Para unha adecuada aplicación das taxas e os prezos da Comunidade Autónoma de Galicia as ordes ás que fai referencia o título desta resolución procederon a codificar tanto as diferentes taxas e prezos como os servizos xestores que as aplican.
Ao longo do ano promulgáronse unha serie de normas que viñeron crear ou modificar os servizos xestores e as tarifas existentes, razón pola que mediante esta resolución procédese a revisar a codificación recollida nas ordes citadas, consonte coas autorizacións contidas no parágrafo 2 da disposición adicional da orde da Consellería de Economía e Facenda do 30 de xuño de 1992 e mais na disposición adicional terceira da orde da Consellería de Economía e Facenda do 29 de xuño de 1994. As normas que motiva a revisión da codificación son as que se citan a seguir:
a) A Lei 1/2007, do 15 de xaneiro, da Academia Galega de Seguridade Pública, que crea a Academia Galega de Seguridade Pública como organismo autónomo de carácter administrativo adscrito organicamente á consellería competente en materia de interior e xustiza, que asume o patrimonio, as obrigas e os dereitos orzamentarios, así como os convenios asinados en materia de seguridade pública polo extinto Centro de Estudos Xudiciais e Seguridade Pública de Galicia.
b) A Lei 5/2007, do 7 de maio, de emerxencias de Galicia, que modificou mediante a súa disposición adicional segunda a Lei 6/2003, do 9 de decembro, de taxas, prezos e exaccións reguladoras da Comunidade Autónoma de Galicia, engadindo dúas tarifas nos seus anexos 1 e 2, tarifas que veñen gravar actuacións concretas da Administración en materia de xestión de riscos e emerxencias.
c) A Lei de orzamentos xerais da Comunidade Autónoma de Galicia para 2008, que modifica os anexos 1, 2 e 3 da Lei 6/2003, engadindo novas tarifas e modificando e suprimindo algunhas das xa existentes.
d) A orde da Consellería de Medio Ambiente e Desenvolvemento Sostible, do 23 de maio de 2007, pola que se fixan os prezos privados das doses seminais de gando bovino e de exemplares bovinos, aviarios, ovinos e porcinos producidos no Centro de Recursos Zooxenéticos de Galicia, que establece a venda de novas especies animais.
Por outra banda, cómpre engadir un novo servizo na Consellería de Medio Ambiente e Desenvolvemento Sostible, que vai aplicar dúas tarifas novas como consecuencia da realización de servizos demandados polos usuarios en materia de meteoroloxía.
Por todo iso e en virtude do parágrafo segundo da disposición adicional da Orde do 30 de xuño de 1992 e mais da disposición adicional terceira da Orde do 29 de xuño de 1994 referidas,
RESOLVO:
Primeiro.-Actualizar as táboas dos códigos de consellerías e servizos recollidas no anexo V da Orde da Consellería de Economía e Facenda do 30 de xuño de 1992, da forma que se especifica a continuación:
1. Modifícase o código 19 da Consellería de Presidencia, Administracións Públicas e Xustiza, quedando redactada como segue:
19 Academia Galega de Seguridade Pública OA
2. Engádese o código 15 á Consellería de Medio Ambiente e Desenvolvemento Sostible, coa seguinte redacción:
15 Meteogalicia
Segundo.-Actualizar o anexo VI da orde da Consellería de Economía e Facenda do 30 de xuño de 1992, do xeito seguinte:
A) Engadindo os códigos relacionados a seguir, de maneira que se insiran no lugar que lles corresponda segundo a orde preestablecida:
Ver referencia pdf "25100D005P113.PDF"
Ver referencia pdf "25100D006P115.PDF"
Terceiro.-Actualizar o anexo I da orde da Consellería de Economía e Facenda do 29 de xuño de 1994, engadindo os seguintes códigos:
36.16.04 Venda de exemplares ovinos
36.16.05 Venda de exemplares porcinos
Cuarto.-Esta resolución entrará en vigor o día 1 de xaneiro de 2008.
Santiago de Compostela, 20 de decembro de 2007.
Regina Losada Trabada
Directora xeral da Consellería
de Economía e Facenda
