A mellora do estado de saúde da poboación vén determinada en gran medida pola existencia de produtos vacinais de eficacia e efectividade demostrada, cuxo principal obxectivo é a prevención de determinadas enfermidades. A recente autorización de dúas vacinas fronte ao virus do papiloma humano permitirá reducir o risco de infección polo dito virus, así como de lesións precursoras e cancro de colo de útero.

Por este motivo, e tendo en conta os avances no coñecemento da situación epidemiolóxica dos axentes infecciosos obxecto de vacinación e a dispoñibilidade destas novas vacinas, faise necesaria a actualización do programa galego de vacinación, para o que se seguirán as recomendacións técnicas ao respecto e os acordos do Consello Interterritorial do Sistema Nacional de Saúde.

Neste sentido, o dito consello acordou recomendar a vacinación fronte ao virus do papiloma humano das rapazas nunha única cohorte, entre os 11 e 14 anos de idade, para introducila segundo os intereses de cada comunidade autónoma antes de finais de 2010.

De conformidade co Decreto 45/2006, do 23 de febreiro, polo que se establece a estrutura orgánica da Consellería de Sanidade e as súas competencias, é responsabilidade da Dirección Xeral de Saúde Pública o desenvolvemento e a xestión de programas de prevención de problemas de saúde con especial repercusión na Comunidade Autónoma de Galicia, segundo o seu artigo 11.3º h).

RESOLVO:

Primeiro.-Incluír a vacina fronte ao virus do papiloma humano en rapazas nadas a partir do 1 de xullo de 1994 segundo vaian cumprindo 14 anos de idade.

Segundo.-O programa de vacinación infantil comprenderá a prevención mediante inmunoprofilaxe activa de:

-Hepatite B.

-Poliomielite.

-Tétano.

-Difteria.

-Tose ferina.

-Sarampelo.

-Rubéola.

-Parotidite.

-Enfermidades invasoras causadas polo Haemophilus Influenzae do serotipo b.

-Enfermidades invasoras causadas por Neisseria meningitidis serogrupo C.

-Varicela.

-Virus do papiloma humano.

Terceiro.-As pautas de vacinación segundo as vacinas serán as seguintes:

Ver referencia pdf "18300D003P007.PDF"

Cuarto.-Esta resolución deixa sen efecto a Resolución do 3 de novembro de 2006, da Dirección Xeral de Saúde Pública, publicada no Diario Oficial de Galicia número 218, do 13 de novembro, e entrará en vigor o día 29 de setembro de 2008.

Santiago de Compostela, 12 de setembro de 2008.

Ramón Medina González-Redondo

Director xeral de Saúde Pública