Por resolución do director xeral da Axencia Galega de Desenvolvemento Rural-Agader do 23 de marzo de 2007 aprobáronse as bases reguladoras das subvencións aos proxectos dinamizadores das áreas rurais de Galicia e convocáronse as correspondentes para o período 2007-2008 (DOG nº 71, do 12 de abril).

Tendo en conta o elevado número de solicitudes presentadas e da súa calidade, que teñen encadramento nalgunha das medidas de desenvolvemento rural do Eixo 3, Calidade de vida nas zonas rurais e diversificación da economía rural, do Programa de Desenvolvemento Rural de Galicia 2007-2013, que se vai financiar co Fondo Europeo Agrario de Desenvolvemento Rural (Feader) e sendo previsible a súa próxima aprobación, considérase conveniente facer uso das dispoñibilidades orzamentarias de fondos Feader existentes nos orzamentos de 2007.

En consecuencia, cómpre ampliar o importe dos créditos cofinanciados con cargo a fondos Feader destinados ao financiamento das subvencións que poderán ser concedidas ao abeiro da referida Resolución do 23 de marzo de 2007.

O Consello de Dirección de Agader, na súa reunión do 21 de xuño de 2007, delegou no director xeral de Agader a aprobación dos procedementos de selección de actuacións con cargo ao Fondo Galego de Desenvolvemento Rural así como para súa xestión orzamentaria e a distribución dos seus recursos. Neste marco, procede a aprobación da ampliación do crédito previsto na convocatoria das subvencións aos proxectos dinamizadores das áreas rurais de Galicia.

Polo que antecede,

RESOLVO:

1. Incrementar o crédito destinado ás subvencións aos proxectos dinamizadores das áreas rurais de Galicia, convocadas para o período 2007-2008 por Resolución do 23 de marzo de 2007. O incremento, que terá a mesma distribución por anualidades prevista na convocatoria (60% para a anualidade 2007 e 40% para a anualidade 2008), é o seguinte:

Partida Importe

02.01 02/31 656800 4.400.000 €

02.01 02/32 656800 4.500.000 €

02.01 02/04 656800 1.129.135 €

Este incremento de crédito non reabre o prazo de presentación de solicitudes.

2. Aqueles proxectos que resulten subvencionados con cargo ao Feader deberán cumprir cos requisitos e obrigas derivados da natureza deste fondo, de acordo co Regulamento (CE) nº 1698/2005 e cos regulamentos de aplicación, o Regulamento (CE) nº 1974/2006 e o Regulamento (CE) nº 1975/2006.

3. Contra esta resolución cabe interpor recurso potestativo de reposición ante o Consello de Dirección de Agader no prazo dun mes contado desde o día seguinte ao da súa publicación no DOG, ou directamente recurso contencioso-administrativo, no prazo de dous meses contados desde o día seguinte ao da citada publicación.

Santiago de Compostela, 29 de outubro de 2007.

Edelmiro López Iglesias

Director xeral da Axencia Galega de Desenvolvemento Rural