Polo Decreto 138/2007, do 5 de xullo, estableceuse o procedemento e réxime da habilitación do persoal técnico público dependente da Xunta de Galicia para o exercicio das actuacións comprobatorias das condicións materiais e técnicas de seguridade e saúde nas empresas e centros de traballo radicados en Galicia, en colaboración coa Inspección de Traballo e Seguridade Social, conforme o establecido no artigo 9.2º e 9.3º e a disposición adicional décimo quinta da Lei 31/1995, do 8 de novembro, de prevención de riscos laborais.

O artigo 4 do citado decreto establece que o persoal que, reunindo os requisitos establecidos nel, pretenda obter a habilitación, dirixirá a correspondente solicitude á Dirección Xeral de Relacións Laborais.

Procede, polo tanto, abrir un prazo de presentación de solicitudes par obter a citada habilitación.

Por iso, en virtude do Decreto 536/2005, do 6 de outubro, polo que se establece a estrutura orgánica e a distribución de competencias da Consellería de Traballo, en exercicio das facultades que me confire o artigo 34 da Lei 1/1983, do 22 de febreiro, reguladora da Xunta e da súa Presidencia,

DISPOÑO:

Artigo 1º.-Obxecto.

Convócase a habilitación de doce prazas de persoal técnico para o exercicio das actuación comprobatoria das condicións materiais ou técnicas de seguridade e saúde nas empresas e centros de traballo radicados en Galicia.

Artigo 2º.-Requisitos.

Poderán participar nesta convocatoria de carácter voluntario os funcionarios ou funcionarias, dos grupos A ou B da Xunta de Galicia que estean adscritos ou adscritas a algún dos centros provinciais de Seguridade e Saúde Laboral e que cumpran dentro do prazo de presentación de solicitude os requisitos exixidos no artigo 3 do Decreto 138/2007, do 5 de xullo.

Artigo 3º.-Solicitudes e prazo de presentación.

1. Os interesados presentarán as súas solicitudes en calquera das formas establecidas no artigo 38.4º la Lei 30/1992, do 26 de novembro, de réxime xurídico das administracións públicas e do procedemento administrativo común, dirixidas á Dirección Xeral de Relacións Laborais, dentro do prazo de vinte días contados a partir do día seguinte ao da publicación desta orde no Diario Oficial de Galicia.

2. A solicitude deberá ir acompañada daquela documentación que xustifique o cumprimento dos requisitos establecidos no artigo 2 desta orde, así como a xustificación do punto 2º letra c) do artigo 4 do Decreto 138/2007, do 5 de xullo.

Artigo 4º.-Resolución.

1. O conselleiro de Traballo, por proposta da titular da Dirección Xeral de Relacións Laborais, logo de informe da xefatura do respectivo centro e da Subdirección Xeral de Seguridade e Saúde, emitirá resolución en que se autorice a habilitación, tendo en conta os criterios establecidos no número 2º do artigo 4 do Decreto 138/2007, do 5 de xullo.

2. O prazo máximo para resolver e notificar a resolución de habilitación será de tres meses contados a partir do remate do prazo de convocatoria, podendo os interesados entender desestimadas as súas solicitudes no caso de silencio administrativo.

3. As resolucións notificaránselles aos interesados e destas darase traslado aos centros provinciais correspondentes e á Administración xeral do Estado, a través da Dirección Territorial da Inspección de Traballo e Seguridade Social.

Artigo 5º.-Documento acreditativo da habilitación.

1. A Dirección Xeral de Relacións Laborais emitirá a correspondente credencial ou tarxeta de identificación que será persoal e intransferible e onde constará a denominación: técnico/a habilitado/a (artigo 9.2º e 9.3º da Lei 31/1995, do 8 de novembro, de prevención de riscos laborais) e que deberá conter os seguintes datos: cabeceira oficial en que figuren as seguintes inscricións: Xunta de Galicia. Consellería de Traballo. Dirección Xeral de Relacións Laborais, número de tarxeta, nome e apelidos do titular e data de expedición.

2. O uso deste documento por parte do funcionario correspondente está limitado ao exercicio das funcións comprobatorias a que se refire o artigo 1º desta orde.

3. A identificación deberá ser mostrada nas visitas correspondentes ás actuacións comprobatorias das condicións materiais ou técnicas de seguridade e saúde nas empresas e centros de traballo radicados en Galicia que realicen os técnicos habilitados.

4. O titular do documento procederá á súa devolución no momento en que a habilitación perda a súa validez, por calquera das causas establecidas no artigo 10 do Decreto 138/2007, do 5 de xullo.

Artigo 6º.-Dilixencia no libro de visitas.

O persoal técnico habilitado poderá expedir dilixencia de actuación no Libro de Visitas que debe existir en cada centro de traballo facendo constar o seu nome e apelidos e a condición de persoal técnico habilitados, así como a súa sinatura.

Disposicións derradeiras

Primeira.-Facúltase a directora xeral de Relacións Laborais para que dite as resolucións que sexan precisas para o desenvolvemento e aplicación desta orde e para realizar os anuncios das posibles convocatorias posteriores de novos técnicos habilitados que deberán ser publicadas no taboleiro de anuncios da consellería, das catro delegacións provincias e dos catro centros de seguridade e saúde laboral. Nas ditas convocatorias observaranse os prazos e procedementos para resolver recollidos nesta orde.

Segunda.-Esta orde entrará en vigor o mesmo día da súa publicación no Diario Oficial de Galicia.

Santiago de Compostela, 11 de outubro de 2007.

Ricardo Jacinto Varela Sánchez

Conselleiro de Traballo