I. Antecedentes.

I.1. Esta consellería mediante Orde do 10 de abril de 2007 acordou, de conformidade co punto 5.a) do artigo 85 da Lei 9/2002, outorgar a aprobación definitiva parcial ao Plan Xeral de Ordenación Municipal do Concello de Paradela suspendendo a aprobación do plan xeral naqueles ámbitos que se sinalaban na propia orde, quedando pendentes da corrección das súas deficiencias polo concello.

I.2. O Pleno do Concello de Paradela aprobou o 26-7-2007 as modificacións introducidas no Plan Xeral de Ordenación Municipal, logo dos informes emitidos polos servizos técnicos e xurídicos municipais en data do 20-7-2007.

I.3. O expediente municipal foi remitido á Consellería de Política Territorial, Obras Públicas e Transportes para resolver sobre a súa aprobación definitiva, tendo entrada no rexistro desta en data do 24-8-2007.

II. Consideracións e fundamentación.

II.1. De conformidade co disposto no artigo 89.1º da Lei 9/2002, do 30 de decembro, de ordenación urbanística e protección do medio rural de Galicia, correspóndelle á conselleira de Política Territorial, Obras Públicas e Transportes resolver sobre a aprobación definitiva do Plan Xeral de Ordenación Municipal.

II.2. A Dirección Xeral de Urbanismo elevou en data do 7-11-2007 un informe-proposta no que se analiza o contido da documentación presentada nos seguintes termos:

1. Para o cumprimento da Orde do 10 de abril de 2007, o Concello de Paradela presenta un exemplar do Plan Xeral de Ordenación Municipal no que aparecen corrixidas as deficiencias sinaladas nela.

2. O concello deberá remitir dous exemplares máis do documento (Orde do 26 de outubro de 1984), para que esta consellería proceda a efectuar a dilixencia de aprobación definitiva.

III. Resolución.

En virtude de todo o anterior, de conformidade co disposto no artigo 85.5º a) da Lei 9/2002, do 30 de decembro, de ordenación urbanística e protección do medio rural de Galicia,

RESOLVO:

1. Outorgar a aprobación definitiva ao Plan Xeral de Ordenación Municipal do Concello de Paradela.

2. De conformidade co disposto polos artigos 92 da Lei 9/2002, e 70 da Lei 7/1985, do 2 de abril, reguladora das bases de réxime local, o concello deberá publicar no BOP a normativa e ordenanzas do Plan Xeral de Ordenación Municipal aprobado definitivamente.

3. Contra esta orde, que pon fin á vía administrativa, cabe interpoñer recurso contencioso-administrativo ante a sala correspondente do Tribunal Superior de Xustiza de Galicia, no prazo de dous meses, que se contarán desde o día seguinte ao da súa publicación, segundo dispoñen os artigos 10 e 46 da Lei 29/1998, do 13 de xullo, reguladora da xurisdición contencioso-administrativa.

4. Notifíqueselle esta orde ao concello e publíquese no Diario Oficial de Galicia.

Santiago de Compostela, 8 de novembro de 2007.

María José Caride Estévez

Conselleira de Política Territorial, Obras Públicas

e Transportes