Acódese ao instrumento xurídico da encomenda de xestión, previsto no artigo 15 da Lei 30/1992, do 26 de novembro, de réxime xurídico das administracións públicas e do procedemento administrativo común, por canto existe unha saturación, debido ao número e complexidade dos expedientes, das demarcacións intracomunitarias, vertentes ao Atlántico, Cantábrico e a do Eume e a do Ulla, nas partes que discorren pola provincia de Lugo.

En aplicación do principio de eficacia derivado do artigo 103.1º da Constitución española, esta encomenda de xestión vai destinada a lograr que o órgano a que se encomenda realice as funcións coa maior eficiencia desde a proximidade aos lugares onde radica a súa competencia xeográfica, para un mellor desenvolvemento das actuacións de policía de augas e, en xeral, de todas aquelas tendentes á tutela e defensa do dominio público hidráulico.

O artigo 13.1º c) do Decreto 108/1996, do 29 de febreiro, modificado polo Decreto 146/2003, do 6 de febreiro, polo que se aproba o regulamento do organismo autónomo de Augas de Galicia fixa como atribucións do seu presidente o exercicio da dirección superior e a coordinación dos servizos do organismo.

Dentro das atribucións da Demarcación Territorial da Bacía Intercomunitaria de Lugo está a de desenvolver as funcións que lle sexan encomendadas polo presidente, segundo prevé o artigo 43.1º.2 d) do referido regulamento do organismo autónomo e vén significar un exemplo do principio de desconcentración.

Como queira que, entre outras, as atribucións do artigo 13 do indicado regulamento, figura a de superior dirección e coordinación de servizos que son exercidas polo director xeral de Augas de Galicia en virtude da Orde do 24 de outubro de 2007 (DOG do 2 de novembro) de delegación de funcións e atribucións do presidente de Augas de Galicia no director xeral e no secretario xeral do devandito organismo autónomo, o órgano que encomenda a xestión pola vía desta resolución resulta ser o director xeral e durante o prazo de vixencia que se indica no articulado.

Segundo o disposto no artigo 12 c) da Lei 8/1993, do 23 de xuño, da Administración hidráulica de Galicia, nos artigos 13.1º c) e 43.1º.2 d) do regulamento do organismo autónomo Augas de Galicia, citado, en exercicio das facultades delegadas pola Orde do 24 de outubro de 2007, e de conformidade co artigo 15 da Lei 30/1992, do 26 de novembro, xa citada, e demais disposicións de xeral aplicación

RESOLVO:

Primeiro.-Encomendar ao xefe do Servizo Territorial da Demarcación das Bacías Intercomunitarias de Lugo o exercicio das funcións de tramitación ata a súa proposta de resolución dos expedientes de autorizacións e concesións relativas ao dominio público hidráulico, de establecemento de servidumes de augas e de constitución de comunidades de usuarios que se xeren no ámbito das bacías Galicia-Costa correspondente á provincia de Lugo.

Segundo.-Quedan excluídas expresamente do coñecemento da xefatura territorial referida as concesións relativas a aproveitamentos hidroeléctricos, a tramitación dos expedientes sancionadores en materia de dominio público hidráulico e a tramitación de todos os expedientes concernentes a verteduras de augas residuais.

Terceiro.-Esta encomenda de xestión non supón cesión da titularidade de competencia nin dos elementos substantivos do seu exercicio atribuídos ao director xeral por delegación de competencias do presidente de Augas de Galicia.

Cuarto.-Poderá avocarse a competencia para o coñecemento e resolución dos expedientes encomendados por parte do director xeral de Augas de Galicia no punto primeiro desta resolución nos termos indicados no artigo 14 da Lei 30/1992, do 26 de novembro, xa referida.

Quinto.-Para o cumprimento destas funcións os efectivos da gardaría fluvial estarán suxeitos ás instrucións do xefe do servizo territorial a que se entende que se adscribirán organicamente.

Sexto.-Esta encomenda terá a vixencia de dous anos, contados desde a data da súa publicación no Diario Oficial de Galicia.

A encomenda poderá ser prorrogada, logo de resolución, que deberá publicarse no Diario Oficial de Galicia.

Sétimo.-Esta resolución entrará en vigor o mesmo día da súa publicación no Diario Oficial de Galicia.

Santiago de Compostela, 15 de febreiro de 2008.

P.D. (Orde 24-10-2007)

José Luis Romero Valeiras

Director xeral de Augas de Galicia