A Orde do 22 de agosto de 2008 (DOG nº 170, do 3 de setembro) regula a concesión de subvencións ás entidades locais da Comunidade Autónoma de Galicia para o mantemento de puntos de atención continuada e zonas especiais de urxencias que funcionen en centros de saúde de titularidade municipal.
O artigo 8 da mencionada orde regula a xustificación e aboamento destas subvencións, determinando un prazo para a xustificación do gasto realizado que está previsto que finalice o día 30 de novembro.
O mesmo artigo establece que tal prazo poderá ser modificado por causas debidamente xustificadas, mediante resolución do director xeral da División de Recursos Económicos do Servizo Galego de Saúde.
A demora involuntaria na publicación da orde e a imposibilidade de reducir os trámites relativos á valoración de solicitudes imposibilitaron que nesta data se concedesen as subvencións, o que afectou o prazo de xustificación previsto na orde citada inicialmente.
Debido a que este prazo se considera moi axustado e, tendo en conta a trascendencia da documentación que hai que presentar, e co obxecto de garantir mellor o dereito dos beneficiarios, facendo uso das facultades de modificación recoñecida no artigo 8 da Orde do 22 de agosto de 2008, esta división
RESOLVE:
Ampliar o prazo de xustificación do gasto realizado previsto no artigo 8 da Orde do 22 de agosto de 2008 ata o día 15 de decembro de 2008.
Santiago de Compostela, 18 de novembro de 2008.
Francisco Pais López
Director xeral da División de Recursos Económicos