Dentro das actividades programadas para o ano 2007, e conforme as funcións atribuídas pola Lei 1/2007, do 15 de xaneiro, de creación da Academia Galega de Seguridade Pública, anúnciase a celebración dun curso de especialización en protección de personalidades, que deberá desenvolverse conforme as seguintes bases:

Obxectivos.

-Dotar os membros dos corpos de seguranza con cometidos específicos en protección, dun nivel medio de coñecementos teóricos e operativos que lles permitan acadar mellor os seus obxectivos.

-Coñecer cales son as técnicas avanzadas na protección de persoas tanto no eido da condución de seguranza como da protección mesma, así como do manexo do armamento e tiro policial.

Destinatarios.

O curso vai dirixido aos membros da Unidade do CNP adscrita á Comunidade Autónoma de Galicia, que desempeñen labores de protección e que non teñan feito ningunha das edicións anteriores sobre este mesmo curso; no caso de quedaren prazas vacantes poderá optar a elas persoal dos corpos de seguranza con cometidos directos na protección de persoas.

Inscrición.

A inscrición dos participantes será totalmente gratuíta.

Prazas.

20 prazas.

Solicitudes.

1. O persoal que desexe participar neste curso deberá presentar, cuberta á máquina ou con letra moi clara, a instancia que figura no anexo.

2. O prazo para a presentación de instancias rematará o día 13 de xuño ás 14.00 horas.

3. As instancias deberán enviarse á Academia Galega de Seguridade Pública, sita na avenida da Cultura, s/n, 36680 A Estrada; ou ben poden entregarse en calquera dos lugares previstos no artigo 38.4º da Lei 30/1992, do 26 de novembro, de réxime xurídico das administracións públicas e do procedemento administrativo común.

Datas.

O curso realizarase en datas do 18 ao 22 de xuño.

O horario será de 9.30 a 13.30 e de 15.00 a 19.00 horas, cunha duración de 40 horas lectivas.

Contido.

I. Seguranza, protección e autoprotección.

II. Condución de seguranza en protección.

III. Técnicas de tiro policial en protección.

Relación de admitidos.

A relación de admitidos farase pública o día 14 de xuño a partir das 14.00 horas, no taboleiro de anuncios da Academia Galega de Seguridade Pública, ou ben poden coñecer e confirmar a súa asistencia chamando ao teléfono: 986 59 02 41 e na páxina web: http://agasp.xunta.es.

Lugar.

O curso desenvolverase na Academia Galega de Seguridade Pública, sita na avenida da Cultura, s/n, no concello da Estrada.

Certificado de aproveitamento.

Ao remate do curso entregaráselle un certificado de aproveitamento a aquelas persoas que acrediten a súa participación continuada a el, e superen as correspondentes probas de coñecementos.

Modificacións.

A Academia Galega de Seguridade Pública poderá modificar o desenvolvemento do curso para adaptalo ás necesidades da Administración e ás continxencias que poidan xurdir.

A Estrada, 29 de maio de 2007.

Carlos Suárez-Mira Rodríguez

Director xeral da Academia Galega

de Seguridade Pública