O Consello de Dirección do Igape na súa xuntanza que tivo lugar o día 1 de febreiro de 2007 acordou por unanimidade dos membros asistentes a aprobación das bases reguladoras dos incentivos económicos do Igape, as cales se dividen en tres:

-Base reguladora dos incentivos a proxectos de investimento empresarial.

-Base reguladora das axudas a iniciativas xeradoras de coñecemento nas Pemes.

-Base reguladora das axudas a proxectos colaborativos de carácter empresarial.

E compleméntanse coas bases reguladoras da tramitación dos procedementos.

Mediante Resolución do 9 de marzo de 2007 procedeuse á publicación das ditas bases e á convocatoria de determinadas liñas de axuda e á publicación dos créditos asignados a cada unha delas (DOG nº 59, do 23 de marzo de 2007).

Mediante Resolución do 5 de novembro de 2007 procedeuse novamente á convocatoria de determinadas liñas de axuda e á publicación dos créditos correspondentes (DOG nº 220, do 14 de novembro de 2007), establecéndose no seu punto cuarto que os importes previstos inicialmente poderían ser ampliados en función das dispoñibilidades orzamentarias sen que iso dea lugar á apertura dun novo prazo de presentación de solicitudes, salvo indicación expresa en contrario na resolución que se publique para o efecto.

Tendo en conta o volume de solicitudes recibidas e tratando de dar resposta á ampla demanda de axuda, parece oportuno incrementar o importe aprobado para as axudas á presenza nun determinado evento expositivo internacional (procedemento IG110-artigo 6.1.1).

Na súa virtude, e de conformidade coas facultades que teño conferidas,

RESOLVO:

Primeiro.-Amplíase en 100.000 € o crédito para o exercicio 2008 para as axudas á presenza nun determinado evento expositivo internacional, ao abeiro da base reguladora para o fomento das iniciativas xeradoras de coñecemento nas Pemes galegas (procedemento IG110-artigo 6.1.1), con cargo á partida orzamentaria E3/10/01-651, resultando un total de crédito dispoñible de 300.000 € para o exercicio 2008.

Santiago de Compostela, 16 de setembro de 2008.

Álvaro Álvarez-Blázquez Fernández

Director xeral do Instituto Galego de Promoción

Económica