A Xunta de Goberno Local do Concello de Vigo, na sesión ordinaria do 2 de outubro de 2006 acordou a cesión dunha parcela á Comunidade Autónoma de Galicia para a instalación da escola superior de arte dramática de Galicia.
A Secretaría Xeral e do Patrimonio tramitou o correspondente expediente de aceptación de cesión, de conformidade co disposto nos artigos 16, 17 e 23 da Lei 3/1985, do 12 de abril, do patrimonio da Comunidade Autónoma de Galicia e 33, 34 e 38 do Decreto 50/1989, do 9 de marzo, polo que se aproba o regulamento para a execución da dita lei.
Na súa virtude, por proposta do conselleiro de Economía e Facenda, feita nos termos nos que o Concello de Vigo acordou a cesión e logo de deliberación do Consello da Xunta de Galicia, na súa reunión do día vinte de setembro de dous mil sete,
DISPOÑO:
Artigo 1º.-Acéptase a cesión, a título gratuíto, feita polo Concello de Vigo, dun terreo que se describe como segue:
Parcela E4-2, sita na etapa III, fase A, do polígono de Navia, concello de Vigo. Mide a superficie de oito mil cincocentos metros cadrados. Linda: norte, parcelas S4-1 e S4-2; sur, espazo libre P-3; leste, rúa 2-f; e oeste, parcela E4-1.
Inscrita no Rexistro da Propiedade nº tres de Vigo, parcela nº 72091, libro 1316, folio 141, inscrición primeira.
Artigo 2º.-O destino do inmoble será a construción dunha escola de arte dramática, a cargo da Consellería de Educación e Ordenación Universitaria.
Artigo 3º.-A Consellería de Economía e Facenda, a través da Secretaría Xeral e do Patrimonio, procederá á formalización da cesión no correspondente documento público.
Disposición derradeira
A Consellería de Economía e Facenda, a través da Secretaría Xeral e do Patrimonio, levará a cabo todos os trámites necesarios para a efectividade deste decreto.
Santiago de Compostela, vinte de setembro de dous mil sete.
Emilio Pérez Touriño
Presidente
José Ramón Fernández Antonio
Conselleiro de Economía e Facenda