En cumprimento do disposto na normativa legal vixente sobre o rexistro e depósito de convenios colectivos de traballo, Real decreto 1040/1981, artigo 2.e), e para os efectos previstos nel, faise público que no correspondente servizo desta dirección xeral presentouse o acordo da Comisión negociadora do IV convenio colectivo único para o persoal laboral da Xunta de Galicia, acadado na xuntanza que tivo lugar o 3 de xullo de 2007, consistente na inclusión dunha disposición transitoria novena (bis).

A Dirección Xeral de Relacións Laborais

ACORDA:

Primeiro.-Ordenar a inscrición do referido acordo no rexistro correspondente desta dirección xeral.

Segundo.-Dispoñer a súa publicación no Diario Oficial de Galicia.

Santiago de Compostela, 19 de xullo de 2007.

P.A.

José Vázquez Portomeñe

Secretario xeral da Consellería de Traballo

ANEXO

Reunida a comisión negociadora de modificación do IV convenio coletivo único para o persoal laboral da Xunta de Galicia, integrada polo Comité Intercentros do Persoal Laboral da Xunta de Galicia e os representantes da Administración, o 3 de xullo de 2007, acorda modificar o vixente convenio colectivo do xeito seguinte:

Primeiro.-Engadir unha disposición transitoria novena (bis) ao IV convenio colectivo único para o persoal laboral da Xunta de Galicia, co seguinte contido:

«Primeiro.-O persoal que, con efectos anteriores ao 7-10-1996, tivese recoñecida a condición de indefinido na súa relación laboral por sentenza xudicial firme ou por resolución da Subsecretaría de Traballo e Asuntos Sociais do 24-7-1997 en virtude das previsións contidas no plan de emprego do INEM así como aquel que teña unha antigüidade con anterioridade ao 1-7-1998 na prestación de servizos para a Xunta de Galicia en virtude de sentenza xudicial que recoñeza a súa condición de persoal laboral indefinido, ou fose contratado directamente pola Xunta de Galicia baixo a modalidade de obra ou servizo determinado, para a realización de programas ou servizos de carácter estrutural, ou aqueloutro integrado por transferencia terá os mesmos dereitos que o persoal laboral fixo.

Segundo.-A Administración, no prazo de doce meses creará, de ser o caso, os ditos postos de traballo nas distintas RPT da Xunta de Galicia e posteriormente convocará un proceso selectivo mediante concurso ao cal terá a obriga de concorrer o persoal a que se fai referencia no punto anterior.

Terceiro.-O dito concurso respectará os principios de igualdade, mérito, capacidade e publicidade e nel valorarase preferentemente a antigüidade e os cursos de formación e perfeccionamento na categoría e procesos selectivos superados. Os que o superen adquirirán a condición de persoal laboral fixo da Xunta de Galicia.

Cuarto.-Para aqueloutro persoal que teña unha antigüidade posterior ao 30-6-1998 e anterior ao 1-1-2005 na prestación de servizos para a Xunta de Galicia en virtude de sentenza xudicial que recoñeza a súa condición de persoal laboral indefinido, ou fose contratado directamente pola Xunta de Galicia baixo a modalidade de obra ou servizo determinado, para a realización de programas ou servizos de carácter estrutural, ou aqueloutro integrado por transferencia será obxecto dun proceso de consolidación de emprego segundo o establecido na disposición transitoria cuarta da Lei 7/2007, do 12 de abril, do Estatuto básico do empregado público e a disposición adicional décimo sétima deste convenio».

Segundo.-Esta disposición transitoria entrará en vigor o mesmo día da súa publicación no Diario Oficial de Galicia.