A Orde do 31 de xaneiro de 2008 (DOG nº 23, do 1 de febreiro) coas súas correccións de erros publicadas no DOG nº 32, do 14 de febreiro e no DOG nº 79 do 24 de abril, e a súa modificación publicada no DOG nº 74, do 17 de abril, establece a regulación da aplicación dos pagamentos directos á agricultura e á gandaría e da indemnización compensatoria, e convoca as axudas previstas no contrato de explotación sustentable, no ano 2008. O Regulamento (CE) nº 146/2008, do Consello, do 14 de febreiro de 2008, modifica tanto o Regulamento (CE) nº 1782/2003, polo que se establecen disposicións comúns aplicables aos réximes de axuda directa no marco da política agrícola común e se instauran determinados réximes de axuda aos agricultores, como o Regulamento (CE) nº 1698/2005, relativo á axuda ao desenvolvemento rural a través do Fondo Europeo Agrícola de Desenvolvemento Rural (Feader).
Na súa disposición adicional primeira, parágrafo 1, precísanse as aplicacións orzamentarias e o importe económico previsto para o financiamento das ditas axudas, e no seu parágrafo 3 sinálase que as dotacións iniciais se poderán incrementar, se for procedente, tramitando o expediente de modificación de crédito oportuno.
Coa finalidade de poder amparar todas as solicitudes de indemnización compensatoria financiadas polo Feader e as solicitudes das axudas directas no marco da aplicación da política agraria común en Galicia financiadas polo Fondo Europeo Agrario de Garantía e xestionadas polo Fondo Galego de Garantía Agraria, e posto que a dotación inicial resulta insuficiente, aprobouse o correspondente expediente de modificación de crédito, polo que cómpre, mediante esta orde, incrementar a dotación orzamentaria consignada inicialmente para a concesión das mencionadas axudas.
Tamén o elevado número de solicitantes de axudas agroambientais dentro do marco do CES, e o feito de que se trata dunha axuda destinada ao fomento da utilización de sistemas de produción agraria sustentable e que o Programa de desenvolvemento rural de Galicia prevé un volume de 144.446.206 para todo o período 2007-2013, enténdese que é preciso incrementar o límite orzamentario das axudas agroambientais con cargo ao ano 2009.
A Orde do 25 de xaneiro de 2008 pola que se establecen as bases reguladoras da concesión das axudas para o fomento dos sistemas de producións agrarias sustentables a través da implantación do contrato de explotación sustentable recolle que poderán acollerse ao contrato de explotación sustentable os titulares de explotacións agrarias que se comprometan a cumprir nun período mínimo de cinco anos os requisitos de carácter xeral e os compromisos específicos que se regulan nesta orde. Polo tanto, as medidas agroambientais son unhas axudas con compromisos plurianuais, nas que o beneficiario fai unha solicitude inicial ao comezo do período e solicitudes de pagamento nos anos posteriores ata acadar os cinco anos de compromiso.
A coincidencia do comezo do novo programa 2007-2013 nas axudas agroambientais cos antigos compromisarios destas axudas dificultou unha previsión axeitada dos orzamentos precisos que, tras a tramitación das solicitudes deste ano, se mostran claramente insuficientes.
En consecuencia, de acordo co disposto no artigo 30.I.3 do EAG e facendo uso das facultades que me confire a Lei 9/2007, do 13 de xuño, de subvencións de Galicia, así como a Lei 1/1983, do 22 de febreiro, reguladora da Xunta e da súa Presidencia, e no Decreto 562/2005, do 1 de decembro,
DISPOÑO :
Artigo único.-A Orde do 31 de xaneiro de 2008 pola que se regula a aplicación dos pagamentos directos á agricultura e á gandaría e da indemnización compensatoria, e se convocan as axudas previstas no contrato de explotación sustentable, no ano 2008, publicada no DOG nº 23, do 1 de febreiro, coa súa corrección de erros publicada no DOG nº 32, do 14 de febreiro, e a súa modificación, publicada no DOG nº 74, do 17 de abril, queda modificada do seguinte xeito:
Un.-O punto 1 do artigo 81 queda redactado do seguinte xeito:
Este capítulo ten por obxecto establecer a convocatoria plurianual, en réxime de concorrencia competitiva, para as solicitudes presentadas no ano 2008, das axudas para o fomento dos sistemas de produción agraria sustentables a través da implantación do contrato de explotación sustentable (CES), de acordo coas bases reguladoras previstas na Orde do 25 de xaneiro de 2008, e coas regras contidas neste título, así como o establecido no capítulo I do título I desta orde, en canto ás disposicións xerais das solicitudes. No caso de solicitar a ampliación dos compromisos en convocatorias futuras, a súa aprobación farase segundo o réxime de concorrencia competitiva dependendo da dotación orzamentaria dispoñible e limitaranse ao tempo restante do período de compromisos establecido na súa solicitude inicial e cumprindo o artigo 18 da Orde do 25 de xaneiro de 2008.
Dous.-A dotación orzamentaria prevista para as axudas especificadas nos capítulos II a V do título II da Orde do 31 de xaneiro de 2008 (DOG nº 23, do 1 de febreiro), conforme a disposición adicional primeira, parágrafo 1, alínea a) da dita orde, increméntase no importe de 94.056.678,04 euros, con cargo á aplicación 11.90.713F.779.1, primas gandeiras, dos orzamentos da Comunidade Autónoma de Galicia para 2008.
Tres.-Procédese á ampliación e ao reaxuste das anualidades das aplicacións orzamentarias 11.02.712B.772.1 e 11.03.713C.770.4, sinaladas no segundo parágrafo do punto 1.b) da disposición adicional, e queda redactado do seguinte xeito:
-11.02.712B.772.1, indemnización compensatoria, por importe de 13.500.005 .
-11.02.712B.772.1, para as axudas previstas na medidas agroambientais, por importe de 5.902.591 no ano 2008; para o ano 2009, 10.200.000 ; para o ano 2010, 15.000.000 ; para o ano 2011, 15.000.000 ; para o ano 2012, 15.000.000 ; e para o 2013, 15.000.000 . A dita aplicación orzamentaria poderá incrementarse con fondos adicionais, comunitarios, estatais e da comunidade autónoma.
-11.03.713C.770.4, para as axudas ao benestar animal, por importe de 500.000 no ano 2008; para o ano 2009, 25.000 ; para o ano 2010, 25.000 ; para o ano 2011, 25.000 ; e para o ano 2012, 25.000 ; A dita aplicación orzamentaria poderá incrementarse con fondos adicionais, comunitarios, estatais e da comunidade autónoma.
Disposicións adicionais
Primeira.-En todo caso, a concesión das axudas reguladas na dita orde estará limitada ás dispoñibilidades orzamentarias.
Segunda.-As ampliacións e o reaxuste de anualidades previstas no artigo único desta orde non afecta o prazo de presentación de solicitudes establecido na Orde do 31 de xaneiro de 2008.
Disposición derradeira
Esta orde entrará en vigor o mesmo día da súa publicación no Diario Oficial de Galicia.
Santiago de Compostela, 16 de decembro de 2008.
Alfredo Suárez Canal
Conselleiro do Medio Rural