A Lei orgánica 2/2006, do 3 de maio, de educación, establece no seu artigo 20 que a avaliación dos procesos de aprendizaxe do alumnado de educación primaria será continua e global e que terá en conta o seu progreso no conxunto das áreas.

A Orde ECI/1845/2007, do 19 de xuño, establece os elementos dos documentos básicos de avaliación do ensino básico regulado pola Lei orgánica 2/2006, do 3 de maio, de educación, así como os requisitos formais derivados do proceso de avaliación que son precisos para garantir a mobilidade do alumnado.

O Decreto 130/2007, do 28 de xuño, polo que se establece o currículo da educación primaria na Comunidade Autónoma de Galicia, dispón no seu artigo 11 que a Consellería de Educación e Ordenación Universitaria ditará as normas oportunas de procedemento en materia de avaliación e promoción do alumnado, e na súa disposición derradeira primeira autorízaa para ordenar as disposicións que sexan necesarias para a súa execución e desenvolvemento.

En consecuencia é preciso establecer as normas que regulen a avaliación do alumnado de educación primaria, así como definir os documentos en que se recolla o seu resultado, garantindo a autenticidade dos seus datos, a súa supervisión e custodia.

En virtude disto, a Consellería de Educación e Ordenación Universitaria

DISPÓN:

Artigo 1º.-Obxecto e ámbito.

O obxecto desta orde é regular a avaliación e promoción do alumnado de educación primaria nos centros docentes que impartan estas ensinanzas no ámbito territorial da Comunidade Autónoma de Galicia.

Artigo 2º.-Carácter da avaliación.

1. A avaliación do proceso de aprendizaxe do alumnado será continua, global, formativa e integradora. Terá en conta o seu progreso no conxunto de todas as áreas do currículo.

2. A avaliación levarase a cabo tendo en conta os diferentes elementos do currículo recollidos todos eles no Decreto 130/2007 e na concreción que deles fagan os centros no seu proxecto educativo. Os criterios de avaliación das áreas serán referente fundamental para valorar tanto o grao de adquisición das competencias básicas como da consecución dos obxectivos.

3. A avaliación continua ten carácter formativo e permite incorporar medidas de ampliación, enriquecemento e reforzo para todo o alumnado en función das necesidades que deriven da avaliación do proceso educativo. Estas medidas adoptaranse desde o momento en que se identifiquen e en calquera momento do ciclo, e estarán dirixidas a garantir a adquisición das aprendizaxes imprescindibles para continuar o proceso educativo.

Artigo 3º.-Resultados da avaliación.

1. Os resultados e as observacións relativas ao proceso de avaliación do alumnado consignaranse nos documentos que se determinan nesta orde.

2. Os resultados da avaliación do alumnado na educación primaria expresaranse nos termos seguintes: insuficiente (IN), suficiente (SU), ben (BE), notable (NT) e sobresaliente (SB). Considerarase cualificación negativa o insuficiente e positivas as restantes.

Artigo 4º.-Desenvolvemento do proceso de avaliación.

1. As sesións de avaliación serán coordinadas pola persoa titora do grupo e nelas participará o profesorado que imparte docencia no grupo e poderá contar co asesoramento do departamento de orientación. Nelas valoraranse as aprendizaxes acadadas por cada alumna e cada alumno, o grao de desenvolvemento das competencias básicas e, se é o caso, as medidas adoptadas ou que se deben adoptar.

2. No proceso de avaliación continua, a cualificación das áreas será decidida pola mestra ou mestre que as imparta. Na área de educación artística, a cualificación será decidida tendo en conta o progreso do alumnado no conxunto da área.

3. Ao comezo de cada ciclo e durante o primeiro mes do curso escolar, a persoa titora realizará unha avaliación inicial coa finalidade de adecuar as ensinanzas ao alumnado e facilitar a progresión satisfactoria no seu proceso de aprendizaxe, incidindo na obtención de información sobre o grao de desenvolvemento das competencias básicas. Esta avaliación incluirá a análise dos informes persoais da etapa ou ciclo anterior correspondentes ao seu alumnado e completarase coa información obtida das familias.

4. A avaliación inicial será o punto de referencia para a toma de decisións relativas ao desenvolvemento do currículo nas programacións de aula, así como para adoptar aquelas medidas de apoio, reforzo e recuperación que consideren oportunas para cada alumna ou alumno.

5. Ao longo de cada un dos cursos realizaranse para cada grupo de alumnos e alumnas, polo menos, tres sesións de avaliación que serán presididas pola persoa titora, que recollerá en acta o desenvolvemento das sesións, as cualificacións nas distintas áreas, o grao de desenvolvemento das competencias básicas e as decisións e os acordos acadados, tanto referidas ao grupo como a cada alumna e alumno.

Artigo 5º.-Avaliación do alumnado con necesidade específica de apoio educativo.

1. A avaliación do alumnado con necesidade específica de apoio educativo rexerase, con carácter xeral, polo disposto nesta orde.

2. Sen prexuízo do anteriormente indicado, na avaliación do alumnado que presente necesidades educativas especiais e que curse as ensinanzas correspondentes á educación primaria con adaptacións curriculares significativas, os criterios de avaliación establecidos nelas serán o referente fundamental para a súa avaliación e promoción.

Artigo 6º.-Promoción de ciclo.

1. Ao remate de cada un dos ciclos e como resultado do proceso de avaliación, o equipo de mestras e mestres que imparten docencia en cada grupo, na sesión final de avaliación, decidirá sobre a promoción do alumnado. A decisión será adoptada de forma colexiada, primando o criterio da persoa titora.

2. Tal e como establece o artigo 9 do Decreto 130/2007, o alumnado promocionará ao ciclo seguinte sempre que alcanzase o desenvolvemento adecuado das competencias básicas e un axeitado grao de madurez consonte a súa idade. Accederase igualmente ao ciclo seguinte cando as aprendizaxes non alcanzadas non sexan un obstáculo para seguir satisfactoriamente o novo ciclo. Neste caso, o centro educativo adoptará as medidas precisas para que o alumnado reciba os reforzos e apoios necesarios para a recuperación das ditas aprendizaxes.

3. O alumnado que non cumpra as condicións anteriores, permanecerá un ano máis no mesmo ciclo. Esta medida só poderá ser adoptada unha soa vez ao longo de toda a etapa educativa e irá acompañada dun plan específico de reforzo e recuperación organizado polos centros arredor das competencias básicas e a aquelas áreas que faciliten a superación das dificultades de aprendizaxe.

4. Sen prexuízo do establecido no punto anterior, o alumnado que presente necesidades educativas especiais poderá permanecer un ano máis na etapa de educación primaria, nos termos previstos no artigo 16.6º do Decreto 130/2007 polo que se establece o currículo da educación primaria na Comunidade Autónoma galega, sempre que esta medida favoreza a súa integración socioeducativa.

Artigo 7º.-Promoción á educación secundaria obrigatoria.

1. O alumnado promocionará á etapa de educación secundaria obrigatoria se alcanzou o desenvolvemento correspondente das competencias básicas, os obxectivos da educación primaria e un adecuado grao de madurez.

2. Accederase igualmente cando as aprendizaxes non alcanzadas non sexan un obstáculo para seguir satisfactoriamente a nova etapa. Neste caso, a persoa titora, no informe persoal, precisará as dificultades presentadas e os obxectivos da etapa non logrados, así como as medidas adoptadas ata ese momento a fin de que o centro receptor poida establecer as medidas necesarias de reforzo.

3. A escolarización do alumnado con altas capacidades intelectuais poderá flexibilizarse de tal forma que se poida adiantar, logo da avaliación psicopedagóxica, o inicio da escolarización na etapa de educación secundaria obrigatoria, sempre que se considere que esta medida é a máis adecuada para o desenvolvemento equilibrado do alumnado e para a súa socialización.

Artigo 8º.-Información da avaliación.

1. Finalizada cada unha das sesións de avaliación, as nais/pais ou persoas titoras legais do alumnado serán informados dos seus resultados, da evolución académica dos seus fillos e fillas, así como das decisións adoptadas para o reforzo e/ou recuperación, se fose o caso.

2. Será competencia da persoa titora proporcionar esta información, segundo o modelo de documento que o centro determine, así como a de establecer canles de comunicación coas familias do alumnado.

Artigo 9º.-Documentos oficiais de avaliación.

Os documentos oficiais de avaliación na educación primaria son os seguintes: actas de avaliación, expediente académico, historial académico de educación primaria e informe persoal por traslado.

Artigo 10º.-Actas de avaliación.

1. Ao final de cada un dos tres ciclos da educación primaria estenderase acta de avaliación que comprenderá a relación nominal do alumnado de cada grupo e os resultados da súa avaliación. As actas serán pechadas ao remate do período lectivo.

2. Nestas actas reflectiranse os resultados da avaliación de cada unha das áreas nos termos establecidos no artigo 3 desta orde, e deberán expresar ademais as decisións sobre a permanencia no ciclo ou a promoción ao seguinte, así como as medidas de reforzo (RE) ou adaptación curricular significativa (ACS), para as áreas que as precisen.

3. Nas actas do 3º ciclo de educación primaria farase constar a proposta de acceso á educación secundaria para o alumnado que estea nas condicións previstas no artigo 7º desta orde, serán asinadas pola persoa titora do grupo e contarán co visto e prace do/a director/a do centro educativo. A súa custodia e arquivo corresponde aos centros educativos.

4. As actas de avaliación axustaranse aos modelos que figuran no anexo I desta orde.

Artigo 11º.-Expediente académico.

1. O expediente académico é o documento de avaliación individual do alumnado que incluirá os datos identificativos do centro, da alumna ou alumno e a información relativa á súa escolarización.

2. No expediente académico quedará constancia dos resultados da avaliación das áreas de cada un dos tres ciclos da educación primaria, no momento en que o alumnado promocione ao ciclo ou á etapa seguinte, así como das medidas de atención á diversidade adoptadas, reforzos educativos aplicados ou adaptacións curriculares significativas realizadas, expresando estas dúas últimas circunstancias cos termos (RE) e (ACS), respectivamente.

3. A custodia e arquivo dos expedientes académicos corresponde aos centros educativos.

4. O expediente académico axustarase ao modelo que figura no anexo II desta orde.

Artigo 12º.-Historial académico de educación primaria.

1. O historial académico de educación primaria é o documento oficial que reflicte os resultados das avaliacións e as decisións relativas ao progreso académico da alumna ou alumno ao longo da etapa. Ten valor acreditativo dos estudos realizados.

2. O historial académico da educación primaria recollerá os datos identificativos do alumnado, os anos da súa escolarización e os centros onde se realizaron os estudos, as áreas cursadas e os resultados obtidos en cada ciclo, no momento en que o alumnado promocione ao ciclo ou á etapa seguinte, con indicación de ACS se fose o caso, a decisión sobre promoción ao ciclo seguinte coa data correspondente ou a proposta de acceso á educación secundaria obrigatoria.

3. O historial académico da educación primaria será estendido en impreso oficial. Será asinado pola persoa titora e levará o visto e prace do director ou directora do centro que garantirá a autenticidade dos datos nel reflectidos e a súa custodia.

4. Ao finalizar a etapa, o historial académico da educación primaria, xunto co anterior libro de escolaridade, se fose o caso, será entregado ás nais, pais ou titores legais do alumnado e unha copia será enviada ao centro de educación secundaria, por pedimento deste, xunto co informe individualizado de final de etapa. A circunstancia do seu envío, coa data en que se efectúa, quedará reflectida no expediente académico.

5. O historial académico axustarase ao modelo que figura no anexo III desta orde.

6. A formalización e custodia do historial académico da educación primaria será supervisada pola Inspección educativa.

Artigo 13º.-Informe persoal por traslado.

1. O informe persoal por traslado é o documento oficial que ten como finalidade garantir a continuidade do proceso de aprendizaxe ao alumnado que se traslade a outro centro sen ter rematado o ciclo.

2. Contará cos elementos seguintes:

a) Resultados parciais da avaliación.

b) Constancia da aplicación, se é o caso, de medidas de reforzo ou calquera outra dentro da atención á diversidade.

c) Adaptacións curriculares realizadas.

d) Calquera outra información referente ao proceso educativo da alumna ou alumno.

3. O informe persoal será elaborado e asinado pola persoa titora, a partir da información de todo o profesorado que imparta docencia no grupo, e levará o visto e prace do director ou directora do centro.

4. O informe persoal por traslado axustarase ao modelo que figura no anexo IV desta orde.

Artigo 14º.-Informe de avaliación final de ciclo.

1. Ao remate de cada un dos ciclos da educación primaria, a persoa titora elaborará un informe individualizado de cada alumna e alumno que recollerá os aspectos máis relevantes sobre o proceso de aprendizaxe, as decisións sobre as medidas para a atención á diversidade, as medidas de reforzo ou adaptacións curriculares adoptadas, así como todos aqueles aspectos do alumnado que permitan facer un mellor seguimento do seu proceso de aprendizaxe e madurez persoal.

2. O informe iniciarase ao comezo de cada ciclo, recollerá a información resultante do proceso da avaliación continua ao longo de cada curso, e completarase ao remate do ciclo.

3. Ao remate de cada ciclo a persoa titora poñerá os informes do alumnado do seu grupo á disposición da persoa titora do ciclo seguinte.

4. Xúntase un modelo orientativo de informe como anexo V desta orde.

Artigo 15º.-Informe de avaliación final de etapa.

1. Ao finalizar a educación primaria, a persoa titora de cada grupo de 6º curso elaborará un informe individualizado do seu alumnado que recolla o progreso de cada alumna e de cada alumno tendo en conta os informes de anteriores ciclos, o grao de aprendizaxe acadado referido aos obxectivos e ás competencias básicas, a súa madurez, e aqueles aspectos relevantes que poidan incidir na continuidade do seu proceso de formación.

2. Este informe xuntarase ao historial académico da educación primaria para garantir a continuidade do proceso de formación no paso á educación secundaria obrigatoria.

3. Na coordinación cos centros de educación secundaria obrigatoria garantirase a confidencialidade de toda a información.

4. Xúntase un modelo orientativo de informe como anexo V desta orde.

Artigo 16º.-Cambio de centro.

1. Cando unha alumna ou un alumno se traslade dun centro a outro, o centro de orixe remitirá ao centro de destino, por pedimento deste, o historial académico de educación primaria. Se o cambio se produce ao remate do ciclo, o historial académico irá acompañarado do informe de avaliación final de ciclo. Se o cambio se produce sen ter rematado o ciclo, xuntarase do informe persoal por traslado, garantindo que os datos recollidos no historial académico concordan co expediente que garda o centro de orixe.

2. O centro receptor abrirá o correspondente expediente académico.

3. Para axilizar os trámites de matriculación no novo centro, as nais, pais ou titores legais do alumnado poderán solicitar no centro de orixe unha certificación que permitirá iniciar os trámites que fosen precisos antes do envío de toda a documentación indicada no punto 1.

4. A matrícula adquirirá carácter definitivo unha vez recibido o historial académico debidamente cuberto.

5. Se o desprazamento se producise a un centro que non imparta as ensinanzas do sistema educativo español, dentro ou fóra de España, o historial académico permanecerá no centro de orixe, que emitirá unha certificación académica completa da alumna ou alumno. O historial académico quedará custodiado no centro en que estivo escolarizado ata a súa reincorporación ao sistema educativo español ou ata o remate dos estudos estranxeiros equivalentes á educación primaria. Neste último caso, será entregado ao alumnado.

Artigo 17º.-Avaliación dos procesos de ensino e da práctica docente.

As mestras e mestres avaliarán, nas sesións de avaliación do seu grupo, os procesos de ensino e a súa práctica docente en relación coa adecuación ao alumnado, co logro dos obxectivos da etapa e das áreas, e co desenvolvemento das competencias básicas. Esta avaliación incluirá, polo menos, os seguintes aspectos:

a) A adecuación dos obxectivos, contidos e criterios de avaliación ás características e necesidades do alumnado.

b) As aprendizaxes acadadas polo alumnado.

c) As medidas de atención á diversidade aplicadas.

d) A programación e o seu desenvolvemento, a organización da aula, o aproveitamento dos recursos do centro e os procedementos de avaliación do alumnado.

e) A coordinación entre os mestres e mestras do ciclo e entre os diferentes ciclos e do profesorado do terceiro ciclo co de educación secundaria.

Artigo 18º.-Avaliación de diagnóstico.

1. De acordo co artigo 21 da Lei orgánica 2/2006, do 3 de maio, de educación, e co artigo 17 do Decreto 130/2007, do 28 de xuño, polo que se establece o currículo da educación primaria na Comunidade Autónoma de Galicia, ao finalizar o segundo ciclo da educación primaria, todos os centros realizarán unha avaliación de diagnóstico con referencia ás competencias básicas alcanzadas polo alumnado. Esta avaliación, que non terá efectos académicos, terá carácter formativo e orientador para os centros e informativo para as familias e para o conxunto da comunidade educativa.

2. A Consellería de Educación e Ordenación Universitaria facilitaralles aos centros educativos os modelos precisos, co fin de que todos poidan realizala adecuadamente.

Disposiciones transitorias

Primeira.-Finalizada, no curso 2006-2007, a vixencia dos libros de escolaridade do ensino básico para efectos de acreditación dos estudos realizados, deberá redactarse neles, na páxina que corresponda ao derradeiro curso, a dilixencia de peche e inutilizaranse as páxinas restantes.

A citada dilixencia, asinada pola secretaria ou secretario do centro e co visto e prace do director ou a directora, consignarase nos seguintes termos: Dilixencia para facer constar que este libro de escolaridade queda pechado de acordo co establecido na disposición transitoria primeira da Orde do 23 de novembro de 2007 pola que se regula a avaliación na educación primaria na Comunidade Autónoma de Galicia.

Cando a apertura do historial académico supoña a continuación do anterior libro de escolaridade do ensino básico, reflectirase naquel documento a serie e o número do libro de escolaridade. Estas circunstancias figurarán igualmente no correspondente expediente académico.

Segunda.-Independentemente dos períodos de implantación que, para a educación primaria, prevé o Real decreto 806/2006, do 30 de xuño, polo que se establece o calendario de aplicación da nova ordenación do sistema educativo, establecida pola Lei orgánica 2/2006, do 3 de maio, de educación, os resultados da avaliación expresaranse nos termos establecidos no artigo 3º desta orde, para todos os ciclos desta etapa. Porén, a avaliación de diagnóstico farase a partir do ano académico 2008-2009.

Terceira.-Durante os cursos 2007-2008 e 2008-2009, o informe individualizado de final de etapa a que se refire o artigo 15.1º desta orde, expresará soamente o grao de aprendizaxe referido aos obxectivos acadados polo alumnado.

Disposición derrogatoria.-Derrogación normativa.

Queda derrogada a Orde do 6 de maio de 1993 pola que se regula a avaliación na educación primaria na Comunidade Autónoma de Galicia e o artigo 10.1º da Orde do 6 de outubro de 1995 pola que se regulan as adaptacións do currículo nas ensinanzas de réxime xeral.

Disposicións derradeiras

Primeira.-Autorízase a Dirección Xeral de Ordenación e Innovación Educativa a ditar as disposicións que sexan precisas para a execución e desenvolvemento do establecido nesta orde.

Segunda.-Esta orde entrará en vigor o día seguinte ao da súa publicación no Diario Oficial de Galicia.

Santiago de Compostela, 23 de novembro de 2007.

Laura Sánchez Piñón

Conselleira de Educación e Ordenación

Universitaria

Ver referencia pdf "23200D001P006.PDF"

b) NOMEAMENTOS PRESIDENCIA