Dentro do plan de actividades da Escola Galega de Administración Pública para 2008, e de acordo coas funcións atribuídas pola Lei 4/1987, do 27 de maio, de creación da escola, e pola Lei 10/1989, do 10 de xullo, de modificación da anterior, convócanse, en colaboración co Instituto Europeo de Administración Pública-Centro Europeo das Rexións as xornadas Cumprindo con Europa: a contratación pública de hoxe, de acordo coas seguintes bases:

1. Obxectivos.

O Estado español acaba de aprobar a Lei de contratos do sector público, norma co que quere dar cumprimento -aínda que sexa con atraso- aos mandatos europeos.

Europa adoptou en 2004 un paquete de medidas lexislativas que simplificaban e modernizaban a contratación pública europea e que pretendían abrir o mercado único, garantindo a competencia entre empresas, un mellor uso do diñeiro público e a mellora da calidade dos servizos prestados. O 31 de xaneiro do 2006 vencía o prazo para que os Estados membros adaptasen as súas lexislacións aos mandatos das novas directivas europeas en materia de contratos públicos, pero son moitos os estados que o fixeron con atraso.

As novas directivas, e con elas a nova lei española, perseguen principalmente dous obxectivos: primeiro simplificar e clarificar o sistema lexislativo existente ata a data e segundo, adaptalo ás novas necesidades públicas nun contexto económico cambiante como consecuencia da liberalización das telecomunicacións, ou a transición a unha nova economía. Co fin de asegurar a transparencia dos procedementos de adxudicación e de combater os ataques ao ambiente, as políticas antisociais e a corrupción e o crime organizado, a nova lexislación europea incluíu tamén medidas deseñadas para clarificar os criterios de selección de licitadores. Inclúense ademais as pautas para avanzar en Europa cara a unha contratación electrónica que substitúa a do método clásico ou de papel, pretendendo así orientar a contratación administrativa tradicional cara á contratación electrónica.

O obxectivo principal destas xornadas é presentar e explicar as directivas sobre contratación pública dun xeito claro e accesible, e analizar a nova Lei de contratos do sector público do Estado á luz destas directivas e da xurisprudencia do Tribunal de Xustiza das Comunidades Europeas. Tratarase a importancia da contratación pública en Europa, a evolución do dereito comunitario, a súa transposición en España por medio da recentemente aprobada nova Lei de contratos do sector público e os cambios que todo iso está implicando para os xestores públicos de todos os ámbitos. Ofreceránselles aos participantes, desde unha óptica eminentemente práctica, os aspectos máis relevantes da nova lexislación e a súa posta en práctica na primeira década do século XXI.

2. Contido.

Serán tratados, entre outros, os seguintes temas:

-A importancia da contratación pública en Europa.

-Principais novidades da nova Lei de contratos do sector público: análise á luz do dereito comunitario.

-O elemento subxectivo e obxectivo na contratación:

Os suxeitos contratantes na nova lei; alcance do concepto do poder adxudicador.

Depuración conceptual dos tipos de contratos.

-Problemática práctica que supón o cumprimento das directivas comunitarias; análise crítica dalgunhas novidades destacables da Lei de contratos do sector público.

-O procedemento de selección e os criterios de adxudicación.

-A directiva de recursos: ¿cara a un axeitado sistema de garantías?

-O marco normativo da contratación pública electrónica: situación actual. A experiencia en Galicia.

-A sinatura electrónica: unha lección para escépticos.

-E-contratación: as experiencias de Galicia e o País Vasco.

-O futuro: as directivas comunitarias en preparación. a súa incidencia na lexislación española

-Mesa redonda da práctica diaria da contratación: ¿cumprimos con Europa?

3. Destinatarios.

Persoal ao servizo da Xunta de Galicia, da Administración local galega e interesados en xeral.

4. Desenvolvemento.

-Horario: de mañá e tarde.

-Local e datas: as xornadas convocadas desenvolveranse na Escola Galega de Administración Pública, sita na rúa de Madrid, 2-4, en Santiago de Compostela, os días 26 e 27 de marzo de 2008.

5. Inscrición.

-O prazo de inscrición finaliza o 24 de marzo de 2008.

-Tramitación de solicitudes: as solicitudes irán dirixidas ao director da Escola Galega de Administración

Pública (polígono das Fontiñas, rúa de Madrid, 2-4, CP 15707, Santiago de Compostela), segundo o modelo que figura como anexo a esta convocatoria, e serán presentadas no Rexistro Xeral da EGAP, ou ben de calquera das formas previstas no artigo 38.4º da Lei 30/1992, do 26 de novembro, de réxime xurídico das administracións públicas e do procedemento administrativo común. Serán admitidas inscricións por medio de fax enviado ao número 981 54 63 30 ou por correo electrónico dirixido ao enderezo novas.egap@xunta.es

-Número de prazas: limitado pola capacidade do local.

-Inscricións fóra de prazo: só serán admitidas, de quedaren prazas libres, coa condición de que cumpran os requisitos xerais antes indicados.

As persoas solicitantes poderán obter a confirmación da súa admisión se chaman por teléfono, das 8.30 ás 14.30 horas, aos seguintes números: 981 54 62 41-881 99 70 14.

6. Modificacións.

A EGAP resérvase a facultade de interpretar e de resolver as incidencias que puidesen xurdir no desenvolvemento das xornadas, así como a facultade de cancelalas se o número de solicitudes non xustificase a súa realización.

7. Certificado de asistencia.

Será entregado un certificado de asistencia, ao final das xornadas, a aquelas persoas inscritas que participasen asiduamente, e sempre que a súa asistencia sexa igual ou superior ao 85% das horas lectivas programadas. Neste documento aparecerán de forma expresa a natureza da actividade e a data da súa realización.

Santiago de Compostela, 26 de febreiro de 2008.

Carlos Suárez-Mira Rodríguez

Director da Escola Galega de Administración Pública

Ver referencia pdf "04700D012P079.PDF"