Mediante a Orde do 3 de marzo de 2008 (DOG nº 49, do 10 de marzo), a Consellería do Medio Rural establece as bases reguladoras para a concesión de subvencións para fomentar a produción de produtos agroalimentarios de calidade de orixe animal de acordo co establecido no artigo 10 do Real decreto 1615/2007, do 7 de decembro, polo que se establecen as bases reguladoras para a concesión de subvencións para fomentar a produción de produtos agroalimentarios de calidade de orixe animal (BOE nº 304, do 20 de decembro). Posteriormente, a Orde do 2 de maio de 2008 ampliou o prazo de presentación de solicitudes (BOE nº 88, do 8 de maio).
No seu artigo 19, indícase que o financiamento das axudas previstas nesta orde farase con cargo aos orzamentos da Consellería do Medio Rural para o ano 2008, na aplicación orzamentaria 11.03.713D.781.0, cunha dotación de 100.953 , e con fondos transferidos polo Ministerio de Agricultura Pesca e Alimentación, de acordo co previsto no Real decreto 1615/2007, do 7 de decembro.
Unha vez recibidos os ditos fondos, considérase oportuno ampliar o importe da dotación orzamentaria consignada inicialmente para a concesión das mencionadas axudas.
No artigo 10.5º establécese: «A resolución de concesión indicará os gastos considerados como subvencionables, así como as condicións xerais e particulares que se consideren necesarias para garantir o cumprimento dos obxectivos da axuda. Especificamente indicará o prazo máximo para a realización e xustificación dos gastos efectuados, que será, polo menos, posterior en quince días á finalización da súa execución, segundo o calendario presentado e, en calquera caso, anterior á data límite do 15 de decembro do ano en curso».
Diversas dificultades de carácter técnico, relacionadas co atraso da transferencia de fondos do ministerio que financian estas axudas provocaron que a fase de instrución se prolongase máis alá das datas inicialmente previstas, o que afectou tanto os prazos de resolución das solicitudes como os de xustificación das axudas concedidas, estando na actualidade na fase previa a resolución, por tal motivo cómpre ampliar o prazo de xustificación das axudas.
En consecuencia, de acordo co disposto no artigo 30.I.3º do Estatuto de autonomía de Galicia, e no uso das facultades que me confire a Lei 9/2007, do 13 de xuño, de subvencións de Galicia,
DISPOÑO:
Artigo 1º
Modifícase o artigo 10.5º da Orde do 3 de marzo de 2008 pola que se establecen as bases reguladoras para a concesión de subvencións para fomentar a produción de produtos agroalimentarios de calidade de orixe animal, e convócanse para o ano 2008, que queda redactado do seguinte xeito:
«Artigo 10.5º
5. A resolución de concesión indicará os gastos considerados como subvencionables, así como as condicións xerais e particulares que se consideren necesarias para garantir o cumprimento dos obxectivos da axuda. Especificamente, indicará o prazo máximo para a realización e xustificación dos gastos efectuados, que será anterior á data límite do 30 de decembro do ano en curso».
Artigo 2º
1. Amplíase a dotación orzamentaria que se establece no artigo 19 da Orde do 3 de marzo (DOG nº 49, do 10 de marzo de 2008) pola que se establecen as bases e se convoca para 2008 a concesión de subvencións para fomentar a produción de produtos agroalimentarios de calidade de orixe animal.
2. O incremento da dotación será con fondos recibidos do Ministerio de Medio Ambiente e Medio Rural e Mariño, con cargo á aplicación orzamentaria 11.03.741A.771.0 por un importe de 483.114,07 euros.
3. En todo caso, a concesión das axudas reguladas na mencionada orde estará limitada ás dispoñibilidades orzamentarias.
Disposición adicional
Única.-A modificación do prazo de presentación das xustificacións e ampliación do crédito prevista no artigo 2 desta orde non afecta ao prazo de presentación de solicitudes establecido na mencionada Orde do 3 de marzo de 2007, ampliado pola Orde do 2 de maio de 2008 (DOG nº 88, do 8 de maio).
Disposición derradeira
Única.-Entrada en vigor.
Esta orde entrará en vigor o día seguinte ao da súa publicación no Diario Oficial de Galicia.
Santiago de Compostela, 22 de decembro de 2008.
Alfredo Suárez Canal
Conselleiro do Medio Rural