Dentro do programa de actividades que a Academia Galega de Seguridade Pública ten previsto realizar no ano 2007, e conforme coas funcións atribuídas pola Lei 1/2007, do 15 de xaneiro, de creación da Academia Galega de Seguridade Pública, anúnciase a convocatoria de 2 cursos de segundo nivel de condución de vehículos todoterreo, que deberán desenvolverse conforme ás seguintes bases:
Primeira.-Obxectivos.
Dotar o persoal voluntario de protección civil de coñecementos teórico-prácticos para manexo de vehículos todoterreo necesarios para desempeñar as súas tarefas.
Segunda.-Destinatarios.
Os cursos van dirixidos aos membros das agrupacións de voluntarios e técnicos de protección civil da comunidade autónoma, que teñan carné de conducir e superado o curso básico de protección civil, e que utilicen os vehículos todoterreo.
Terceira.-Desenvolvemento.
1. Prazas: o número de prazas ofertadas para cada curso é de dez (10).
2. Duración e data: os cursos terán lugar os días 3 e 4 de outubro do ano 2007, cunha duración de dez horas lectivas.
3. Lugar: Academia Galega de Seguridade Pública.
Cuarta.-Solicitudes e prazo de inscrición
1. A inscrición dos solicitantes é gratuíta.
2. O persoal que dexexe participar nestes cursos deberá presentar, cuberta á máquina ou con letra moi clara, a solicitude que figura no anexo.
3. O prazo para a presentación de instancias rematará o día 24 de setembro de 2007.
4. As solicitudes deberán estar asinadas polo/a presidente/a da agrupación e co selo desta, e no caso de haber máis dunha solicitude da mesma agrupación, relacionadas por orde de preferencia. Este será requisito indispensable para ser admitido no curso.
5. As solicitudes deberán enviarse por correo á sede da Academia Galega de Seguridade Pública: avenida da Cultura, s/n, 36680 A Estrada, ao fax nº 986 59 09 88, ou ben poden entregarse en calquera dos lugares previstos no artigo 38.4º da Lei 30/1992, do 26 de novembro, de réxime xurídico das administracións públicas e do procedemento administrativo común.
Quinta.-Contido.
-O vehículo e o medio.
-Características técnicas (ángulos de ataque, central e de saída, inclinación lateral).
Técnicas de condución ( barro, neve, area, terreos accidentados, baixadas e subidas extremas).
-Rescate do vehículo (tracción directa, poleas e reenvíos, ancoraxes).
-Medios improvisados.
-Protocolos de seguridade que hai que utilizar nas manobras de rescate.
-Accesorios útiles e inútiles.
-Mantemento do vehículo.
-Lexislación.
-Conservación da natureza.
Sexta.-Relación de admitidos.
A relación de participantes admitidos para a realización do curso exporase no taboleiro de anuncios da Academia Galega de Seguridade Pública, sen prexuízo da oportuna notificación aos seleccionados con antelación suficiente á realización do curso. Tamén poden confirmar a súa admisión chamando ao teléfono 986 59 02 46 ou consultando a páxina web http://agasp.xunta.es.
Sétima.-Asistencia.
É obrigatoria a asistencia e puntualidade en todas as actividades do curso. A falta de asistencia, mesmo cando sexa xustificada, en máis dun 10% das horas lectivas programadas determinará a cualificación de non apto no curso.
Oitava.-Certificado de aproveitamento.
Ao remate dos cursos entregaráselles un certificado de asistencia e aproveitamento a aquelas persoas que acrediten a súa asistencia continuada e superen as correspondentes probas de coñecementos.
Novena.-Modificacións.
A Academia Galega de Seguridade Pública poderá modificar o desenvolvemento dos cursos para adaptalos ás necesidades da Administración e ás continxencias que poidan xurdir.
A Estrada, 21 de agosto de 2007.
P.A. (Decreto 23/1993, do 11 de febreiro)
Montserrat Bolívar Chinchilla
Secretaria xeral da Academia Galega
de Seguridade Pública
Ver referencia pdf "16700D003P016.PDF"