Unha vez que a pandemia causada pola infección por VIH/SIDA se mostrou coma un dos máis importantes problemas de saúde con graves implicacións sociais, a Organización Mundial da Saúde (OMS) creou no ano 1987 o Programa especial sobre a SIDA recomendando que cada comunidade elaborase ao seu nivel o plan de actuación específico adaptado á súa realidade.
Seguindo esas directrices en Galicia creouse, por Orde do 10 de marzo de 1987, a Comisión de Seguimento e Control da SIDA.
A Orde do 4 de febreiro de 2004 (DOG nº 40, do 26 de febreiro) creou a Comisión Galega de Coordinación e Seguimento da Actividade fronte á Infección por VIH/SIDA, como órgano de apoio e colaboración coas entidades encargadas de executar as tarefas para a prevención da infección do VIH/SIDA, co obxectivo de facilitar e rendibilizar a realización das accións necesarias para diminuír a propagación desta infección, facer fronte ás súas consecuencias sobre as persoas e a sociedade, garantir a atención socio-sanitaria dos afectados e mellorar a súa calidade de vida nun contorno favorable.
A recente modificación dos organigramas nas consellarías, as súas estruturas e competencias, fan necesario adaptar esta comisión á situación actual.
En consecuencia, conforme as facultades que me confiren os artigos 34.6º e 38 da Lei 1/1983 do 22 de febreiro, de normas reguladoras da Xunta e da súa Presidencia, reformada pola Lei 11/1988, do 22 de outubro,
DISPOÑO:
Artigo único.-Modifícase o artigo 2º da Orde do 4 de febreiro de 2004, o cal, na súa totalidade, queda redactado nos seguintes termos:
«Artigo 2º .-Composición.
1. Integran a Comisión Galega de Coordinación e Seguimento da Actividade fronte á Infección por VIH/SIDA os seguintes membros:
a) Presidente/a: o/a titular da Consellería de Sanidade.
b) Vicepresidentes/as:
-O titular da Dirección Xeral de Saúde Pública.
-O titular da División de Asistencia Sanitaria.
-O titular da Dirección Xeral de Acción Social (Vicepresidencia da Igualdade e do Benestar).
-O titular da Dirección Xeral de Xuventude e Solidariedade (Vicepresidencia da Igualdade e do Benestar).
-O titular da Dirección Xeral de Ordenación e Innovación Educativa (Consellería de Educación e Ordenación Universitaria).
c) Secretario/a:
-O xefe/a do Servizo de Control das Enfermidades Transmisibles, designado/a polo secretario/a xeral da Consellería de Sanidade por proposta do/a titular da Dirección Xeral de Saúde Pública.
d) Vogais:
-O titular da Subdirección Xeral responsable do plan na Dirección Xeral de Saúde Pública.
-O Comisionado do Plan de Galicia sobre Drogas.
-Un representante da Subdirección Xeral de Ordenación Asistencial, designado/a polo/a titular da División de Asistencia Sanitaria.
-Un representante da Sociedade Galega Interdisciplinaria de SIDA (Sogaisida).
-Un representante do colectivo de ATS/DUE das unidades hospitalarias de atención sanitaria a esta problemática, designado/a polo/a titular da División de Asistencia Sanitaria.
-Un representante do Colexio Oficial de Psicólogos de Galicia.
-Un representante dos colexios oficiais de farmacéuticos de Galicia.
-Un representante dos colexios oficiais de médicos de Galicia, designado/a polo Consello Galego de Colexios de Médicos.
-Un representante do Colexio Oficial de Diplomados en Traballo Social e Asistentes Sociais de Galicia.
-Un representante dos comités Anti-SIDA con actividade en Galicia, designado/a de forma rotatoria.
-Un representante das outras organizacións non gobernamentais (ONG) con participación activa na loita contra esta infección en Galicia, designado/a de forma rotatoria polo/a titular da Dirección Xeral de Saúde Pública.
-Un/ha técnico/a da Dirección Xeral de Saúde Pública designado/a polo/a titular da Dirección Xeral de Saúde Pública.
2. Os membros da comisión serán nomeados/as por un período de dous anos, transcorrido o cal deberán proceder a confirmarse ou renovarse os ditos nomeamentos.
3. Nos casos de ausencia, enfermidade ou outra causa legal, o/a presidente/a será substituído/a polo/a titular da Dirección Xeral de Saúde Pública. Respecto do resto dos membros, estes serán substituídos polos seus suplentes».
Disposición derradeira
Esta disposición entrará en vigor o día seguinte ao da súa publicación no Diario Oficial de Galicia.
Santiago de Compostela, 18 de maio de 2007.
María José Rubio Vidal
Conselleira de Sanidade