No Diario Oficial de Galicia nº 117, do 12 de setembro de 2008 publicouse a Orde do 8 de setembro de 2008, pola que se establecen as bases reguladoras e se convocan as axudas destinadas ás explotacións gandeiras, ás industrias agroalimentarias e establecementos de xestión de subprodutos para a mellora da capacidade técnica de xestión de subprodutos de orixe animal non destinados a consumo humano.

No parágrafo primeiro do artigo 23 da dita orde establécese que «Unha vez realizados os investimentos os beneficiarios deberán comunicar a finalización da execución dos investimentos antes do día 1 de decembro».

Debido a diversas dificultades de carácter organizativo e técnico, así como o atraso na aprobación polo Consello de Ministros dos fondos comprometidos con que se podería ampliar a dotación orzamentaria da orde, cómpre ampliar o prazo de presentación da documentación de xustificación dos investimentos.

En consecuencia, de acordo co previsto no artigo 30.1º.3 do Estatuto de Autonomía de Galicia, e en uso das facultades que me confiren os artigos 7 e 14 da Lei 9/2007, do 13 de xuño, de subvencións de Galicia, así como as competencias que me confire a Lei de réxime financeiro e orzamentario de Galicia e a Lei 1/1983, reguladora da Xunta e da súa Presidencia,

DISPOÑO:

Artigo único.-Modifícase o parágrafo primeiro do artigo 23 da Orde do 8 de setembro de 2008 ( DOG nº 177, do 12 de setembro), pola que se establecen as bases reguladoras e se convocan as axudas para as explotacións gandeiras, as industrias agroalimentarias e establecementos de xestión de subprodutos para a mellora da capacidade técnica de xestión de subprodutos de orixe animal non destinados a consumo humano, que queda redactado como segue:

«Unha vez realizados os investimentos previstos, os interesados deberán comunicar a finalización da execución do investimento antes do 31 de decembro de 2008, por escrito, preferentemente nas delegacións provinciais da Consellería do Medio Rural ou nas oficinas agrarias comarcais. A xustificación da realización da actividade subvencionada, do cumprimento das condicións impostas e da consecución dos obxectivos previstos no acto de concesión da subvención documentarase mediante conta xustificativa do gasto realizado, consistente nunha relación documentada que acredite os gastos realizados e os seus correspondentes pagamentos».

Disposición derradeira

Esta orden entrará en vigor o día seguinte ao da súa publicación no Diario Oficial de Galicia.

Santiago de Compostela, 24 de novembro de 2008.

Alfredo Suárez Canal

Conselleiro do Medio Rural