De acordo co disposto pola Lei 31/1995, do 8 de novembro, de prevención de riscos laborais, no seu artigo 19, sobre a formación dos traballadores, podemos entender que a formación ten que estar planificada e programada para chegar aos traballadores desde o momento da súa contratación, e que debe ser impartida en función dos riscos e incluso da responsabilidade que estes teñan dentro da organización en que traballen.

Deste xeito, e dada a recente incorporación de persoal funcionario do grupo E, tras a superación dos correspondentes procesos selectivos convocados de conformidade co Decreto 65/2007, do 12 de abril, polo cal se aproba a oferta de emprego público correspondente a prazas de persoal funcionario e laboral da Administración da Comunidade Autónoma de Galicia para o ano 2007, faise necesario formalo co fin de que coñeza os riscos específicos do seu posto de traballo.

Polo tanto, convócase o persoal funcionario do corpo subalterno da Xunta de Galicia (grupo E) nomeado pola Orde do 21 de xullo de 2007 (DOG nº 144, do 28 de xullo de 2008), á realización obrigatoria do seguinte curso de formación inicial de prevención de riscos laborais:

-Día: 29 de setembro.

-Hora: de 10.00 a 12.00 horas.

-Lugar: salón de actos da EGAP.

Contido:

-A Lei de prevención de riscos laborais:

* A prevención de riscos laborais na Xunta de Galicia.

* Dereitos e obrigas (cap. III da Lei de prevención de riscos laborais).

-Riscos derivados dos lugares de traballo.

-Sinalización.

-Pantallas de visualización de datos.

-Tipos de manipulación de cargas: manipulación manual e manipulación mecánica.

-Actuación ante emerxencias.

Presentación de solicitudes:

a) Para participar no curso que se convoca nesta resolución, o persoal anteriormente citado deberá cubrir o formulario de matrícula en liña que pode atopar no portal web da EGAP no seguinte enderezo: http://egap.xunta.es/matricula.

b) Para cubrir correctamente o formulario de solicitude no citado enderezo da internet disporase de instrucións de axuda que deberán ser observadas en todo momento polas persoas solicitantes.

c) O formulario cuberto adecuadamente no enderezo da internet http://egap.xunta.es/matricula entenderase presentado na EGAP.

d) O prazo de presentación de solicitudes remata o 27 de setembro de 2008.

e) En caso de dúbida, dificultades técnicas ou necesidade de máis información á hora de presentar a solicitude, pode dirixirse á EGAP a través do enderezo de correo electrónico matricula.egap@xunta.es, que adoptará as medidas necesarias para facilitar a presentación de solicitudes.

Para máis información pode chamar aos teléfonos 981 54 62 41/881 99 70 14.

Aos asistentes entregaráselles un diploma acreditativo da súa asistencia ao curso.

Santiago de Compostela, 16 de setembro de 2008.

Carlos Suárez-Mira Rodríguez

Director da Escola Galega de Administración

Pública