Ao abeiro da Declaración Institucional polo Diálogo Social en Galicia, asinada o 5 de novembro de 2005, púñase en marcha o proceso do diálogo social en Galicia que culminaba, o 5 de febreiro de 2007, co asinamento do Acordo sobre un Novo Marco de Relacións Laborais.

Neste proceso de diálogo social analizábase a necesidade de adoptar medidas para alcanzar os obxectivos establecidos, medidas entre as que se atopa a revalorización e mellora do funcionamento da Inspección de Traballo e Seguridade e Social e a participación dos axentes sociais.

Por outra banda, o Estatuto de autonomía de Galicia, no seu artigo 29.1º, de acordo co 149.1.7ª da Constitución española, recolle como competencia propia desta comunidade autónoma a execución da lexislación básica do Estado en materia laboral, asumíndose os servizos e funcións inherentes a través do Decreto 117/1982, do 5 de outubro, en materia de traballo e o Decreto 168/1984, do 15 de novembro, relativo á unidade administradora do Fondo Nacional de Protección ao Traballo.

Así mesmo, a Lei 42/1997, do 14 de novembro, ordenadora da Inspección de Traballo e Seguridade Social, configura esta como un servizo público ao que corresponde exercer a vixilancia do cumprimento das normas de orde social e exixir as responsabilidades pertinentes, así como o asesoramento e, de ser o caso, arbitraxe, mediación e conciliación nas ditas materias, que efectuará de conformidade cos principios do Estado social e democrático de dereito que consagra a Constitución española, e cos convenios número 81 e 129 da Organización Internacional do Traballo.

Pola súa banda, o Convenio número 81 da Organización Internacional do Traballo sinala no seu artigo 5 que a autoridade competente da Inspección de Traballo debería adoptar as medidas pertinentes para fomentar a colaboración dos funcionarios da inspección cos empregadores e traballadores ou as súas organizacións.

Neste sentido, a disposición derradeira primeira da Lei 43/2006, do 29 de decembro, para a mellora do crecemento e do emprego, establece que as organizacións sindicais e empresariais máis representativas serán consultadas e poderán formular propostas sobre os obxectivos e programas do Sistema de Inspección de Traballo e Seguridade Social, no ámbito da Administración do Estado e das comunidades autónomas, a través de órganos de representación de carácter consultivo de composición tripartita e paritaria. Para tal efecto, as comunidades autónomas, en función da súa capacidade de autoorganización, establecerán as correspondentes instancias de participación das organizacións sindicais e empresariais máis representativas.

Trátase, polo tanto, de reforzar o sistema de Inspección de Traballo e Seguridade Social para mellorar a eficacia e eficiencia deste, a través da colaboración e cooperación interadministrativa así como da necesaria consulta e participación dos interlocutores sociais na definición dos obxectivos e programas da inspección dentro da Comunidade Autónoma de Galicia.

Por todo o exposto, oído o Consello Galego de Relacións Laborais e, en uso das facultades que teño atribuídas,

DISPOÑO:

Artigo 1º.-Creación e adscrición.

Créase a Comisión Consultiva Tripartita da Inspección de Traballo e Seguridade Social de Galicia como órgano colexiado asesor da Comisión Territorial da Inspección nesta comunidade autónoma, adscrito á Consellería de Traballo.

Artigo 2º.-Composición e estrutura.

A comisión estará integrada por representantes da administración da Comunidade Autónoma de Galicia, da Dirección Territorial da Inspección de Traballo e Seguridade Social, das organizacións empresariais e das organizacións sindicais máis representativas a nivel da Comunidade Autónoma de Galicia, coa seguinte composición:

1. Por parte da Administración:

-A persoa titular da Dirección Xeral de Relacións Laborais.

-A persoa titular da Dirección do Instituto Galego de Seguridade e Saúde Laboral (ISSGA).

-A persoa titular da Dirección Territorial da Inspección de Traballo e Seguridade Social de Galicia.

A excepción da Presidencia desta comisión, que será substituída segundo o indicado no punto 7 deste artigo, no caso de imposibilidade de asistencia por parte dos demais membros titulares, serán substituídos por funcionarios dos respectivos centros directivos.

2. Por parte das organizacións empresariais:

-Tres persoas en representación das organizacións empresariais máis representativas da comunidade autónoma.

3. Por parte das organizacións sindicais:

-Tres persoas en representación das organizacións sindicais máis representativas da comunidade autónoma.

4. O mandato dos membros non natos na comisión, recollidos nos puntos 2 e 3 deste artigo, que terán os seus correspondentes suplentes, será de catro anos de duración, sen prexuízo da súa reelección e da posibilidade de ser substituídos, titulares ou suplentes, durante o período aludido, por proposta da organización a que representen.

Estes membros, cos seus correspondentes suplentes, serán designados pola Consellería de Traballo por proposta das organizacións empresariais e sindicais máis representativas.

5. Desempeñará a Presidencia da comisión a persoa titular da Dirección Xeral de Relacións Laborais.

6. Será secretario/a da comisión, con voz pero sen voto, un funcionario/a da Dirección Xeral de Relacións Laborais, que prestará apoio técnico e administrativo á comisión.

7. En caso de vacante, ausencia, enfermidade ou outra causa legal, a persoa que desempeña a Presidencia da comisión será substituída de acordo coa seguinte orde: en primeiro lugar, pola persoa titular da Dirección do Instituto Galego de Seguridade e Saúde Laboral e, en caso de ausencia desta, pola persoa titular da Dirección Territorial da Inspección de Traballo e Seguridade Social de Galicia.

Artigo 3º.-Funcións.

A Comisión Consultiva Tripartita da Inspección de Traballo e Seguridade Social de Galicia coñecerá as actuacións que desenvolva a Inspección de Traballo e Seguridade Social no ámbito territorial da nosa comunidade autónoma e as súas funcións serán as de asesorar e formular propostas e informes en materia de:

-Deseño de estratexias para a actuación da Inspección de Traballo e Seguridade Social.

-Iniciativas, prioridades e obxectivos da Inspección de Traballo e Seguridade Social, campañas de inspección e demais actuacións inspectoras.

-Situación dos recursos humanos e materiais do sistema da inspección na comunidade autónoma.

Artigo 4º.-Funcionamento.

A comisión actuará en Pleno, reuníndose, cando menos, dúas veces ao ano, logo de convocatoria da persoa que desempeñe a Presidencia e, con carácter extraordinario, por iniciativa do/a presidente/a ou por proposta de calquera das tres partes integrantes desta.

Artigo 5º.-Réxime xurídico.

Sen prexuízo do previsto nesta orde, o réxime xurídico e actuación da comisión axustarase ao disposto no capítulo II do título II da Lei 30/1992, do 26 de novembro, do réxime xurídico das administracións públicas e do procedemento administrativo común.

Artigo 6º.-Compensación económica por asistencia a reunións.

As organizacións sindicais e empresariais ou os seus representantes terán dereito á percepción dunha compensación económica por asistencia ás reunións da comisión, de conformidade co que se estableza no oportuno acordo do Consello da Xunta en aplicación do Decreto 144/2001, do 7 de xullo, sobre indemnizacións por razón do servizo.

Artigo 7º.-Gasto público.

O funcionamento da comisión será atendido con cargo aos créditos orzamentarios da Dirección Xeral de Relacións Laborais, sen que isto supoña incremento do gasto público.

Disposicións derradeiras

Primeira.-Desenvolvemento.

Facúltase o/a director/a xeral de Relacións Laborais para que dite, no ámbito da súas competencias, as resolucións necesarias para o desenvolvemento e cumprimento desta orde.

Segunda.-Entrada en vigor.

Esta orde entrará en vigor o día seguinte ao da súa publicación no Diario Oficial de Galicia.

Santiago de Compostela, 21 de febreiro de 2008.

Ricardo Jacinto Varela Sánchez

Conselleiro de Traballo