Dentro do Plan de actividades da Escola Galega de Administración Pública para o 2007 e de acordo coas funcións atribuídas pola Lei 4/1987, do 27 de maio, de creación da escola, e pola Lei 10/1989, do 10 de xullo, de modificación da anterior, convócase en colaboración co Instituto Europeo de Administración Pública-Centro Europeo das Rexións de Barcelona, o seminario Acadando os obxectivos de Lisboa: as rexións e municipalidades como impulsoras do crecemento e do emprego, conforme as seguintes bases:

1. Obxectivos.

Na primavera de 2005, a Estratexia de Lisboa da UE para «converterse na economía baseada no coñecemento máis dinámico e competitivo do mundo» foi revisada en profundidade polos seus membros co fin de valorar e, se for o caso, axustar os obxectivos e os mecanismos chave para levala a cabo. Tan ambiciosa estratexia abrangue 24 directrices integradas que se clasifican nos seguintes ámbitos: macroeconómicas, microeconómicas e de emprego. Esta revisión a medio prazo, que se realizou nun momento crucial da historia europea (i.e. tras a adhesión dos outros dez estados membros), pretende reimpulsar este importante proceso que botou a andar en marzo de 2000 durante a presidencia portuguesa.

Actualmente, todas as novas iniciativas europeas son postas en marcha de acordo con estas 24 directrices integradas. Así pois, tanto as previsións económicas para o período 2005-2007, como o portal Web A túa Europa ou a iniciativa 2010, o novo Programa marco para a competitividade e a innovación (CIP), o Programa de acción comunitaria para combater a discriminación e fomentar a igualdade de oportunidades e tamén o Ano europeo da mobilidade dos traballadores, todos eles comparten xa un obxectivo común: impulsar o crecemento e o emprego.

Con todo, o aumento da «competitividade» e o traballo conxunto para o crecemento e o emprego, é unha responsabilidade común a todos os niveis de goberno, desde o nacional ata o local. De feito, os impactos tanto positivos como negativos sobre o crecemento das empresas e o emprego poden sentirse máis intensamente no nivel local e rexional. Como resultado, hai unha necesidade clara de aumentar as accións nestes niveis. Neste sentido, é moi importante debater o papel dos actores rexionais e locais no cumprimento da Estratexia de Lisboa.

A conexión entre a Estratexia de Lisboa e os entes rexionais e locais gaña aínda máis relevancia cando o Regulamento xeral (2007-2013) para os instrumentos europeos de cohesión dispón unha nova concentración do gasto de cohesión para cuestións comúns (tales como o aspecto da innovación e a investigación), gasto que representa o 60% para as rexións do obxectivo de converxencia, como é o caso de Galicia, e o 75% para as rexións do obxectivo de competitividade rexional e emprego.

Este seminario pretende, pois, ser un foro de debate sobre as políticas e as prácticas que os diversos actores rexionais e locais deben desenvolver para acadar os obxectivos da Estratexia de Lisboa, afondando nos retos e nas perspectivas desta estratexia para Galicia.

2. Contido.

Trataranse os seguintes temas:

* Establecemento das bases de Lisboa.

-O proceso de Lisboa ¿onde estamos?

-As rexionalidades e municipalidades como impulsoras do crecemento e do emprego: a boa gobernación como condición chave (presentación de resultados/recomendacións das presidencias finesa e alemá).

* As directrices integradas para o crecemento, o emprego e as rexións: unha revisión da realidade.

-Coñecemento e innovación para o crecemento. Políticas e prácticas innovadoras no primeiro piar.

-Un lugar máis atractivo para investir e traballar: factores de éxito fundamentais para unha rexión emprendedora. Políticas e prácticas innovadoras no segundo piar.

-Como crear mellores postos de traballo: a combinación da seguranza no mercado laboral coa dinámica nos negocios. Políticas e prácticas innovadoras no terceiro piar.

* Os obxectivos da Estratexia de Lisboa: retos e perspectivas para Galicia.

-As rexións e os instrumentos de cooperación territorial na política de cohesión europea: o espazo eurorrexional Galicia-Norte de Portugal.

-Os retos do sistema urbano na súa proxección transfronteiriza.

-Galicia ante a Estratexia de Lisboa: unha avaliación a medio camiño.

-Poderá Galicia superar con éxito os desafíos da Estratexia de Lisboa?

3. Destinatarios.

Este seminario está aberto a un amplo grupo de persoas, que inclúe os representantes e responsables políticos das institucións rexionais e locais de Galicia e os funcionarios de administracións públicas de Galicia que tratan coas políticas e instrumentos que promoven e apoian as empresas da súa comunidade autónoma. Ademais, están invitados a asistir expertos do mundo académico (universidades, think-tanks, etc.) e do sector privado (organizacións empresariais, cámaras de comercio, etc.), e interesados en xeral.

4. Desenvolvemento.

Lugar e data: o seminario convocado terá lugar no Centro Social e Financeiro Caixanova (avda. da Marina esquina rúa da Fama. A Coruña), os días 21 e 22 de xuño.

Horario:

-Xoves, 21 de xuño, das 9.30 ás 14.30 e das 16.30 ás 18.00 h.

-Venres, 22 de xuño, das 9.30 ás 14.30 h.

5. Inscrición.

-Prazo: finaliza o martes, día 19 de xuño de 2007.

-Tramitación de solicitudes: as solicitudes irán dirixidas ao director da Escola Galega de Administración Pública, polígono das Fontiñas, rúa Madrid, 2-4, 15707, Santiago de Compostela, segundo o modelo que figura como anexo a esta convocatoria, e presentaranse no rexistro xeral da EGAP ou por calquera das formas previstas no artigo 38.4º da Lei 30/1992, do 26 de novembro, de réxime xurídico das administracións públicas e do procedemento administrativo común. Admitiranse tamén inscricións por telefax 981 54 63 30 ou correo electrónico dirixido ao enderezo novas.egap@xunta.es.

-Número de prazas: limitado á capacidade do local.

-Inscrición fóra de prazo: só se admitirán, de quedar prazas libres, coa condición de que se cumpran os requisitos xerais antes indicados.

Os peticionarios poderán obter confirmación sobre a súa admisión, chamando por teléfono, o día 20 de xuño, das 8.30 ás 14.30 horas, aos seguintes números: 981 54 62 39/41.

6. Modificacións.

A EGAP reserva para si a facultade de interpretar e de resolver as incidencias que puidesen xurdir no desenvolvemento do seminario, así como a de cancelalo, se o escaso número de solicitudes non xustificase a súa realización.

7. Certificado de asistencia.

Entregaráselles, ao final do seminario, a aquelas persoas inscritas que asistan asiduamente a el, cando a súa asistencia sexa igual ou superior ao 85% das horas lectivas programadas, e expresarase neste documento a natureza da actividade e a data da súa realización.

Santiago de Compostela, 28 de maio de 2007.

Antonio Izquierdo Escribano

Director da Escola Galega de Administración Pública