Dentro do Plan de actividades da Escola Galega de Administración Pública para 2008, e de acordo coas funcións atribuídas pola Lei 4/1987, do 27 de maio, de creación da Escola, e pola Lei 10/1989, do 10 de xullo, de modificación da anterior, convócanse en colaboración co Instituto Europeo de Administración Pública-Centro Europeo das Rexións de Barcelona, as xornadas Como aproveitar as oportunidades que Europa nos ofrece, de acordo coas seguintes bases:
1. Obxectivos.
Coa sinatura do novo Tratado de Lisboa e a aprobación do novo período de financiamento 2007-2013, ábrese unha gran fiestra de novas oportunidades para os diferentes sectores que conforman a Unión Europea. Tendo moi en conta que as pequenas e medianas empresas representan un papel clave dentro da sociedade, desde a Unión Europea invítanse as PEME a participar plenamente no proceso de construción europea. Por unha banda, as PEME representan un rol fundamental nun dos piares da nova estratexia de Lisboa, baseado na innovación e no coñecemento como base principal para o crecemento. Por outra banda, as axudas e programas da UE son, a través do principio do (co-) financiamento, unha gran fonte de recursos para os concellos e rexións de Europa. A decisión final para o novo período de programación 2007-2013 tardou en chegar, aínda que isto non significa que o compromiso financeiro da UE no conxunto dos estados membros diminúa. Máis ben ao contrario, seguen a se contar por centos as axudas
que a UE pon á disposición dos actores rexionais e locais dentro dos que as PEME xogan un papel moi destacado.
Unha vez vista desde unha perspectiva xeral a importancia do papel que poden desempeñar as PEME no proceso de construción europea, a pregunta sería: como podemos aproveitar este novo marco para potenciar as posibilidades de crecemento que nos ofrece Europa é preciso desenvolver e atesourar proxectos convincentes, e para iso é moi importante atopar socios cos que traballar e colaborar dunha maneira conxunta. Por todo isto, desde o valor dos fondos ata o cambio de escenario que representa o novo período de programación, os actores locais e rexionais, e moi especialmente as PEME, deben estar moi ben preparados para a ocasión. Cada programa ou iniciativa ten os seus propios obxectivos ou peculiaridades, pero no que se refire ás regras básicas do xogo (isto é, presentación da proposta ou ofertas, xestión e facturación, etc.), os elementos converxen e poden ilustrarse baixo un patrón harmonizado.
Ao mesmo tempo, podemos observar unha nova foto da Unión Europea, que entraña a necesidade de se lle presentar e explicar á cidadanía dun xeito eficaz e coherente. Neste mesmo sentido e partindo da importancia que supón que a cidadanía estea ben informada, desde 2001, os temas relacionados coa comunicación dos asuntos europeos estiveron moi presentes na axenda política. As recentes sondaxes (e referendos) que puxeron a proba á UE nos últimos tempos amósannos a necesidade de reconfigurar e dinamizar unha estratexia de comunicación para que se informe á cidadanía. Isto levou recentemente á Comisión Europea (CE) ao deseño dunha estratexia de comunicación. Conforme o novo lema escoitar, comunicar e interesarse a nivel local, a CE (baixo o liderado de Margot Wallström) tenta superar anteriores omisións e concentrarse en ofrecerlles aos cidadáns europeos resultados e información tanxible que poidan utilizar na súa vida cotiá.
2. Contido.
Serán tratados entre outros os seguintes temas:
-A estratexia de Lisboa como marco global para o período 2007-2013: actores, prioridades e fondos.
-O marco estratéxico para a converxencia económica de Galicia 2007-2013.
-Reforzar a dimensión empresarial nos fondos: CIP, Fondo Europeo de Desenvolvemento Rexional, 7PM, Jeremie, etc.
-Desenvolver unha proposta/idea convincente e un concepto firme para conseguir fondos; o manual de xestión do ciclo do proxecto e o marco lóxico.
-Panel: a creación e o funcionamento dos consorcios: como participar neste proceso, encontrar un socio, crear un consorcio, acordos de asociación, metodoloxía, etc.- factores de éxito críticos.
-Por que comunicar? Definición e presentación da mensaxe.
-Que é unha noticia (da UE).
-Requisitos publicitarios e provisión de visibilidade e tamén divulgación de resultados dos proxectos financiados pola UE.
-Panel final: ferramentas e actividades ao servizo da cidadanía para acceder á información da UE.
3. Destinatarios.
Persoal ao servizo das administracións públicas e tamén representantes de pequenas e medianas empresas galegas e asociacións cuxa función principal sexa a de representar a cidadanía. Ao mesmo tempo, as xornadas tamén están abertas a un amplo público proveniente do nivel local e rexional de Galicia.
En termos máis xerais, as xornadas serán de grande interese para todas aquelas empresas, asociacións, organizacións e cidadáns interesados en coñecer ou ampliar os seus coñecementos sobre as oportunidades que nos ofrece Europa, en forma de fondos de financiamento de proxectos e en novas e mellores formas de comunicación dos asuntos europeos á cidadanía, e, principalmente, como poden aproveitar estas oportunidades do xeito máis óptimo e eficaz posible.
4. Desenvolvemento.
-Horario: de mañá e tarde.
-Local e datas: as xornadas convocadas desenvolveranse no Paraninfo da Universidade da Coruña, sito na rúa da Maestranza, 9, na Coruña, os días 22 e 23 de maio de 2008.
5. Inscrición.
-O prazo de inscrición finaliza o martes, 20 de maio de 2008.
-Tramitación de solicitudes: as solicitudes irán dirixidas ao director da Escola Galega de Administración Pública (Polígono das Fontiñas, rúa de Madrid, 2-4, 15707, Santiago de Compostela), segundo o modelo que figura como anexo a esta convocatoria, e serán presentadas no Rexistro Xeral da EGAP, ou ben de calquera das formas previstas no artigo 38.4º da Lei 30/1992, do 26 de novembro, de réxime xurídico das administracións públicas e do procedemento administrativo común. Serán admitidas inscricións por medio de fax enviado ao número 981 54 63 30 ou por correo electrónico dirixido ao enderezo novas.egap@xunta.es
-Número de prazas: limitado pola capacidade do local.
-Inscricións fóra de prazo: só serán admitidas, de quedar prazas libres, coa condición de que cumpran os requisitos xerais antes indicados.
As persoas solicitantes poderán obter a confirmación da súa admisión se chaman por teléfono, das 8.30 ás 14.30 horas, aos seguintes números: 981 54 62 41/881 99 70 14.
6. Modificacións.
A EGAP reserva para si a facultade de interpretar e de resolver as incidencias que poidan xurdir no desenvolvemento das xornadas, así como a facultade de cancelalas se o número de solicitudes non xustificase a súa realización.
7. Certificado de asistencia.
Será entregado un certificado de asistencia, ao final das xornadas, a aquelas persoas inscritas que participasen asiduamente, e sempre que a súa asistencia sexa igual ou superior ao 85% das horas lectivas programadas. Neste documento aparecerán, de forma expresa, a natureza da actividade e a data de realización.
Santiago de Compostela, 29 de abril de 2008.
Carlos Suárez-Mira Rodríguez
Director da Escola Galega de Administración Pública
Ver referencia pdf "08700D009P044.PDF"