Mediante resolución da Secretaría Xeral de Política Lingüística do 31 de outubro de 2007 convocáronse as probas para a obtención dos certificados de lingua galega Celga 1 e Celga 4 (DOG nº 213, do 5 de novembro).
Á vista da cantidade de solicitudes recibidas para participar nas probas para a acreditación do nivel de lingua galega Celga 4, cómpre dispor do tempo necesario para a correcta organización e realización desta proba, polo que se modifica a data do exame correspondente ao nivel Celga 4, que pasará a realizarse durante os días 26 e 27 de xaneiro de 2008. A lista provisional de admitidos publicarase o día 3 de xaneiro de 2008 na web www.xunta.es/linguagalega e nela indicarase o día en que realizará a proba cada candidato.
Se algún dos candidatos que xa presentaron a solicitude para participar no exame do día 15 de decembro non puider asistir ao exame nos días 26 e 27 de xaneiro, poderá solicitar a devolución das taxas de exame no prazo de dez días contados a partir do seguinte ao de publicación desta resolución.
Así mesmo, para dar entrada aos posibles candidatos que non se puidesen presentar o día 15 de decembro e que estivesen interesados nas probas, poderán formular a solicitude na forma e condicións indicadas na Resolución do 31 de outubro de 2007, no prazo de dez días contados a partir do seguinte ao de publicación desta resolución.
Ao mesmo tempo, faise público que, mediante resolución da Secretaría Xeral de Política Lingüística do 8 de novembro de 2007, se suprimiu, por petición da Dirección Xeral de Tributos, o réxime de exención de taxas previsto na convocatoria das probas Celga (DOG nº 213, do 5 de novembro) e mais na de tradutores e intérpretes xurados (DOG nº 210, do 30 de outubro).
Santiago de Compostela, 3 de decembro de 2007.
María Sol López Martínez
Secretaria xeral de Política Lingüística