A orde da Consellería do Medio Rural do 19 de agosto de 2008 (DOG nº 163, do 25 de agosto) establece as bases e convoca para 2008 as axudas á utilización de servizos de aconsellamento por persoas titulares de explotacións agrarias.

No seu artigo 16.1º, detállase a aplicación orzamentaria e o importe económico previsto para o financiamento das ditas axudas e sinálase que as dotacións iniciais se poderán incrementar, se fose procedente, con fondos propios, do Estado ou comunitarios.

Coa finalidade de poder amparar o maior número posible das solicitudes de axudas á utilización de servizos de aconsellamento por persoas titulares de explotacións agrarias, no marco das axudas ao desenvolvemento rural en Galicia, e posto que a dotación inicial resulta insuficiente, aprobáronse os correspondentes expedientes de xeración e ampliación de crédito, polo que cómpre, mediante esta orde, ampliar a dotación orzamentaria consignada inicialmente para a concesión das mencionadas axudas.

En consecuencia, de acordo co disposto no artigo 30.I.3 do Estatuto de autonomía de Galicia e facendo uso das facultades que me confiren o artigo 14 da Lei 9/2007, do 13 de xuño, de subvencións de Galicia, así como en uso das competencias que me confire a Lei 1/1983, do 22 de febreiro, de normas reguladoras da Xunta e da súa Presidencia,

DISPOÑO:

Artigo único.

A dotación orzamentaria prevista para as axudas á utilización de servizos de aconsellamento por persoas titulares de explotacións agrarias convocadas para o ano 2008 na Orde do 19 de agosto de 2008 (DOG nº 163, do 25 de agosto) amplíase con fondos con cargo ás dispoñibilidades orzamentarias existentes na aplicación 11.02.712B.772.4 a cinco millóns de euros (5.000.000 €), dos que para o ano 2008 corresponden cincocentos mil euros (500.000 €), e para o ano 2009 catro millóns cincocentos mil euros (4.500.000 €), dotación que poderá ser incrementada con fondos comunitarios, do Estado, ou da comunidade autónoma.

En todo caso, a concesión das axudas reguladas na dita orde estará limitada ás dispoñibilidades orzamentarias.

Disposición adicional

Única.-A ampliación e o reaxuste das anualidades previstas no artigo único desta orde non afecta o prazo de presentación de solicitudes establecido na Orde do 19 de agosto de 2008.

Disposición derradeira

Esta orden entrará en vigor o mesmo día da súa publicación no Diario Oficial de Galicia.

Santiago de Compostela, 16 de decembro de 2008.

Alfredo Suárez Canal

Conselleiro do Medio Rural