A Orde do 30 de xaneiro de 2007, publicada no Diario Oficial de Galicia nº 22, do 31, establece, entre outras cuestións, e en relación co Sistema de Información Xeográfica de Parcelas Agrícolas (Sixpac), o tipo, lugar e prazo para a presentación das alegacións e solicitudes de modificación de certa información contida no sistema. Así, os artigos 15 e 16 desta orde establecen a utilización, acceso e verificación do Sixpac, podendo presentar alegacións á información contida nel por erros existentes, ou ben solicitudes de modificación, por cambios posteriores. E no parágrafo segundo do artigo 17 sinálase que o prazo de presentación das anteditas alegacións ou solicitudes será ata o 31 de maio de 2007, para que as resolucións teñan efecto sobre as superficies validadas das solicitudes de axuda tramitadas en 2007.
Tendo en conta que o Sixpac é a base identificativa de parcelas obxecto de calquera tipo de axuda baseada na superficie e que o prazo de presentación da solicitude de pagamento único e doutros réximes de axuda directa á agricultura e gandaría para a campaña 2007/2008 se prorrogou pola orde da Consellería do Medio Rural do 9 de marzo de 2007, considérase necesario prorrogar tamén o prazo para a presentación de alegacións e solicitudes de modificación ao dito sistema de identificación, facultando todos os interesados para unha mellor depuración do Sixpac.
En consecuencia, de acordo co disposto no artigo 30.I.3 do EAG e no uso das facultades que me confire a Lei 1/1983, do 22 de febreiro, reguladora da Xunta e do seu presidente, e no Decreto 562/2005, do 1 de decembro.
DISPOÑO:
Artigo único.-O prazo previsto no artigo 17, parágrafo segundo, da Orde do 30 de xaneiro de 2007 (DOG nº 22, do 31 de xaneiro) pola que se regula a aplicación do réxime do pagamento único e doutros réximes de axuda directa á agricultura e gandaría, así como a indemnización compensatoria, no ano 2007, referido á presentación de alegacións e solicitudes de modificación do Sixpac, prorrógase ata o 30 de xuño de 2007, incluído.
Disposición derradeira
A presente orde entrará en vigor o mesmo día da súa publicación no Diario Oficial de Galicia.
Santiago de Compostela, 24 de maio de 2007.
Alfredo Suárez Canal
Conselleiro do Medio Rural