Os poderes públicos teñen a obriga de velar pola seguranza e saúde laboral de acordo co disposto no artigo 40.2º da Constitución española. En desenvolvemento deste precepto aprobouse a Lei 31/1995, do 8 de novembro, de prevención de riscos laborais que recolle no seu artigo 14 o dereito á protección fronte aos riscos laborais, e no artigo 19 a obriga dos empresarios de garantir que cada traballador reciba unha formación teórica e práctica, suficiente e adecuada, en materia preventiva, tanto no momento da súa contratación como cando se produzan cambios nas funcións que desempeñe ou se introduzan novas tecnoloxías ou cambios nos equipamentos de traballo.

Coa formación preténdese desenvolver as capacidades e aptitudes dos/as traballadores/as para a correcta execución das tarefas que lles son encomendadas, pero tamén se persegue lograr un cambio de actitudes favorable para que os e as traballadores/as se impliquen e asuman que a seguranza e saúde laboral é esencial para o logro dun traballo ben feito.

Por outra banda, a Escola Galega de Administración Pública ten atribuídas as competencias de formación do persoal da Xunta de Galicia pola Lei 4/1987, do 27 de maio, de creación da escola, e pola Lei 10/1989, do 10 de xullo, de modificación da anterior e, en concreto, no seu artigo 3.1º e), organizando e impartindo cursos, seminarios e outras actividades de formación e perfeccionamento do persoal.

A consellería de Presidencia, Administracións Públicas e Xustiza, a través do Servizo de Prevención de Riscos Laborais, é o órgano a que lle corresponde velar polo cumprimento da normativa de prevención de riscos laborais en virtude do artigo 8.2.2. do Decreto 37/2007, do 15 de marzo, polo que se establece a estrutura orgánica da Consellería de Presidencia, Administracións Públicas e Xustiza.

Por tanto, facendo uso das facultades que me confire o artigo 34 da Lei 1/1983, do 22 de febreiro, de normas reguladoras da Xunta e da súa Presidencia,

DISPOÑO:

Artigo 1º.-Obxecto e ámbito de aplicación.

O obxecto desta orde é organizar e establecer o réxime de convocatorias das accións formativas en materia de seguranza e saúde laboral, de forma que todo o persoal ao servizo da Administración da Xunta de Galicia reciba a formación adecuada no momento do seu acceso á función pública, con relación aos seguintes aspectos establecidos na Lei 31/1995, do 8 de novembro, de prevención de riscos laborais:

-Os riscos para a seguranza e saúde dos/as traballadores/as no traballo, tanto aqueles que afecten ao centro no seu conxunto como a cada tipo de posto de traballo ou función.

-As medidas e actividades de prevención e protección aplicables aos ditos riscos.

-As medidas adoptadas en materia de primeiros auxilios, loita contra incendios e evacuación.

Artigo 2º

Os/as traballadores/as que accedan á condición de persoal funcionarios ou laboral da Xunta de Galicia a través dun proceso selectivo, recibirán a formación a que fai referencia o artigo 19 da Lei de prevención de riscos laborais entre a data do seu nomeamento e a data da súa toma de posesión.

No caso dos grupos ou escalas que no momento de superación da fase de oposición teñan establecidos cursos selectivos de formación, convocados pola Consellería de Presidencia, Administracións Públicas e Xustiza, a formación a que se refire o parágrafo anterior realizarase a través dun módulo específico en materia de seguranza e saúde laboral que se introducirá no correspondente programa formativo para os funcionarios en prácticas.

Artigo 3º

A Dirección Xeral de Función Pública comunicará á Escola Galega de Administración Pública o remate dos diferentes procesos selectivos e posteriormente será esta quen procederá á convocatoria dos/as traballadores/as para que asistan, con carácter obrigatorio, a esta formación en materia de prevención de riscos laborais.

Disposición adicional

Única.-O disposto nesta orde enténdese sen prexuízo do disposto pola lexislación vixente en materia de formación do persoal dependente da Xunta de Galicia.

Disposicións derradeiras

Primeira.-Autorízase o secretario xeral da Consellería de Presidencia, Administracións Públicas e Xustiza para ditar as disposicións necesarias para a execución e desenvolvemento desta orde.

Segunda.-Esta orde entrará en vigor aos vinte días da súa publicación no Diario Oficial de Galicia.

Santiago de Compostela, 19 de maio de 2008.

José Luis Méndez Romeu

Conselleiro de Presidencia, Administracións

Públicas e Xustiza