A Orde do 6 de marzo de 2003 sobre delegación de competencias no secretario xeral e noutros órganos da Consellería de Política Territorial, Obras Públicas e Vivenda recolle de forma integradora o conxunto de delegacións de competencias por parte da titular da consellería.
A actividade administrativa da Consellería de Política Territorial, Obras Públicas e Transportes leva consigo unha concentración de funcións arredor da súa titular que aconsella, dado o seu volume, recorrer á delegación de competencias en órganos inmediatamente dependentes da conselleira, sen esquecer o debido respecto dos principios que informan a actividade administrativa e que a nosa Constitución recolle no seu artigo 103.1º.
A delegación de competencias permite a axilización administrativa necesaria que redunda en beneficio, tanto da Administración coma dos administrados, dentro do máis rigoroso respecto das garantías xurídicas que a tutela dos intereses públicos exixe.
O elevado volume de funcións e competencias concentradas na titular da consellería aconsellan adaptar a delegación de competencias, conseguindo, así, fomentar a eficacia na prestación dos servizos públicos e a mellora na súa xestión.
Na súa virtude, facendo uso da facultades que me confiren os artigos 43.3º da Lei 1/1983, do 22 de febreiro, reguladora da Xunta e da súa Presidencia, e 13 da Lei 30/1992, do 26 de novembro, de réxime xurídico das administracións públicas e do procedemento administrativo común.
DISPOÑO:
Primeiro.-Modificar o punto noveno, número 3 da Orde do 6 de marzo de 2003 sobre delegación de competencias no secretario xeral e noutros órganos da Consellería de Política Territorial, Obras Públicas e Vivenda, que quedará redactado como segue:
3. Delégase no presidente do Consello de Administración do ente público Portos de Galicia o exercicio das seguintes facultades:
O exercicio da facultade de aprobar os plans de utilización dos espazos portuarios dos portos de competencia da Comunidade Autónoma de Galicia.
A competencia atribuída á conselleira para a imposición das sancións en materia de portos nos casos de infraccións graves previstas no artigo 39.1º c) do Decreto 227/1995, do 20 de xullo, polo que se aproba o Regulamento do ente público Portos de Galicia, ditado en aplicación e desenvolvemento da Lei 5/1994, do 29 de novembro.
Segundo.-Entrada en vigor.
Esta orde entrará en vigor o día seguinte ao da súa publicación no Diario Oficial de Galicia.
Santiago de Compostela, 22 de outubro de 2008.
María José Caride Estévez
Conselleira de Política Territorial, Obras Públicas
e Transportes