Dentro das actividades programadas para o ano 2008, en colaboración coa Deputación Provincial da Coruña, en virtude do convenio de formación asinado entre a Consellería de Presidencia, Administracións Públicas e Xustiza e a Deputación Provincial da Coruña, anúnciase a celebración dun curso sobre operativa policial nos casos de xuízos rápidos, que deberá desenvolverse conforme as seguintes bases:
Obxectivos.
-Actualización no procedemento para o axuizamento rápidos de determinados delitos.
-Coñecer as actuacións necesarias que se desenvolverán por parte da policía local como policía xudicial.
-Manexar formularios que permitan a concreción de atestados e dilixencias policiais para o seu traslado á autoridade xudicial.
Publicación.
Esta actividade formativa, e tamén todas aquelas que se desenvolvan en colaboración coa Deputación Provincial da Coruña, será obxecto de publicación no Diario Oficial de Galicia e no BOP da Coruña.
Destinatarios.
O curso vai dirixido aos membros dos corpos de policía local da provincia da Coruña. No caso de quedaren prazas vacantes, poderían optar a elas outros corpos de seguridade.
Inscrición.
A inscrición dos participantes será totalmente gratuíta.
Prazas.
Ata 30 prazas, que serán outorgadas por rigorosa orde de entrada de solicitudes, tendo en conta o disposto no punto de destinatarios.
Solicitudes.
1. O persoal que desexe participar neste curso deberá presentar, cuberta a máquina ou con letra moi clara, a instancia que figura no anexo.
2. O prazo para a presentación de instancias rematará o día 16 de abril ás 14.00 horas.
3. As instancias deberán enviarse á Deputación Provincial da Coruña- Servizo de Asistencia a Municipios (fax: 981 08 03 54) avenida Alférez Provisional, s/n, 15006 A Coruña; ou ben poden entregarse en calquera dos lugares previstos no artigo 38.4º da Lei 30/1992, do 26 de novembro, de réxime xurídico das administracións públicas e do procedemento administrativo común.
Datas.
O curso desenvolverase en datas do 21 ao 24 de abril de 2008.
O horario será das 16.00 ás 21.00 horas, cunha duración de 20 horas lectivas.
Contido.
-Módulo I: actualización na normativa legal. Actuacións da policía local no procedemento para o axuizamento rápido de determinados delitos. Estudo da xurisprudecia aplicable.
-Módulo II: supostos prácticos: resolución de casos prácticos formulados aos alumnos. Utilización e manexo de formularios específicos.
Relación de admitidos.
A relación de admitidos farase pública o día 18 de abril a partir das 14.00 horas, tanto pola Deputación Provincial da Coruña como pola Academia Galega de Seguridade Pública, os interesados poden coñecer e confirmar a súa asistencia chamando aos teléfonos 886 20 61 09/117/118 (Agasp) e na páxina web http://agasp.xunta.es, ou 981 08 03 00 (Servizo de Asistencia a Municipios da Deputación Provincial da Coruña).
Lugar.
O curso desenvolverase no Concello de Boiro, quedando por concretar o seu lugar de celebración que se comunicará previamente xunto coa lista de admitidos.
Certificado de asistencia.
Ao remate do curso entregaráselle un certificado de asistencia a aquelas persoas que acrediten a súa participación continuada a el.
Modificacións.
Tanto a Academia Galega de Seguridade Pública como a Deputación Provincial da Coruña, se é o caso, poderán modificar o desenvolvemento normal do curso para adaptalo ás necesidades da Administración e ás continxencias que poidan xurdir.
A Estrada, 26 de marzo de 2008.
P.S. (Disp. 1ª Orde 31-1-2008; DOG nº 23 do 1 de febreiro)
María Isabel Durántez Gil
Directora xeral de Interior
Ver referencia pdf "06400D009P057.PDF"