A Orde do 27 de decembro de 2000 da Consellería de Industria e Comercio e as súas modificacións, pola que se establece o procedemento unificado para a obtención de carnés profesionais e exixencias a empresas autorizadas para instalación, mantemento e outras actividades en materia de seguridade industrial, establece no seu artigo 5 que a convocatoria de exames se publicará anualmente mediante resolución da dirección xeral competente en materia de industria.

En virtude da citada competencia,

RESOLVO:

Convocar os exames ordinarios que terán lugar no ano 2008 para a obtención do carné profesional de operador de guindastre torre, con suxeición ás seguintes bases da convocatoria:

Primeira.-Obxecto da convocatoria.

O obxecto da convocatoria é a obtención do carné profesional de operador de guindastre torre.

Segunda.-Datas e lugares de realización dos exames. Tribunais cualificadores.

2.1. Os exames realizaranse nas catro provincias. As probas comezarán ás 9.00 horas nos locais que se indicarán nas listas definitivas de admitidos e excluídos.

2.2. Os membros do tribunal cualificador e as datas en que se realizarán os exames serán os que se indican a continuación:

-29 de maio de 2008.

-27 de novembro de 2008.

Tribunal nº 1:

Presidente: Antonio de la Hera Roldán..

Suplente: Juan Luis Ecenarro Tomé.

Secretaria: Isabel Álvarez Janeiro.

Suplente: María del Carmen da Costa Picón.

Vogal A Coruña: Julián Lucas Ramírez.

Vogal suplente: Isidoro Martínez Arca.

Vogal Lugo: Alberto Mena Rodríguez.

Vogal suplente: Fernando Mailoc López García.

Vogal Ourense: Alfonso Tomás Paz Doniz.

Vogal suplente: Juan Ramón Velasco González.

Vogal Pontevedra: Eugenio Fernández Piñeiro.

Vogal suplente: Ángel Merino Cachaperín.

2.3. O tribunal cualificador resolverá cantas incidencias se susciten no eido desta convocatoria. Para os efectos de comunicación e demais incidencias, o tribunal terá a súa sede na Dirección Xeral de Industria, Enerxía e Minas da Consellería de Innovación e Industria da Xunta de Galicia.

Terceira.-Requisitos dos aspirantes.

Para seren admitidos á realización das probas, os aspirantes deberán reunir os seguintes requisitos:

a) Ser maior de idade.

b) Estar en posesión dun certificado de estudos primarios. Excepcionalmente poderá admitirse a acreditación de experiencia a que fai referencia o punto 4.2 do anexo VI do Real decreto 836/2003, do 27 de xuño, polo que se aproba unha nova instrución técnica complementaria MIE-AEM-2 do Regulamento de aparellos de elevación e manutención, referente a guindastres torre para obras ou outras aplicacións.

c) Superar un exame médico sobre agudeza visual, sentido da orientación, equilibrio e agudeza auditiva e aptitudes psicolóxicas.

d) A superación dun curso teórico-práctico impartido por unha entidade acreditada pola Consellería de Innovación e Industria da Xunta de Galicia.

Estes requisitos deberán posuírse no día de finalización do prazo de presentación de solicitudes.

Cuarta.-Solicitudes e documentación.

4.1. Os aspirantes deberán solicitar a súa admisión ás probas mediante instancia dirixida ao delegado provincial da Consellería de Innovación e Industria que corresponda, segundo o modelo que figura no anexo.

4.2. As solicitudes presentaranse no rexistro xeral da Consellería de Innovación e Industria, nas súas delegacións provinciais ou nos lugares previstos no artigo 38 da Lei 30/1992, do 26 de novembro, de réxime xurídico das administracións públicas e do procedemento administrativo común.

4.3. Xunto coa solicitude modelo será preciso presentar a seguinte documentación:

a) Copia cotexada do documento nacional de identidade.

b) Dúas fotografías tamaño carné.

c) Documento que acredite a superación dun exame médico sobre agudeza visual, sentido da orientación, equilibrio e agudeza auditiva e aptitudes psicolóxicas.

d) Copia cotexada do certificado de asistencia e superación do curso teórico-práctico impartido por unha entidade acreditada pola Consellería de Innovación e Industria.

e) Copia cotexada do certificado de estudos primarios.

f) Xustificante para a Administración do impreso correspondente de autoliquidación de taxas en concepto de dereitos de exame (clave 32.07.01, importe 37,62 €) debidamente validado pola entidade bancaria onde se realice o ingreso.

Quinta.-Prazo de presentación de solicitudes.

O prazo de presentación de solicitudes para a realización dos exames para a obtención do carné profesional de operador de guindastre torre comezará o día seguinte ao da publicación desta resolución no DOG para a primeira convocatoria, e para as restantes comezará o día seguinte á realización do exame da convocatoria precedente. O dito prazo rematará o:

-28 de marzo para a convocatoria de maio.

-15 de setembro para a convocatoria de novembro.

Sexta.-Admisión de solicitudes.

6.1. Rematado o prazo de presentación de solicitudes publicarase a lista provisional de admitidos e excluídos nos taboleiros de anuncios das delegacións provinciais. Esta lista tamén se poderá consultar no teléfono de información da Consellería de Innovación e Industria (981 54 43 41) e na páxina web da Xunta de Galicia (www.xunta.es).

6.2. Os aspirantes excluídos, así como os que non figuren nas relacións de admitidos nin excluídos, disporán de dez días hábiles, contados a partir do día seguinte ao da devandita publicación no taboleiro de anuncios da correspondente Delegación Provincial da Consellería de Innovación e Industria para a emenda de defectos.

Sétima.-Desenvolvemento dos exames.

7.1. Os exames estarán constituídos por dúas partes que se desenvolverán no mesmo día nas datas que se recollen na base segunda desta resolución.

Primeira parte.-Estará constituída por un exercicio teórico escrito, consistente na resolución dun cuestionario tipo test proposto polo tribunal sobre as materias regulamentarias establecidas.

Segunda parte.-Poderá consistir, segundo determine o tribunal, nun suposto práctico escrito ou nunha proba práctica co guindastre torre. No caso do suposto práctico escrito, versará sobre unha ou varias operacións propostas polo tribunal en relación cos requirimentos prácticos establecidos, e os candidatos poderán utilizar a instrución técnica complementaria MIE-AEM-2 do Regulamento de aparellos de elevación e manutención, referente a guindastres torre para obras ou outras aplicacións.

7.2. Para a realización do exame os candidatos deberán ir provistos, para cada exercicio, do seu documento nacional de identidade, lapis, goma de borrar e bolígrafo negro.

Oitava.-Cualificación dos exames.

8.1. A puntuación mínima para superar cada parte corresponderá á metade do valor da puntuación máxima posible da dita parte. Na parte teórica a nota formarase de acordo coa expresión «nº de respostas correctas - (nº de respostas incorrectas / 3)».

8.2. Os exames cualificaranse como aptos ou non aptos. Para ser considerado apto deberanse aprobar as dúas partes independentemente.

Novena.-Lista de aprobados.

O tribunal cualificador publicará a relación provisional de aprobados por provincias e dará traslado desta ás catro delegacións provinciais para a súa publicación nos respectivos taboleiros de anuncios. Esta relación tamén se poderá consultar no teléfono de información da Consellería de Innovación e Industria (981 54 43 41) e na páxina web da Xunta de Galicia (www.xunta.es).

Os interesados disporán dun prazo de dez días naturais desde a publicación da relación provisional de aprobados para formular reclamacións ante o tribunal. Finalizado o prazo o tribunal enviará proposta das listas de aprobados ao director xeral de Industria, Enerxía e Minas, que as elevará a definitivas mediante resolución e dará traslado delas ás catro delegacións provinciais para a súa publicación nos respectivos taboleiros de anuncios. Contra a dita resolución poderase interpor recurso de reposición no prazo dun mes a partir da publicación nos taboleiros de anuncios.

Contra esta resolución, que non pon fin á vía administrativa, poderá interpoñerse recuso de alzada ante o conselleiro de Innovación e Industria no prazo dun mes desde a súa publicación.

Santiago de Compostela, 8 de febreiro de 2008.

Director xeral de Industria, Enerxía e Minas

Anxo Ramón Calvo Silvosa

Ver referencia pdf "03700D004P029.PDF"