Dentro do programa de actividades que a Academia Galega de Seguridade Pública ten previsto realizar no ano 2008, e conforme as funcións atribuídas pola Lei 1/2007, do 15 de xaneiro, de creación da Academia Galega de Seguridade Pública, anúnciase a convocatoria de tres cursos de especialización sobre salvamento e socorrismo acuático, que deberán desenvolverse conforme coas seguintes bases:

Obxectivos.

Dotar o persoal voluntario de protección civil dunha formación teórico-práctica que lle facilite a realización das tarefas que teña encomendadas, adquirindo unha maior destreza e coñecementos suficientes no salvamento e socorrismo acuático de persoas en situacións difíciles.

Destinatarios.

Os cursos van dirixidos aos integrantes dos servizos de Protección Civil da Comunidade Autónoma de Galicia, que previamente superasen o curso básico de protección civil e teñan dominio dos tres estilos de natación seguintes: crol, de bruzos e de costas.

Desenvolvemento.

1. Prazas: 30.

2. Duración: 80 horas lectivas.

3. Lugar: determinarase en función da localización dos/as solicitantes que superen as probas de acceso.

4. Datas: confirmaranse coa suficiente antelación ao seu inicio.

Proba de acceso.

Todos os aspirantes pasarán unha proba selectiva para optar á realización do curso. Esta proba, en que se avaliará o dominio de natación nos tres estilos, así como nadar 200 metros estilo libre, farase na piscina da Academia Galega de Seguridade Pública no día e na hora que oportunamente e coa suficiente antelación se lles comunicará aos interesados.

Solicitudes e prazo de inscrición.

1. A inscrición dos participantes é gratuíta.

2. O persoal que desexe participar nestes cursos deberá cubrir a solicitude que figura na páxina web http://agasp.xunta.es, ou enviar cuberta á máquina ou con letra moi clara, a solicitude que figura no anexo.

3. O prazo para a presentación de solicitudes rematará o día 28 de marzo de 2008.

4. As solicitudes deberán estar asinadas polo/a responsable da correspondente unidade e co selo desta. Estes requisitos serán indispensables para ser admitidos no curso.

5. As solicitudes deberán tramitarse facendo uso do modelo que aparece na páxina web: http://agasp.xunta.es, ou ben enviarse por correo á sede da Academia Galega de Seguridade Pública: avenida da Cultura, s/n, 36680 A Estrada, ao fax nº 886 20 61 21, ou poden presentarse en calquera dos lugares previstos no artigo 38.4º da Lei 30/1992, do 26 de novembro, de réxime xurídico das administracións públicas e do procedemento administrativo común.

Contido.

Trataranse diversos temas relacionados cos seguintes puntos:

a) Introdución. Conceptos xerais.

b) Salvamento e socorrismo acuático.

c) Técnicas de extracción de accidentados. Salvamento acuático en espazos naturais.

d) Primeiros auxilios. Soporte vital básico. Soporte vital básico pediátrico. Traumatismos. Picaduras e mordeduras. Lesións por axentes externos.

e) Proba de avaliación e superación do curso.

Relación de admitidos.

A relación de admitidos farase pública o 21 de abril na páxina web: http:// agasp.xunta.es.

Asistencia.

É obrigatoria a asistencia e puntualidade en todas as actividades do curso. A falta de asistencia, mesmo cando sexa xustificada, a máis dun 10% das horas lectivas programadas determinará a cualificación de non apto no curso.

Certificado de aproveitamento.

Ao remate do curso entregaráselles un certificado de asistencia e aproveitamento a aquelas persoas que acrediten a súa asistencia continuada e superen as correspondentes probas de coñecementos.

Modificacións.

A Academia Galega de Seguridade Pública poderá modificar o desenvolvemento dos cursos para adaptalos ás necesidades da Administración e ás continxencias que poidan xurdir.

A Estrada, 26 de febreiro de 2008.

P.S. (Disposición primeira, Orde 31-1-2008,

DOG nº 23, do 1 de febreiro)

Mª Isabel Durántez Gil

Directora xeral de Interior

Ver referencia pdf "04900D012P035.PDF"