Dentro das actividades programadas para o ano 2007, e conforme as funcións atribuídas pola Lei 1/2007, do 15 de xaneiro, de creación da Academia Galega de Seguridade Pública, anúnciase a realización dun curso de actualización sobre delitos contra a seguridade do tráfico, que deberá desenvolverse conforme as seguintes bases:
Obxectivos.
-Coñecer a normativa que afecta os delitos relacionados coa seguridade do tráfico.
-Saber como solucionar policialmente a casuística que se poida presentar na actuación das policías locais e dos corpos de seguridade.
-Dominar o trámite procedemental das actuacións, de xeito que os atestados se configuren adecuadamente.
Destinatarios.
O curso vai dirixido aos membros das forzas e corpos de seguridade.
Inscrición.
A inscrición dos participantes será totalmente gratuíta.
Prazas.
80 prazas.
Solicitudes.
1. O persoal que desexe participar neste curso deberá presentar, cuberta á máquina ou con letra moi clara, a instancia que figura no anexo.
2. O prazo para a presentación de instancias rematará o día 5 de xuño de 2007, ás 14.00 horas.
3. As instancias deberán enviarse á Academia Galega de Seguridade Pública, sita na avenida da Cultura, s/n, 36680 A Estrada (fax: 986 59 00 28); ou ben poden entregarse en calquera dos lugares previstos no artigo 38.4º da Lei 30/1992, do 26 de novembro, de réxime xurídico das administracións públicas e do procedemento administrativo común.
Datas.
O curso realizarase durante os días 12, 13 e 14 de xuño.
O horario será das 9.30 ás 14.00 e das 15.30 ás 19.30 horas, cunha duración de 25 horas lectivas.
Contido.
I. Delitos contra a seguridade do tráfico: perspectiva penal e procesual.
II. Actuación dos corpos de seguridade diante deste tipo de delitos: dilixencias que hai que efectuar e procedemento que hai que seguir.
III. Estudo e análise de casos.
Relación de admitidos.
A relación de admitidos farase publica o día 8 de xuño a partir das 14.00 horas, no taboleiro de anuncios do Academia Galega de Seguridade Pública, ou ben poden coñecer e confirmar a súa asistencia chamando ao teléfono 986 59 02 41 e na páxina web: http://agasp.xunta.es.
Lugar.
O curso desenvolverase na Academia Galega de Seguridade Pública, sito na avenida da Cultura, s/n, no concello da Estrada.
Certificado de asistencia e crédito de libre configuración.
Ao remate do curso entregaráselles un certificado de asistencia a aquelas persoas que acrediten a súa participación continuada nel. Por outra banda, a Universidade de Santiago de Compostela outorga un crédito de libre configuración a todas aquelas persoas que superen este curso.
Modificacións.
A Academia Galega de Seguridade Pública poderá modificar o desenvolvemento do curso para adaptalo ás necesidades da Administración e ás continxencias que poidan xurdir.
A Estrada, 14 de maio de 2007.
Carlos Suárez-Mira Rodríguez
Director xeral da Academia Galega de Seguridade
Pública
