimento da execución orzamentaria dos programas de gastos da consellería.

c) A tramitación das propostas de modificación orzamentaria da consellería.

d) A preparación, elaboración e tramitación dos convenios de colaboración con outros entes públicos ou privados, iniciados pola Secretaría Xeral.

e) A habilitación de gastos de persoal da consellería.

f) A habilitación de gastos correntes correspondentes aos servizos xerais da Administración de xustiza.

g) As demais funcións que, incluídas no ámbito respectivo, lle sexan asignadas.

2.3. Servizo de Persoal.

Son funcións deste servizo, respecto de todo o persoal adscrito á Consellería de Presidencia, Administracións Públicas e Xustiza, ben sexa de carácter laboral ou funcionario, agás o persoal ao servizo da Administración de xustiza:

a) A xestión, control e coordinación de todo o persoal dos servizos centrais, así como a coordinación das delegacións en materia de persoal.

b) A tramitación dos expedientes administrativos relativos a persoal funcionario, laboral e eventual.

c) A programación das necesidades de persoal.

d) O control da asistencia e puntualidade.

e) A tramitación das licenzas, permisos e situacións administrativas do persoal.

f) A selección e tramitación das propostas de cobertura de prazas de funcionarios interinos e substitucións de persoal laboral dos servizos centrais da Xunta de Galicia e o control das interinidades e substitucións do persoal funcionario e laboral dos servizos periféricos da Xunta de Galicia.

g) O estudo, tramitación e elaboración das propostas de resolución de reclamacións previas á vía laboral e recursos que se formulen en materias relativas ao persoal da consellería, así como a elaboración de informes e a coordinación das actuacións necesarias.

h) A execución de sentenzas en materia de persoal funcionario e laboral da consellería.

i) As demais funcións que, incluídas no ámbito respectivo, lle sexan asignadas.

Tres. A sección cuarta, artigos 26 a 30, quedan redactados como segue:

Sección cuarta

A Dirección Xeral de Xustiza

Artigo 26º.-Competencias.

1. A Dirección Xeral de Xustiza exercerá as competencias que lle corresponden á Xunta de Galicia, estatutariamente ou por transferencia, relativas aos medios persoais, económicos e materiais ao servizo da Administración de xustiza, á promoción e desenvolvemento do dereito civil de Galicia, á demarcación e planta xudicial, notarial e rexistral e ao acceso dos cidadáns á xustiza en igualdade de oportunidades.

2. No exercicio das súas competencias correspóndenlle a este órgano as relacións ordinarias cos órganos do poder xudicial, o Ministerio de Xustiza e as demais institucións relacionadas co ámbito xurisdicional.

3. En particular, son competencias da Dirección Xeral de Xustiza:

a) A programación, dotación e organización dos recursos económicos e materiais da Administración de xustiza en Galicia, así como a promoción do desenvolvemento e uso das tecnoloxías da información e comunicación na dita Administración.

b) A dirección da xestión do persoal ao servizo da Administración de xustiza dependente da Xunta de Galicia, incluíndo a xestión das relacións sindicais e actividade negociadora neste ámbito sectorial, a autorización da nómina referente ás súas retribucións e o exercicio das potestades disciplinarias respecto do dito persoal.

c) O impulso do uso do galego na Administración de xustiza en colaboración coa Secretaría Xeral de Política Lingüística.

d) A promoción do acceso dos cidadáns á xustiza en igualdade de condicións, a través da dirección, reforma e control do sistema de asistencia xurídica gratuíta.

e) A presentación das propostas sobre demarcación e planta xudicial, sobre demarcación notarial e rexistral e sobre convocatoria das prazas vacantes de maxistrados, xuíces, secretarios xudiciais, así como elevar ao conselleiro os nomeamentos de notarios e rexistradores.

f) A proposta do cadro de persoal ao servizo da Administración de xustiza, así como das súas modificacións, de conformidade co previsto na Lei orgánica do poder xudicial e demais normativa en vigor.

g) A organización e supervisión do funcionamento do Instituto de Medicina Legal de Galicia e a programación de actuacións para o establecemento de sistemas de xestión de calidade dos seus servizos e para o seu desenvolvemento científico e tecnolóxico.

h) A coordinación coa Secretaría xeral da consellería e as súas delegacións provinciais para impulsar a prevención de riscos laborais nos centros de traballo da Administración de xustiza.

i) O exercicio das competencias da consellería para o funcionamento e a mellora da xustiza de paz.

j) O impulso, implantación e desenvolvemento de programas e actuacións de desxudicialización de conflitos e de promoción da mediación, especialmente no ámbito de menores e da familia.

k) A xestión da política da Xunta de Galicia en materia de asesoramento xurídico, defensa no marco da asistencia xurídica gratuíta e información en sede xudicial ás vítimas do delito, sen prexuízo da coordinación e colaboración co departamento competente en materia de igualdade en relación coas súas competencias na atención psicolóxica, social e xurídica e información ás mulleres vítimas de violencia de xénero.

l) A elaboración do modelo de oficina xudicial e a implantación de programas de modernización, mellora e promoción da calidade no funcionamento das oficinas e servizos da Administración de xustiza.

m) As demais competencias que lle atribúa a normativa en vigor e aqueloutras funcións que lle sexan singular ou especificamente encomendadas ou delegadas polo conselleiro de Presidencia, Administracións Públicas e Xustiza.

Artigo 27º.-Estrutura da Dirección Xeral de Xustiza.

Para o desenvolvemento das súas funcións, a Dirección Xeral de Xustiza estrutúrase nas seguintes unidades:

1.1. Subdirección Xeral de Relacións coa Administración de Xustiza.

1.2. Subdirección Xeral de Recursos Humanos da Administración de Xustiza.

1.3. Subdirección Xeral de Medios e Novas Tecnoloxías da Administración de Xustiza.

1.4. Servizo de Programas e Estudos.

Artigo 28º.-Funcións e estrutura da Subdirección Xeral de Relacións coa Administración de Xustiza.

1. Á Subdirección Xeral de Relacións coa Administración de Xustiza correspóndelle executar as directrices da dirección xeral e coidar do funcionamento dos servizos administrativos nas seguintes materias:

a) A execución das directrices da dirección xeral respecto ás relacións co Consello Xeral do Poder Xudicial, coa Administración de xustiza e demais institucións que cooperan coa xustiza.

b) A organización, dirección funcional e coordinación do funcionamento das oficinas de información ao cidadán e asistencia á vítima das sedes xudiciais.

c) A organización, xestión e avaliación do funcionamento dos servizos de peritaxe e dos servizos de tradución e interpretación.

d) O soporte administrativo, coordinación e seguimento da implantación dos programas e medidas no ámbito da atención ás vítimas, da mediación e resolución extraxudicial de conflitos.

e) O soporte administrativo das funcións que corresponden á Dirección Xeral de Xustiza en relación co rexistro de parellas de feito.

f) A elaboración de estudos e informes sobre as necesidades de formación continuada dos membros da carreira xudicial, membros do Ministerio Fiscal e secretarios xudiciais.

g) Elaboración das propostas de reestruturación, mellora e organización da xustiza de paz.

h) A xestión da asistencia xurídica gratuíta.

i) O apoio e asesoramento organizativo e administrativo ao Instituto de Medicina Legal de Galicia.

j) A planificación da actividade económica nos programas de gasto xestionados pola Dirección Xeral de Xustiza, a preparación do anteproxecto de orzamento de gastos da dirección xeral -agás dos gastos dos capítulos I e VI-, a tramitación das modificacións do orzamento de gastos e o asesoramento nas ditas materias ao director xeral.

k) A execución e seguimento da xestión económica do gasto corrente, impulsando a contratación centralizada das subministracións, servizos e consultorías que procedan e coordinando a xestión do gasto corrente descentralizada nas delegacións provinciais.

l) O impulso e dirección dos contratos de desenvolvemento de sistemas de información para impulsar a Administración electrónica en materia de asistencia xurídica gratuíta.

m) As demais funcións que, incluídas no ámbito respectivo, lle sexan asignadas.

2. Para o cumprimento das súas funcións contará, con nivel orgánico de servizo, coas seguintes unidades:

2.1. O Servizo de Relacións coa Administración de Xustiza. Executará as directrices que lle sexan encomendadas pola subdirección xeral, proporcionándolle soporte administrativo nas seguintes áreas:

a) Normalización lingüística do galego na Administración de xustiza.

b) Nomeamento de notarios e rexistradores.

c) Colaboracións administrativas para a tramitación e desenvolvemento dos convenios asinados pola Xunta de Galicia co Consello Xeral do Poder Xudicial, Ministerio de Xustiza e demais institucións en relación coas materias de competencia da dirección xeral.

d) Expedientes de axudas económicas para os gastos de funcionamento dos xulgados de paz, así como a tramitación administrativa das convocatorias e convenios de subvención a aquelas institucións que realicen actividades acordes cos fins da xustiza.

e) Xestión administrativa das funcións atribuídas á dirección xeral en materia de asistencia xurídica gratuíta.

f) Demais funcións que, incluídas no ámbito respectivo, lle sexan asignadas.

2.2. O Servizo de Xestión Económica e Administrativa, ao cal lle corresponderá:

a) A programación, coordinación e a xestión económico-administrativa derivadas das funcións atribuídas á Dirección Xeral de Xustiza.

b) A xestión orzamentaria e contable da dirección xeral.

c) A xestión da habilitación da dirección xeral e a coordinación coas habilitacións das delegacións provinciais da consellería.

d) O impulso, seguimento e control da execución de todos os contratos relativos ao gasto corrente.

e) As demais funcións que, incluídas no ámbito respectivo, lle sexan asignadas.

Artigo 28º bis.-Funcións e estrutura da Subdirección Xeral de Recursos Humanos da Administración de Xustiza.

1. Á Subdirección Xeral de Recursos Humanos da Administración de Xustiza correspóndelle executar as directrices da dirección xeral e exercer respecto do persoal funcionario ao servizo da Administración de xustiza en Galicia, entre outras, as seguintes funcións:

a) A organización da xestión do persoal funcionario ao servizo da Administración de xustiza.

b) A participación na función de relacións laborais e a intervención na negociación no ámbito sectorial nos termos da Lei 9/1987, do 12 de maio, de órganos de representación, determinación das condicións de traballo e participación do persoal ao servizo da Administración pública, e o seguimento dos acordos derivados dela.

c) A presentación de propostas relativas ás relacións de postos de traballo, así como elaboración e a tramitación dos plans de ordenación de recursos humanos consonte as instrucións da dirección xeral.

d) A realización dos estudos precisos para a elaboración da proposta de anteproxecto dos orzamentos do capítulo I correspondente ao persoal ao servizo da Administración de xustiza, e o seguimento e control da súa execución.

e) A colaboración e coordinación co Centro Informático de Xestión Tributaria Económico-Financeira e Contable, e coas habilitacións de persoal, para a xestión da nómina do persoal ao servizo da Administración de xustiza en Galicia.

f) A negociación e proposta de distribución do Fondo de Acción Social para o persoal ao servizo da Administración de xustiza.

g) A programación e execución dos programas de formación inicial e continua do persoal funcionario ao servizo da Administración de xustiza en Galicia, ben directamente ou en colaboración coa Escola Galega de Administración Pública.

h) A xestión, en colaboración co Ministerio de Xustiza, dos procesos de selección e ingreso de persoal funcionario ao servizo da Administración de xustiza.

i) A presentación de borradores das disposicións normativas, instrucións e circulares relativas ás anteriores competencias.

j) O impulso e dirección dos contratos de desenvolvemento de sistemas de información para impulsar a Administración electrónica en materia de xestión de recursos humanos ao servizo da Administración de xustiza.

k) As demais funcións que, incluídas no ámbito respectivo, lle sexan asignadas.

2. Para o cumprimento das súas funcións contará coa seguinte unidade:

2.1. O Servizo de Recursos Humanos da Administración de Xustiza que, en relación co persoal funcionario ao servizo da Administración de xustiza en Galicia, asume as seguintes funcións:

a) O soporte administrativo e a execución da política de relacións laborais coas organizacións sindicais e órganos de representación do persoal e o seguimento dos seus dereitos, así como a canalización e o informe das relacións individualizadas co persoal, sen prexuízo das funcións atribuídas a outros órganos.

b) O apoio á subdirección na confección dos estudos previos á elaboración da proposta do anteproxecto dos orzamentos do capítulo I, e as propostas de modificación de crédito.

c) O seguimento da execución orzamentaria do capítulo I e da aplicación homoxénea e uniforme das políticas retributivas por parte das habilitacións de persoal, así como a elaboración de estudos e informes.

d) O mantemento e actualización do rexistro de persoal e a transferencia de expedientes, datos e comunicacións co Ministerio de Xustiza e os departamentos de xustiza doutras comunidades autónomas.

e) A preparación da oferta de emprego público e a preparación e execución dos procesos de provisión de postos de traballo.

f) A confección das relacións de postos de traballo, a tramitación das propostas de modificación do cadro de persoal e o mantemento e actualización da aplicación informática de xestión de persoal (AIX).

g) A tramitación de expedientes disciplinarios e outros en materia de persoal, así como a tramitación dos recursos e reclamacións.

h) A preparación dos antecedentes e a confección das comunicacións aos órganos xudiciais e informes que procedan sobre as demandas en vía xurisdicional.

i) A tramitación dos expedientes de declaración de situacións administrativas e compatibilidade para o exercicio doutras actividades, comisións de servizos, adscrición provisional de funcionarios, licenzas e outros expedientes en materia de persoal.

j) As demais funcións que en materia de xestión de persoal lle encomende a dirección xeral ou a subdirección.

Artigo 29º.-Funcións e estrutura da Subdirección Xeral de Medios e Novas Tecnoloxías da Administración de Xustiza.

1. A Subdirección Xeral de Medios e Novas Tecnoloxías da Administración de Xustiza, baixo a supervisión e executando as directrices da dirección xeral, asumirá as seguintes funcións:

a) A presentación de propostas e execución de actuacións de mellora dos medios tecnolóxicos, equipamentos e dotación mobiliaria que a consellería pon á disposición da Administración de xustiza.

b) A coordinación das actuacións administrativas necesarias en materia de vixilancia e protección das sedes xudiciais.

c) A elaboración de propostas e a execución de actuacións para a modernización, organización e xestión dos arquivos e dos depósitos xudiciais, o apoio organizativo e técnico á implantación e funcionamento da xunta de expurgación da documentación xudicial, así como a coordinación da dotación dos medios precisos para o adecuado funcionamento da xunta de expurgación, arquivos e depósitos xudiciais.

d) Confeccionar a documentación precisa para impulsar os procesos de contratación en materia de investimentos e novas tecnoloxías.

e) A xestión administrativa das tecnoloxías da información e comunicación da Administración de xustiza, que incluirá, entre outras, o exercicio das seguintes funcións:

-A análise das necesidades en materia de informática e de novas tecnoloxías da Administración de xustiza, e elaboración das propostas de plans, programas e estratexias de actuación en materia de tecnoloxías da información e da comunicación da Administración de xustiza.

-A presentación de propostas e a implementación de medidas de mellora da xestión documental nas oficinas xudiciais e fiscais.

-A supervisión do funcionamento dos servizos de novas tecnoloxías e do centro de atención a usuarios, así como velar pola calidade da xestión.

-A elaboración e actualización da documentación de seguridade relativa ao Sistema de Información e Comunicación, a planificación da súa implantación e o control do seu cumprimento.

-A promoción do coñecemento das pautas de conduta establecidas para o tratamento de datos persoais contidos nos sistemas de información da Administración de xustiza, e a colaboración cos responsables dos ficheiros para acadar o efectivo cumprimento das ditas pautas, así como da política de seguridade aplicable.

-A elaboración de propostas de plans, programas e estratexias para a galeguización dos sistema de información da Administración de xustiza.

-O impulso e coordinación das actuacións da consellería no marco dos programas de informatización e dixitalización dos rexistros civís.

-A coordinación, o soporte administrativo e o impulso do funcionamento dos grupos técnicos e grupos de traballo que se constitúan no ámbito da xustiza galega para a mellora da xestión dos servizos ou medios, así como para a promoción e desenvolvemento da Administración electrónica.

-A análise das necesidades e a xestión da formación de reciclaxe dos usuarios en materia de informática e novas tecnoloxías, así como a elaboración de propostas de formación continuada nesta materia.

-O desenvolvemento das adecuadas relacións de coordinación interna cos órganos competentes responsables da rede corporativa e dos sistemas de información da Xunta de Galicia, así como coas unidades responsables das obras e do mantemento das sedes xudiciais e outras unidades, para o adecuado exercicio das anteriores competencias.

2. Para o desenvolvemento das súas funcións contará coa seguinte unidade:

2.1. O Servizo de Informática e Novas Tecnoloxías, ao cal, seguindo as instrucións da dirección xeral ou subdirección, lle corresponderá:

a) Definir os requirimentos técnicos dos equipos, elementos e compoñentes dos sistemas de información e de comunicación da Administración de xustiza.

b) Implantar a política de seguridade e medidas de protección de datos e sistemas, segundo as directrices da dirección xeral ou subdirección, así como velar polo estrito cumprimento da dita política e da normativa vixente en materia de seguridade dos sistemas informáticos e tratamento de datos de ficheiros de carácter persoal.

c) Participar na planificación da política de informatización e na definición de estratexias de implantación de novas tecnoloxías nos órganos e servizos xudiciais, asesorando nesta materia a dirección xeral e subdirección.

d) Dirixir o deseño, programación e mantemento das aplicacións informáticas da Administración de xustiza, xunto coa prestación de asistencia técnica nesta materia.

e) Validar a calidade das novas aplicacións como paso previo á súa implantación.

f) Coidar da adecuada xestión das bases de datos, redes de comunicacións e sistemas informáticos da xustiza en Galicia.

g) Xestionar e garantir o adecuado funcionamento do sistema de resolución de incidencias técnicas nos equipamentos e sistemas de información e comunicación.

h) Prestar a asistencia técnica en materia de novas tecnoloxías precisa para o normal funcionamento dos órganos e servizos xudiciais.

i) Dirixir o funcionamento do Centro de Atención de Usuarios (CAU) de xustiza.

j) Calquera outra función que sobre estas materias lle encomende a dirección xeral.

Artigo 30º.-Funcións do Servizo de Programas e Estudos.

Ao Servizo de Programas e Estudos correspóndenlle as seguintes funcións:

a) O apoio á dirección xeral no estudo e preparación de documentación nas relacións con outras administracións públicas e a Conferencia Sectorial de Xustiza.

b) O seguimento e análise das estatísticas xudiciais e rexistrais, en colaboración co Consello Xeral do Poder Xudicial, o Ministerio de Xustiza e o Tribunal Superior de Xustiza de Galicia, e a elaboración dos informes precisos para a toma de decisións da dirección xeral.

c) Os estudos e informes sobre demarcación territorial dos órganos xudiciais e fiscais, notarías e rexistros públicos na Comunidade Autónoma.

d) A presentación de propostas de programas de actuación que teñen por obxecto mellorar a accesibilidade e a atención ao cidadán e á vítima, así como a calidade do servizo, normalización lingüística, transparencia, eficiencia e axilidade do funcionamento das unidades administrativas, oficinas xudiciais e servizos da Administración de xustiza.

e) O soporte administrativo ás actividades da dirección xeral para o desenvolvemento do dereito galego.

f) A realización dos estudos e informes que lle encomende a Dirección Xeral de Xustiza nas materias da súa competencia.

g) A análise e tramitación das queixas e reclamacións dos usuarios do servizo público da xustiza remitidas polo Consello Xeral do Poder Xudicial, unidades de atención ao cidadán e outros organismos.

h) A confección da memoria anual de actividades da dirección xeral.

i) As demais funcións que, incluídas no ámbito respectivo, lle sexan asignadas.”

Catro. A sección sexta, artigos 35 a 38, queda redactada como segue:

Sección sexta

Da Dirección Xeral de Protección Civil

Artigo 35º.-Competencias.

A Dirección Xeral de Protección Civil exercerá a dirección, coordinación e execución das atribucións que ten asumidas a consellería en materia de protección civil e atención de emerxencias, tales como prevención, previsión e análises de riscos, planificación da protección civil, a dirección na atención das emerxencias segundo o disposto no artigo 35.4 da Lei 5/2007, de emerxencias de Galicia, e o restablecemento dos servizos esenciais para a cidadanía afectada por unha emerxencia.

Correspóndelle a representación da consellería na Comisión Nacional de Protección e noutros organismos de coordinación internacionais, europeos e autonómicos de protección civil. Así mesmo, correspóndelle a planificación e coordinación dos plans e programas dos servizos contra incendios e salvamento local, sen prexuízo das competencias que lle puidesen corresponder á Axencia Galega de Emerxencias e á Dirección Xeral de Administración Local.

Correspóndenlle tamén as relacións da Administración autonómica, en materia de protección civil e atención áss emerxencias, coas administracións locais, coas comunidades autónomas, coa Administración xeral do Estado e cos Estados da Unión Europea, tendo unha relación especial con Portugal pola proximidade e por compartir riscos e emerxencias comúns.

Ademais levará a cabo o seguimento da encomenda do Consello de Seguridade Nuclear á Xunta de Galicia en materia de vixilancia radiolóxica co exercicio de autoridade competente para a protección dos traballadores e da poboación fronte á exposición a fontes de radiación natural asociada a actividades laborais, en aplicación do título VII do Regulamento de protección sanitaria contra as radiacións ionizantes prevista no Real decreto 783/2001. Así mesmo, correspóndelle a xestión, en coordinación coa sala de emerxencias do Consello de Seguridade Nuclear, dos sucesos de emerxencia radiolóxica e a formación do persoal técnico de xestión e intervención para actuación en presenza de riscos radiolóxicos.

Xestionará os créditos procedentes dos fondos da Unión Europea transferidos aos orzamentos de Comunidade Autónoma de Galicia destinados a programas e accións en materia de protección civil.

Por requirimento da Consellería elaborará as propostas previas á remisión ao Consello da Xunta para a aprobación dos decretos que desenvolverán a Lei 5/2007, de emerxencias de Galicia.

De acordo co disposto na disposición adicional terceira da Lei 5/2007, de emerxencias de Galicia, levará a cabo as accións de impulso para a creación dos consorcios provinciais para a prestación de servizos de prevención e extinción de incendios e salvamento.

Artigo 36º.-Estrutura.

Para o exercicio das súas funcións a dirección xeral estrutúrase nas seguintes unidades administrativas:

1. Subdirección Xeral de Planificación.

2. Subdirección Xeral de Calidade da Protección Civil.

Artigo 37º.-Funcións e estrutura da Subdirección Xeral de Planificación.

1. Á Subdirección Xeral de Planificación correspóndelle a execución das políticas de avaliación, prevención, previsión e análise de riscos e exercerá, entre outras, as seguintes funcións:

a) O fomento e supervisión de estudos relativos á análise de riscos existentes na Comunidade Autónoma que admitan fundamentar a realización de plans de prevención de emerxencias e catástrofes, e permitan o deseño e implementación de políticas públicas de prevención de riscos.

b) A elaboración, preparación, supervisión e superior dirección da implantación, mantemento, avaliación e revisión dos plans de protección civil autonómica previstos na normativa básica e calquera outro que sexa necesario redactar para asegurar unha mellor xestión dos riscos existentes, perseguindo a unidade de coordinación nas emerxencias e, de ser o caso, a dirección unificada da súa aplicación.

c) O fomento, impulso, coordinación e avaliación dos riscos territoriais, permanentes ou estacionais, e dos plans de protección civil competencia doutras administracións.

d) A elaboración do anteproxecto de orzamento correspondente aos seus programas de gasto, así como a súa execución, seguimento e avaliación.

e) A elaboración de anteproxectos normativos relativos ás materias competencia da dirección xeral.

f) A supervisión das distintas medidas de colaboración coas entidades locais no relativo á elaboración e implantación dos plans municipais, e a avaliación dos plans específicos e especiais de protección civil de ámbito territorial, provincial e local.

g) A coordinación das actuacións programadas pola dirección xeral e as realizadas polos servizos de protección civil das delegacións provinciais da Consellería de Presidencia, Administracións Públicas e Xustiza.

h) A coordinación dos comités operativos de protección civil da Xunta de Galicia e dos medios e recursos postos á súa disposición, de acordo co establecido nos plans de protección civil autonómicos.

i) O apoio administrativo e técnico á Comisión de Protección Civil da Comunidade Autónoma de Galicia, executando os seus acordos e desenvolvendo as súas propostas.

j) O desenvolvemento das competencias relativas a autoprotección que lle corresponden á Comunidade Autónoma, derivadas da aplicación do disposto na Lei 5/2007 e na Norma básica de autoprotección e as normas que a desenvolvan regulamentariamente.

k) O exercicio das facultades de inspección e en materia sancionadora, de acordo coa normativa vixente en materia de prevención de riscos, a protección civil e a autoprotección.

l) A supervisión da execución das funcións encomendadas pola autoridade competente en materia de seguridade nuclear á Xunta de Galicia.

m) A supervisión da xestión do réxime económico previsto no acordo da encomenda de funcións da autoridade en seguridade nuclear á Xunta de Galicia.

n) A supervisión do desenvolvemento das funcións de autoridade competente para a protección dos traballadores e da poboación fronte á exposición ás fontes de radiación natural asociada a actividades laborais, en aplicación do título VII do Regulamento de protección sanitaria contra as radiacións ionizantes (Real decreto 783/2001)

o) A coordinación coa sala de emerxencias da autoridade competente en materia de seguridade nuclear nos sucesos de emerxencia radiolóxica.

p) A supervisión da formación do persoal técnico de xestión e intervención para actuacións en presenza de riscos radiolóxicos.

q) As demais funcións que, incluídas no ámbito respectivo, lle sexan asignadas.

2. Para o cumprimento das súas funcións, a Subdirección Xeral de Planificación contará coas seguintes unidades administrativas:

2.1. Servizo de Xestión de Riscos. Este servizo desempeñará, entre outras, as seguintes funcións:

a) A elaboración, fomento e supervisión de plans de protección civil de competencia da Comunidade Autónoma, do seu mantemento e implementación, así como das campañas estacionais de xestión de riscos, particularmente a elaboración de previsións e alertas para os servizos de emerxencia e poboación en xeral derivados dos avisos por fenómenos meteorolóxicos adversos e outros riscos.

b) A elaboración de informes técnicos de avaliación de plans de protección civil e de emerxencia, para a súa aprobación e homologación, cando corresponda, polo órgano competente.

c) A supervisión e a preparación e execución dos exercicios e simulacros no marco dos citados plans autonómicos, colaborando cos de carácter local.

d) A supervisión e dirección dos traballos de redacción do inventario e mapa de riscos e a colaboración na elaboración do catálogo de medios e recursos da Comunidade Autónoma de Galicia e a súa actualización.

e) A colaboración coa Axencia Galega de Emerxencias na elaboración e actualización dos manuais operativos e de intervención derivados da aplicación dos plans de protección civil.

f) A colaboración coas entidades locais na elaboración dos plans de emerxencia municipal e dos plans de actuación municipal.

g) O mantemento dos rexistros en materia de protección civil propios da dirección xeral (rexistro de plans de emerxencia, de autoprotección, etc), agás os de agrupacións de voluntarios de protección civil.

h) Todas as demais medidas en materia de prevención de riscos e planificación que sexan competencia da Dirección Xeral de Protección Civil e non estean especificamente asignadas a outra unidade.

i) As demais funcións que, incluídas no ámbito respectivo, lle sexan asignadas.

2.2. Servizo de Vixilancia Radiolóxica. Este servizo desempeñará, entre outras, as seguintes funcións:

a) A inspección de instalacións radioactivas, incluíndo as de segunda e terceira categoría, comprendendo ás fases de construción, posta en marcha, funcionamento, modificación e clausura; a realización das inspeccións que sexan necesarias para o control das instalacións de raios X, con fins médicos, e as que sexan necesarias por razóns especiais ou denuncia, e aqueloutras que lle encargue expresamente a autoridade competente en materia de seguridade nuclear.

b) A inspección do transporte de combustible nuclear e doutros materiais radioactivos, incluídos os residuos radioactivos que, dentro do territorio español, se orixinen en Galicia.

c) A análise e avaliación relacionada coa protección radiolóxica nas instalacións radioactivas.

d) A presentación de propostas de actuacións correctoras e a preparación, se é o caso, de propostas de sanción, dándolle conta á autoridade competente en materia de seguridade nuclear.

e) A vixilancia radiolóxica ambiental no ámbito territorial de Galicia, de acordo cos programas que para este fin ten establecidos e aprobados a autoridade competente en materia de seguridade nuclear.

f) A información sobre lexislación en seguridade nuclear, regulamentos, instrucións técnicas complementarias, guías de seguridade, circulares informativas e recomendacións para a optimización dos procedementos de operación e para as actualizacións e modificacións dos regulamentos de funcionamento e os plans de emerxencia das instalacións radioactivas.

g) A atención, en coordinación coa sala de emerxencias da autoridade competente en materia de seguridade nuclear, dos sucesos de emerxencia radiolóxica, tanto nas instalacións radioactivas coma nos transportes de materiais radioactivos, e das situacións de urxencia que poidan xurdir por detección de fontes ou materiais radioactivos orfos.

h) O desenvolvemento das funcións encomendadas pola autoridade competente en materia de seguridade nuclear, relativas á protección dos traballadores e da poboación fronte á exposición a fontes de radiación natural asociada a actividades laborais.

i) A constitución, xestión e mantemento do arquivo da documentación orixinal xerada tanto pola autoridade competente en materia de seguridade nuclear como pola Xunta de Galicia, ou recibida en soporte papel, no desenvolvemento do Acordo de encomenda. O rexistro telemático da documentación e a custodia do arquivo da documentación orixinal, así como a utilización de medios informáticos do Consello de Seguridade Nuclear para a transmisión telemática da documentación.

j) O mantemento da operatividade da dotación do equipamento técnico específico e dos recursos informáticos e de comunicacións precisos para o desenvolvemento das funcións encomendadas.

k) A xestión do réxime económico aplicable á realización das funcións encomendadas pola autoridade competente en materia de seguridade nuclear.

l) A formación e información do persoal técnico de xestión e intervención para actuacións en presenza de riscos radiolóxicos.

m) O desenvolvemento das funcións de autoridade competente para a protección dos traballadores e da poboación fronte á exposición ás fontes de radiación natural asociada a actividades laborais, en aplicación do título VII do Regulamento de protección sanitaria contra as radiacións ionizantes (Real decreto 783/2001).

n) As demais funcións que, incluídas no ámbito respectivo, lle sexan asignadas.

Artigo 38º.-Funcións e estrutura da Subdirección Xeral de Calidade da Protección Civil.

1. Á Subdirección Xeral de Calidade da Protección Civil correspóndelle a execución das políticas de calidade, información e comunicación e fomento e promoción do asociacionismo e da autoprotección e exercerá, entre outras, as seguintes funcións:

a) A coordinación e seguimento das políticas de formación tanto do persoal da dirección xeral como dos colectivos dedicados á protección civil e á xestión das emerxencias e da autoprotección e colaboración con outros organismos relacionados coa protección civil e os seus programas formativos con suxeición a estándares de calidade.

b) A coordinación e seguimento das accións divulgativas e informativas relativas á protección civil da dirección xeral, incluídas ás relativas á autoprotección e á implantación dos plans de protección civil.

c) A promoción, colaboración e coordinación de unidades especializadas en tarefas de salvamento, socorro e outras relacionadas coa protección civil ou as emerxencias na Comunidade Autónoma.

d) A organización e mantemento dun banco documental multimedia especializado en materia de protección civil que permita a máxima difusión da información.

e) A elaboración do anteproxecto de orzamento correspondente aos seus programas de gasto, así como a súa execución, seguimento e avaliación.

f) A coordinación e seguimento das accións de promoción e fomento das asociacións e agrupacións de voluntarios de protección civil e o correspondente apoio técnico e económico.

g) A planificación e coordinación dos plans e programas dos servizos contra incendios e salvamento local, sen prexuízo das competencias atribuídas por lei ás administracións locais, así como de calquera outra figura de colaboración entre administracións que se cree para a xestión de emerxencias na Comunidade Autónoma.

h) Coordinación e seguimento das accións para a sinatura dos convenios realizados en materia de protección civil e emerxencias.

i) A coordinación e seguimento das accións para a concesión de axudas e subvencións establecidas pola Dirección Xeral de Protección Civil.

j) A xestión dos programas e accións de formación e divulgación financiados con cargo aos fondos da Unión Europea transferidos aos orzamentos de Comunidade Autónoma de Galicia destinados a programas e accións en materia de protección civil.

k) As demais funcións que, incluídas no ámbito respectivo, lle sexan asignadas.

2. Para o cumprimento das súas funcións, a Subdirección Xeral de Calidade e Información contará coa seguinte unidade administrativa:

2.1. Servizo de Apoio á Protección Civil.

Este servizo desempeñará, entre outras, as seguintes funcións:

a) A promoción das asociacións e agrupacións de voluntarios de protección civil e o correspondente apoio técnico e económico.

b) O control e xestión dos rexistros relacionados coas agrupacións, asociacións e entidades colaboradoras de protección civil regulamentariamente establecidos.

c) A promoción e coordinación dos cursos, xornadas e seminarios en materia de protección civil en colaboración coa Academia Galega de Seguridade Pública, con suxeición a estándares de calidade.

d) O fomento da autoprotección cidadá e corporativa, a través da programación de campañas divulgativas.

e) A coordinación e, se é o caso, execución de publicacións relacionadas coa protección civil e emerxencias; a execución e a elaboración da información relativa á protección civil da dirección xeral.

f) A planificación e coordinación dos plans e programas dos servizos contra incendios e salvamento local, sen prexuízo das competencias atribuídas por lei ás administracións locais, así como de calquera outra figura de colaboración entre administracións que se cree para a xestión de emerxencias na Comunidade Autónoma.

g) Elaboración e seguimento dos convenios realizados en materia de protección civil e emerxencias.

h) A xestión das subvencións e axudas establecidas pola Dirección Xeral de Protección Civil.

i) As demais funcións que, incluídas no ámbito respectivo, lle sexan asignadas.

Cinco. A sección sétima, artigos 39 a 42 queda coa seguinte redacción

Da Dirección Xeral de Administración Local

Artigo 39º.-Competencias.

A Dirección Xeral de Administración Local é o órgano encargado da xestión das competencias que se lle atribúen á Comunidade Autónoma galega nas seguintes materias:

a) Relación coas corporacións locais.

b) Formulación e xestión dos programas formativos en materia de Administración local.

c) Fomento das liñas de colaboración coas entidades locais galegas, no referente á convocatoria e execución de liñas de subvención destinadas a elas.

d) Execución das competencias que respecto aos funcionarios con habilitación de carácter estatal lle correspondan á Comunidade Autónoma de Galicia.

e) Formulación, impulso e xestión de programas con financiamento da Unión Europea e de cooperación transfronteiriza con incidencia no mundo local e no ámbito das competencias da Consellería da Presidencia, Administracións Públicas e Xustiza, facendo especial fincapé nas accións enmarcadas no ámbito da cooperación Galicia-Norte de Portugal.

f) Desenvolvemento da Lei de Administración local de Galicia e demais normativa de réxime local, e o exercicio das competencias que nesa materia lle correspondan á Comunidade Autónoma de Galicia.

g) Impulso do proceso de incorporación do galego á Administración local, en colaboración coa Secretaría Xeral de Política Lingüística.

h) Fomento e impulso da incorporación das novas tecnoloxías e de métodos de calidade nas administracións locais galegas.

i) A tramitación dos expedientes de declaración de urxente ocupación nas expropiacións forzosas.

j) O Rexistro de Entidades Locais de Galicia. Tramitación dos expedientes de alteración de termos municipais, creación, modificación e disolución de entidades locais.

k) Aqueloutras competencias que, non estando recollidas nas letras anteriores, veñan atribuídas a ela pola normativa vixente.

l) As demais funcións que, incluídas no ámbito respectivo, lle sexan asignadas.

Artigo 40º.-Estrutura.

A Dirección Xeral de Administración Local, para o exercicio das súas funcións e competencias, estrutúrase nas seguintes unidades administrativas:

1. Subdirección Xeral de Xestión e Cooperación Económica coas Entidades Locais.

2. Subdirección Xeral de Relacións Xurídico-Administrativas coas Entidades Locais e Desenvolvemento Normativo.

Artigo 41º.-Funcións e estrutura da Subdirección Xeral de Xestión e Cooperación Económica coas Entidades Locais.

1. A Subdirección Xeral de Xestión e Cooperación Económica coas Entidades Locais exercerá as seguintes funcións:

a) A proposición e xestión de programas conxuntos coas corporacións locais.

b) A realización das propostas de convocatoria, selección e adxudicación das axudas e subvencións, e de convenios, no ámbito das súas competencias.

c) O fomento da normalización lingüística na Administración local en colaboración coa Secretaría Xeral de Política Lingüística.

d) A preparación de estudos e anteproxectos de disposicións xerais nas materias atribuídas a esta unidade.

e) A elaboración do anteproxecto do orzamento correspondente á Dirección Xeral de Administración Local, así como o seguimento, avaliación e control dos seus programas de gasto.

f) A xestión económica e orzamentaria da dirección xeral.

g) A execución, seguimento e control dos programas europeos e de cooperación transfronteiriza en que participe a Dirección Xeral de Administración Local, así como a elaboración de propostas de actuación neste sentido.

h) O impulso na implantación das novas tecnoloxías na Administración local.

i) O fomento e impulso de programas e métodos de implantación da calidade nas administracións locais galegas.

j) A elaboración das correspondentes propostas, a través da Comisión de Heráldica, de escudos e bandeiras das entidades locais galegas.

k) A formulación, impulso e xestión das accións formativas para funcionarios e persoal de Administración local.

m) As demais funcións que, incluídas no ámbito respectivo, lle sexan asignadas.

2. Para cumprir as súas funcións, contará coas seguintes unidades:

2.1. Servizo de Xestión e Cooperación Económica, ao cal lle corresponde:

a) A xestión, tramitación e realización das propostas que procedan en canto ás convocatorias, selección e adxudicación das subvencións e axudas que se destinan ás entidades locais galegas, facendo un seguimento da súa xustificación.

b) O estudo do anteproxecto de orzamento correspondente á dirección xeral, así como o seguimento, avaliación e control dos seus programas de gasto.

c) A xestión económica e orzamentaria da dirección xeral.

d) O impulso e a execución de convenios asinados en materia de Administración local.

e) As demais funcións que, incluídas no ámbito respectivo, lle sexan asignadas.

2.2. Servizo de Cooperación coas Entidades Locais, ao cal lle corresponden:

a) As competencias atribuídas á consellería en materia de heráldica das entidades locais galegas.

b) A coordinación das accións encamiñadas á implantación e desenvolvemento das novas tecnoloxías nos entes locais, así como a tramitación das subvencións destinadas para tal fin.

c) A execución, seguimento e control dos programas europeos e de cooperación transfronteiriza en que participe a Dirección Xeral de Administración Local, así como a elaboración de propostas de actuación e implantación de liñas de acción neste sentido.

d) A formulación, impulso e xestión das accións formativas para funcionarios e persoal de Administración local.

e) As demais funcións que, incluídas no ámbito respectivo, lle sexan asignadas.

Artigo 42º.-Funcións e estrutura da Subdirección Xeral de Relacións Xurídico-Administrativas coas Entidades Locais e Desenvolvemento Normativo.

1. A Subdirección Xeral de Relacións Xurídico-Administrativas coas Entidades Locais e Desenvolvemento Normativo exercerá as seguintes funcións:

a) A execución das directrices da dirección xeral naquelas materias relativas ás relacións coas entidades locais de Galicia, así como con outras administracións autonómicas e coa estatal.

b) A execución das directrices da dirección xeral naquelas materias relacionadas coa organización, bens, servizos, persoal e réxime xurídico das corporacións locais que lle correspondan á Comunidade Autónoma de acordo co Estatuto de autonomía de Galicia, sen prexuízo das competencias que nestas materias poidan ser atribuídas a outras consellerías.

c) A elaboración de estudos, informes e proxectos de disposicións xerais nas materias atribuídas á dirección xeral.

d) A execución das competencias que en materia de réxime xurídico lle correspondan á dirección xeral.

e) A execución das competencias que en materia de funcionarios con habilitación de carácter estatal lle corresponden á Comunidade Autónoma.

f) A xestión do Rexistro de Entidades Locais de Galicia.

g) A elaboración de propostas e a xestión dos expedientes en materia de alteración de termos municipais.

h) A tramitación dos expedientes de creación, modificación, disolución das entidades locais non territoriais, prestándolles a colaboración e o asesoramento necesarios.

i) As demais funcións que, incluídas no ámbito respectivo, lle sexan asignadas.

2. Para cumprir estas funcións, contará coa seguinte unidade administrativa:

2.1 Servizo de Réxime Xurídico e Xestión de Funcionarios con Habilitación de Carácter Estatal, ao cal lle corresponde:

a) A execución das competencias que en materia de control de legalidade dos actos e acordos das corporacións locais lle veñen atribuídas á Comunidade autónoma de Galicia.

b) O impulso, mediante a elaboración das correspondentes propostas, do desenvolvemento normativo atribuído á Comunidade autónoma de Galicia en materia de réxime local.

c) A xestión do Rexistro de Entidades Locais de Galicia.

d) A distribución do papel numerado para as actas das distintas corporacións locais.

e) A tramitación dos expedientes de declaración de urxente ocupación en materia de expropiación forzosa.

f) Elaboración das convocatorias dos procesos selectivos de funcionarios con habilitación de carácter estatal.

g) Provisión de postos con carácter non definitivo e exercicio das competencias que lle corresponden á Comunidade Autónoma respecto dos concursos de traslados e libre designación de habilitados estatais.

h) Creación, clasificación e supresión de postos reservados a funcionarios con habilitación estatal, constitución e disolución de agrupacións de entidades locais para o sostemento dos ditos postos, exencións.

i) Dirección e xestión do rexistro autonómico de funcionarios con habilitación estatal, coordinación e integración co rexistro estatal dos ditos funcionarios.

j) As demais funcións que, incluídas no ámbito respectivo, lle sexan asignadas.

Seis. O artigo 45.1.6 parágrafo primeiro queda redactado do seguinte xeito:

1.6. Dependendo da Delegación Provincial da Coruña, existirá un Servizo de Obras e Mantemento e, dependendo da Delegación Provincial de Pontevedra un Servizo de Obras e Mantemento en Pontevedra e un xefe de coordinación administrativa en Vigo.

Disposición adicional

Cando, como consecuencia da estrutura orgánica que se establece neste decreto, se modifique a denominación ou o contido das unidades administrativas existentes con anterioridade ou se suprima algunha delas, autorízase o conselleiro de Presidencia, Administracións Públicas e Xustiza para readscribir o persoal afectado a postos do mesmo nivel ou inferior, sempre que sexan postos de libre designación, sendo de aplicación o establecido no artigo 65.4º do Decreto lexislativo 1/2008, do 13 marzo, polo que se aproba o texto refundido da Lei da función pública de Galicia.

Disposicións derradeiras

Primeira.-Facúltase a persoa titular da Consellería de Presidencia, Administracións Públicas e Xustiza para ditar as disposicións necesarias para a execución e desenvolvemento do establecido neste decreto.

Segunda.-Este decreto entrará en vigor o día seguinte ao da súa publicación no Diario Oficial de Galicia.

Santiago de Compostela, trinta de decembro de dous mil oito.

Emilio Pérez Touriño

Presidente

José Luis Méndez Romeu

Conselleiro de Presidencia, Administracións Públicas e Xustiza