O Consorcio As Mariñas tramitou a modificación dos seus estatutos co gallo de adaptalos á sentenza nº 633/2004 ditada o día 21 de xullo de 2004 polo Tribunal Superior de Xustiza de Galicia, no recurso contencioso-administrativo interposto polo Colexio Oficial de Funcionarios de Administración Local con habilitación de carácter nacional. En cumprimento do disposto no citado precepto, o presidente da devandita entidade supramunicipal remitiulle á Consellería de Presidencia, Administracións Públicas e Xustiza a documentación relativa á súa modificación.
A modificación dos estatutos dun consorcio local segue as mesmas regras e procedemento previsto no artigo 143 da Lei 5/1997, do 22 de xullo, de Administración local de Galicia, ao que remite o artigo 151 da mesma norma.
Examinado o expediente, considérase que a tramitación da modificación estatutaria acatou o procedemento legalmente previsto para tal fin que, en síntese, foi a que segue:
-O Pleno do Consorcio acorda iniciar o procedemento de modificación dos seus estatutos en sesión ordinaria que tivo lugar o 27 de setembro de 2004.
-O referido acordo someteuse a información pública durante o prazo dun mes e simultaneamente remitiuselles á Deputación Provincial da Coruña e á Consellería de Presidencia, Administracións Públicas e Xustiza, para a emisión de informe no devandito prazo.
-Consta certificado da secretaria do consorcio de non presentación de alegacións no dito período.
-Con data do 3 de decembro de 2004 a Dirección Xeral de Administración Local emitiu informe ao respecto.
-Pola súa banda, a Deputación Provincial da Coruña emitiu informe favorable da dita modificación en sesión plenaria que tivo lugar o 25 de novembro de 2004.
-O Pleno de todos os concellos consorciados aprobou por maioría absoluta do número legal de membros de cada corporación a modificación dos estatutos.
O presidente do Consorcio remitiulle á Consellería de Presidencia, Administracións Públicas e Xustiza unha copia certificada dos acordos de modificación dos estatutos.
En atención ao exposto e de conformidade co previsto no artigo 143.1ºd) da Lei 5/1997, do 22 de xullo, de Administración local de Galicia e demais normativa de aplicación,
DISPOÑO:
Artigo único.-Publicar a modificación dos estatutos do Consorcio As Mariñas. O texto é o que se recolle no anexo desta orde.
Santiago de Compostela, 10 de decembro de 2008.
José Luis Méndez Romeu
Conselleiro de Presidencia, Administracións Públicas e Xustiza
ANEXO
Artigo 14º.-Persoal ao servizo do Consorcio.
O persoal ao servizo do Consorcio estará constituído:
a) Secretario, interventor e tesoureiro.
b) Xerente.
c) Persoal laboral
d) De ser o caso, persoal eventual.
O persoal poderá ser propio ou adscrito agás o descrito na alínea a) anterior, que será nomeado conforme o artigo seguinte.
Artigo 15º.-Secretario, interventor e tesoureiro.
Os ditos cargos crearanse e clasificaranse como propios e independentes, de conformidade co establecido pola normativa específica de funcionarios con habilitación nacional.