Dentro das actividades programadas para o ano 2007, e conforme as funcións atribuídas pola Lei 1/2007, do 15 de xaneiro, da Academia Galega de Seguridade Pública, anúnciase a realización, en colaboración coa Universidade da Coruña, do cuarto seminario permanente de seguridade pública, que tratará sobre ordenación do territorio e protección do patrimonio histórico e do ambiente: aspectos administrativos, penais e sociais, e que se deberá desenvolver conforme as seguintes bases:
-Obxectivos xerais do seminario permanente de seguridade pública:
* Coñecer a crecente transcendencia para o sistema social actual das problemáticas relacionadas coa seguridade.
* Ver como os cambios sociais xeran unha multiplicidade de factores obxectivos de risco.
* Analizar cales son os factores ou fenómenos xeradores de inseguridade e as solucións que se achegan desde as institucións e desde os estados.
-Obxectivo específico do cuarto seminario permanente de seguridade pública, sobre ordenación do territorio e protección do patrimonio histórico e do ambiente: aspectos administrativos, penais e sociais:
Realizar un estudo e reflexión sobre a protección da ordenación do territorio en Galicia, de tal forma que se logre unha visión global desta problemática, unha comprensión das normas que a regulan e unha adecuada coordinación das autoridades encargadas de reprimir os comportamentos irregulares neste ámbito.
-Destinatarios: o seminario vai dirixido a persoal técnico das administracións e institucións públicas que teñan relación con esta materia, estudantes universitarios, persoal de seguridade e outros colectivos interesados nesta temática.
-Inscrición e admisión: a inscrición dos participantes será totalmente gratuíta. A admisión realizarase por rigorosa orde de entrada de solicitudes no rexistro do Academia Galega de Seguridade Pública.
-Prazas: 80 prazas.
-Solicitudes:
1. O persoal que desexe participar neste curso cubrirá a instancia que figura no anexo desta publicación, ou na páxina web http://agasp.xunta.es.
2. O prazo para a presentación de instancias rematará o día 11 de decembro de 2007, ás 14.00 horas.
3. As instancias deberán enviarse á Academia Galega de Seguridade Pública, sita na avenida da Cultura, s/n, 36680 A Estrada; ou ben poden entregarse en calquera dos lugares previstos no artigo 38.4º da Lei 30/1992, do 26 de novembro, de réxime xurídico das administracións públicas e do procedemento administrativo común.
-Datas: o seminario realizarase durante os días 13 e 14 de decembro.
O horario será das 9.30 ás 14.00 horas e pola tarde a partir das 16.30 horas o día 13, e o día 14 das 9.30 ás 14.00 horas, cunha duración de 12 horas lectivas.
-Contido:
1. Urbanismo e ordenación do territorio.
2. A ordenación do territorio en Galicia: competencias e conflitos.
3. Aspectos esenciais de disciplina urbanística.
4. Urbanismo e xurisdición contencioso-administrativa.
5. Urbanismo e xurisdición penal.
6. A construción en solos de especial protección e as edificacións non autorizables en solo non urbanizable.
7. A prevaricación urbanística.
-Relación de admitidos: a relación de admitidos farase publica o día 12 de decembro a partir das 14.00 horas, no taboleiro de anuncios da Academia Galega de Seguridade Pública e na páxina web http://agasp.xunta.es, ou ben poden coñecer e confirmar a súa asistencia chamando ao teléfono: 986 59 02 41.
-Lugar: o seminario desenvolverase na cidade da Coruña, e queda por concretar o seu lugar de realización, que se comunicará previamente xunto coa lista de admitidos.
-Certificado de asistencia: ao remate do seminario entregaráselles un certificado de asistencia a aquelas persoas que acrediten a súa participación continuada nel.
-Modificacións: a Academia Galega de Seguridade Pública poderá modificar o desenvolvemento do seminario para adaptalo ás necesidades da Administración e ás continxencias que poidan xurdir.
A Estrada, 21 de novembro de 2007.
Carlos Suárez-Mira Rodríguez
Director xeral Academia Galega de Seguridade Pública
Ver referencia pdf "23000D007P014.PDF"