Advertidos erros na devandita Orde do 19 de agosto de 2008, publicada no Diario Oficial de Galicia nº 163, do 25 de agosto de 2008, cómpre facer as oportunas correccións:
-Na páxina 16.018, no artigo 3º, número 3, onde di: « no artigo 3 do Decreto 237/2007 »; debe dicir: « no artigo 3 do Decreto 235/2007 ».
-Na páxina 16.018, no artigo 3º, número 6, onde di: «A axuda resultante da aplicación dos puntos 4 e 5 poderá incrementarse nas seguintes porcentaxes:
a) Ata nun 50% no caso de que a persoa solicitante teña aprobado o contrato de explotación sustentable (CES) de acordo coa Orde do 25 de xaneiro de 2008.
b) Se a persoa solicitante está incluída nalgún ou varios dos seguintes programas, a axuda incrementarase acumulativamente nas porcentaxes indicadas:»; debe dicir: «A axuda resultante da aplicación dos puntos 4 e 5 poderá incrementarse nas seguintes porcentaxes:
a) Ata nun 50% no caso de que a persoa solicitante teña aprobado o contrato de explotación sustentable (CES) de acordo coa orde reguladora deste. Neste caso o incremento virá condicionado a que a dita aprobación sexa anterior á data de certificación das axudas a que fai referencia esta orde.
b) Se a persoa solicitante non cumpre o punto anterior, e está incluída nalgún ou varios dos seguintes programas, a axuda incrementarase acumulativamente, e ata un total do 50% como máximo, nas porcentaxes indicadas:...».
-Na páxina 16.018, no artigo 3º, número 6, o punto i) debe quedar redactado como se cita a continuación: «i) Un 15% no caso dun programa de reprodución, incluído nos programas de xestión zootécnica, ou nun programa de xestión técnica agronómica de produción e sanidade vexetal recoñecidos segundo o artigo 5 letra c do Decreto 235/2007, así como no caso de estar incluído nunha agrupación de agricultores para tratamentos integrados (Atrias)».
-Na páxina 16.019, no artigo 3º, número 7, onde di: « 1.500 euros por beneficiario e servizo »; debe dicir: « 1.500 euros por beneficiario e servizo de asesoramento completo ».
-Na páxina 16.019, no artigo 3º, engadirase o seguinte número:
«9. Para os efectos desta orde enténdese como:
-Servizo de aconsellamento completo o conxunto de actuacións levadas a cabo nunha explotación agraria por unha entidade de aconsellamento inscrita no Rexistro de Entidades con Servizos de Aconsellamento ou Xestión de Galicia (Resaxega), durante o período comprendido entre a data de presentación da solicitude, sempre e cando se ditase resolución aprobatoria da axuda sobre ese servizo, e os doce meses seguintes á data da súa aprobación. Estas actuacións incluirán as materias de obrigado cumprimento, indicadas no artigo 3º, número 2, e as indicadas no número 3 se así o solicitasen as persoas titulares de explotacións agrarias».
-Na páxina 16.019, no artigo 4º, letra c) onde di: « indicando o número de servizos previsto, horas por concepto e custo final»; debe dicir: « indicando o número de actuacións previstas no servizo, o obxecto da actuación, as unidades ou horas que lle corresponden, o seu valor e o custo final».
-Na páxina 16.019, no artigo 4º, engadirase a seguinte letra:
«e) No caso de que a persoa titular sexa unha entidade asociativa, para a xustificación do cumprimento do referido no artigo 5º, número 2, letras h) e i), deberase acreditar cunha certificación do seu presidente en que conste o nome das persoas socias, sexo e data de nacemento delas».
-Na páxina 16.019, no artigo 5º, número 3, onde di: «3. No caso de que a dispoñibilidade orzamentaria limite o número de persoas beneficiarias aprobaranse as axudas así ordenadas ata esgotar o orzamento. No caso de que se produza igualdade na puntuación priorizaranse as persoas titulares de explotacións de menor a maior renda e dentro destas, as explotacións que xeren un maior volume de emprego»; debe dicir: «No caso de que a dispoñibilidade orzamentaria limite o número de persoas beneficiarias aprobaranse as axudas primeiramente ás persoas titulares que cumpran o criterio a) deste número, seguidamente das persoas titulares que cumpran o criterio b), independentemente da puntuación que acaden. Se persiste a igualdade priorizaranse aquelas que cumprindo o criterio a) cumpren tamén o criterio b); atenderase a continuación á puntuación obtida por cada unha para establecer a orde de prioridade. O resto das solicitudes ordenaranse en función da puntuación exclusivamente, considerando que
de manterse a igualdade, terá preferencia a persoa titular que cumpra o criterio que achegue unha maior puntuación».
-Na páxina 16.020, no artigo 7º número 5, onde di:
«1.-Data e hora do servizo.
2.-Duración do servizo.
3.-Obxecto do servizo»; debe dicir:
«1.-Data e hora da actuación.
2.-Duración da actuación.
3.-Obxecto da actuación».
-Na páxina 16.023, na descrición do procedemento do impreso MR624A, onde di: «Axudas á utilización de servizos de aconsellamento por titulares de explotacións agrarias e forestais»; debe dicir: «Axudas á utilización de servizos de aconsellamento por titulares de explotacións agrarias».