A Orde do 31 de xaneiro de 2008 publicada no DOG nº 23, do 1 de febreiro coa súa corrección de erros publicada no DOG nº 32, do 14 de febreiro, establece a regulación da aplicación dos pagamentos directos á agricultura e á gandería e da indemnización compensatoria, e se convocan as axudas previstas no contrato de explotación sustentable, no ano 2008.
O Regulamento (CE) nº 146/2008, do Consello, do 14 de febreiro de 2008, modifica tanto o Regulamento (CE) nº 1782/2003, polo que se establecen disposicións comúns aplicables aos réximes de axuda directa no marco da política agrícola común e se instauran determinados réximes de axuda aos agricultores, como o Regulamento (CE) nº 1698/2005, relativo á axuda ao desenvolvemento rural a través do Fondo Europeo Agrícola de Desenvolvemento Rural (Feader).
Por outra parte, a Orde APA/736/2008, do 14 de marzo, modifica as datas en que as parcelas das hectáreas admisibles deben permanecer ao dispor do agricultor para xustificar dereitos de axuda na solicitude única.
Por iso, resulta necesario modificar a Orde do 31 de xaneiro de 2008, pola que se regula a aplicación dos pagamentos directos á agricultura e a gandaría e da indemnización compensatoria, e se convocan as axudas previstas no contrato de explotación sustentable, no ano 2008, para a súa adaptación á normativa citada.
En consecuencia, de acordo co disposto no artigo 30.I.3 do EAG e facendo uso das facultades que me confire a Lei 9/2007, do 13 de xuño, de subvencións de Galicia, así como a Lei 1/1983, do 22 de febreiro, reguladora da Xunta e da súa Presidencia, e no Decreto 562/2005, do 1 de decembro,
DISPOÑO:
Artigo único.-A Orde do 31 de xaneiro de 2008, pola que se regula a aplicación dos pagamentos directos á agricultura e á gandaría e, da indemnización compensatoria, e se convocan as axudas previstas no contrato de explotación sustentable, no ano 2008, publicada no DOG nº 23, do 1 de febreiro, coa súa corrección de erros publicada no DOG nº 32, do 14 de febreiro, queda modificada do seguinte xeito:
Un.-O artigo 29 queda redactado do modo seguinte:
«As parcelas de hectáreas admisibles utilizadas para xustificar dereitos de axuda deberán estar ao dispor do agricultor o 31 de maio do ano en que se solicita a axuda».
Dous.-O punto 4º do artigo 73 queda redactado do modo seguinte:
«Os controis sobre o terreo poderanse anunciar, sempre que non se comprometa o obxectivo perseguido. O aviso limitarase estritamente ao prazo mínimo necesario e non excederá 14 días.
Non obstante, cando se trate de controis sobre o terreo relativos ás solicitudes de axuda por animais, o aviso mencionado no parágrafo anterior non poderá exceder 48 horas, agás nos casos debidamente xustificados. Ademais, cando a lexislación aplicable aos actos e normas que afectan a condicionalidade exixa que o control sobre o terreo se realice sen previo aviso, esas disposicións tamén se aplicarán aos controis da condicionalidade sobre o terreo».
Disposición derradeira
Esta orde entrará en vigor o mesmo día da súa publicación no Diario Oficial de Galicia e será de aplicación.
Santiago de Compostela, 11 de abril de 2008.
Alfredo Suárez Canal
Conselleiro do Medio Rural