Dentro do programa de actividades que a Academia Galega de Seguridade Pública ten previsto realizar no ano 2008, e conforme as funcións atribuídas pola Lei 1/2007, do 15 de xaneiro, de creación da Academia Galega de Seguridade Pública, anúnciase a convocatoria de dous cursos de actualización de primeiros auxilios, que se desenvolverá conforme as seguintes bases:
Obxectivos.
Difundir as novas recomendacións en soporte vital básico. Mellorar o prognóstico da parada cardiorrespiratoria (PCR). Difundir as normas e técnicas de actuación na atención ao paciente dentro das principais situacións de urxencia e emerxencia sanitaria ante as que se pode atopar o voluntario en xeral.
Actualizar os coñecementos para acceder á formación necesaria para a utilización e manexo dos desfibriladores externos (DESA) ao persoal non sanitario, membros dos servizos de emerxencia e protección civil.
Destinatarios.
Os cursos van dirixidos aos membros dos servizos de emerxencias e protección civil da Comunidade Autónoma de Galicia que teñan realizado o curso básico de protección civil e un curso de segundo nivel.
Desenvolvemento.
1. Prazas: 40 por curso.
2. Duración: 4 horas lectivas.
3. Data: 27 de outubro de 2008.
4. Lugar: Academia Galega de Seguridade Pública. A Estrada.
Solicitudes e prazo de inscrición.
1. A inscrición dos/as participantes é gratuíta.
2. As persoas interesadas poderán cubrir a solicitude que se amosa na páxina web http://agasp.xunta.es, ou o modelo anexo á convocatoria da actividade.
3. As solicitudes deberán vir asinadas pola persoa responsable da correspondente unidade e co selo desta. Este será requisito indispensable para ser admitido no curso.
4. Presentación das solicitudes:
-Por correo á sede da Academia Galega de Seguridade Pública: avda. da Cultura, s/n 36680, A Estrada.
-A través do fax nº 886 20 61 23 do Servizo de Formación-Sección de Protección Civil e Bombeiros da AGASP, ou
-Segundo o previsto no artigo 38.4º da Lei 30/1992, do 26 de novembro, de réxime xurídico das administracións públicas e do procedemento administrativo común.
5. O prazo para a presentación de solicitudes rematará o día 17 de outubro de 2008.
Contido.
O contido do curso de actualización de primeiros auxilios divídese en dúas partes:
-Teoría: (1 hora).
-Práctica: (3 horas).
Sobre actualización en soporte vital básico e primeiros auxilios.
Relación de admitidos/as.
A relación de admitidos/as farase pública o día 21 de outubro de 2008 na páxina web: http://agasp.xunta.es.
Asistencia.
É obrigatoria a asistencia e puntualidade en todas as actividades do curso. A falta de asistencia, mesmo cando sexa xustificada, en máis dun 10% das horas lectivas programadas determinará a cualificación de non apto no curso.
Certificado de aproveitamento.
Ao remate do curso entregaráselles un certificado de aproveitamento a aquelas persoas que acrediten a súa asistencia continuada e superen as correspondentes probas de coñecementos.
Modificacións.
A Academia Galega de Seguridade Pública poderá modificar o desenvolvemento dos cursos para adaptalos ás necesidades da Administración e ás continxencias que poidan xurdir.
A Estrada, 9 de setembro de 2008.
P.S. (Disposición primeira Orde 31 de xaneiro de 2008; DOG nº 23, do 1 de febreiro)
Mª Isabel Durántez Gil
Directora xeral de Interior
Ver referencia pdf "18200D008P018.PDF"
