Dentro das actividades programadas para o ano 2007 en colaboración coa Deputación Provincial de Ourense, en virtude do convenio de formación asinado entre a Consellería de Presidencia, Administracións Públicas e Xustiza e a Deputación Provincial de Ourense, anúnciase a realización dun curso sobre a policía local e as ordenanzas municipais, que deberá desenvolverse conforme as seguintes bases:
Obxectivos:
-Coñecer a normativa básica local, respecto do dereito administrativo e as ordenanzas municipais que afectan o traballo da policía local.
-Saber cal é o desempeño profesional e o papel dos corpos de policía local no control da execución e o cumprimento das ordenanzas.
Publicación.
Esta actividade formativa, e tamén todas aquelas que se desenvolvan en colaboración coa Deputación Provincial de Ourense, serán obxecto de publicación no Diario Oficial de Galicia e no BOP de Ourense.
Destinatarios.
-Persoal das entidades locais da provincia pertencente aos corpos de Policía local.
-Técnicos das entidades locais da provincia que polo seu posto de traballo estean vencellados coa materia obxecto de estudo no curso.
Inscrición.
A inscrición dos participantes será totalmente gratuíta.
Prazas.
30 prazas.
Solicitudes.
1. O persoal que desexe participar neste curso deberá presentar, cuberta á máquina ou con letra moi clara, a instancia que figura no anexo.
2. O prazo para a presentación de instancias rematará o día 2 de novembro ás 14.00 horas.
3. As instancias deberán enviarse á Deputación Provincial de Ourense-Departamento de Formación Continua (fax: 988 38 52 15): rúa Progreso, nº 30, 32003 Ourense; ou ben poden entregarse en calquera dos lugares previstos no artigo 38.4º da Lei 30/1992, do 26 de novembro, de réxime xurídico das administracións públicas e do procedemento administrativo común.
Datas.
O curso desenvolverase durante os días 7, 8, 13, 14 e 15 de novembro de 2007.
O horario será de 16.30 a 20.30 horas, cunha duración de 20 horas lectivas.
Contido.
1. Normas regulamentarias das entidades locais.
-Procedemento para a elaboración das disposicións xerais.
-Requirimentos.
-Clases de normas.
-Regulamentos dos entes locais.
2. Instrucións e ordes de servizo:
-Límite e discrecionalidade administrativa.
3. Ordenanzas de policía e bo goberno.
-O papel dos policías locais.
4. Análise e estudo de determinadas ordenanzas municipais que máis afecten o traballo policial.
Relación de admitidos.
A relación de admitidos faraa pública o día 5 de novembro a partir das 14.00 horas, tanto a Deputación Provincial de Ourense como a Academia Galega de Seguridade Pública, os interesados poden coñecer e confirmar a súa asistencia chamando aos teléfonos 986 59 02 42/43/44 (Agasp) e na páxina web http://agasp.xunta.es, ou 988 38 51 42 (Departamento de Formación Continua da Deputación Provincial de Ourense).
Lugar.
O curso desenvolverase nas aulas do centro cultural da Deputación Provincial de Ourense sito na rúa Progreso nº 30.
Certificado de asistencia.
Ao remate do curso entregaráselles un certificado de asistencia a aquelas persoas que acrediten a súa participación continuada.
Modificacións.
Tanto a Academia Galega de Seguridade Pública como a Deputación Provincial de Ourense, se é o caso, poderán modificar o desenvolvemento normal do curso para adaptalo ás necesidades da Administración e ás continxencias que poidan xurdir.
A Estrada, 19 de outubro de 2007.
Carlos Suárez-Mira Rodríguez
Director xeral da Academia Galega
de Seguridade Pública
Ver referencia pdf "20800D005P019.PDF"
