A prestación de servizos de transporte en automóbiles turismo, esencialmente mediante taxis, constitúe unha parte esencial do sistema galego de transporte, constituíndo en casos incluso o medio máis válido para a garantía do dereito á mobilidade do conxunto da cidadanía. Paralelamente, a concorrencia deste dereito require duns compromisos ou obrigas de servizo público, como o acceso universal ou a cobertura de diferentes franxas horarias, que potencialmente sitúan estes servizos de transporte en situacións conflitivas.

Estas obrigas veñen provocando dificultades tanto económicas, derivadas da necesaria fixación dunha política tarifaría, como profesionais, sobre todo ligadas á perigosidade derivada da actividade, tanto por supostos de sinistrabilidade como pola concorrencia de accións delitivas, accións estas que se veñen producindo dun xeito illado e descontinuo pero reiterado, afectando incluso á vida e integridade dos propios profesionais.

Desde a Administración pública galega preténdese atallar os problemas derivados da seguridade dos profesionais deste sector, coadxuvando a unha preocupación constante da sociedade que debe ser especialmente considerada.

Para tal fin, as últimas tecnoloxías achegan un elemento imprescindible para contribuír a garantir a seguridade dos taxis, e entre estes medios, estímase como o máis efectivo a implantación dun sistema de seguimento dos vehículos e de alerta ante situacións de perigo. Este sistema, implantado mediante un programa específico da Consellería de Presidencia, Administracións Públicas e Xustiza, permite a alerta instantánea ás Forzas e Corpos de Seguridade e a localización precisa do vehículo en situación de perigo, constituíndo así un elemento esencial para a operatividade policial, ao tempo que disuasorio destas accións.

Por tanto, estímase procedente o mantemento nesta anualidade dunha convocatoria de axudas, na cal se pretende simplificar no posible as actuacións dos interesados.

DISPOÑO:

Artigo 1º.-Finalidade e obxecto.

1. Por esta orde establécense as bases reguladoras e convócanse, para o ano 2007, as axudas para a dotación de equipamentos de seguimento para vehículos de transporte que dispoñan de autorización administrativa vixente documentada en tarxeta de transportes da serie VT-N expedida pola Dirección Xeral de Transportes.

2. Os equipamentos obxecto da axuda consistirán nun Sistema GPS, instalado nos taxis, mediante o que nunha situación de emerxencia de inseguridade física do taxista se activa un sinal que se recibe no Centro de Atención de Emerxencias 112 Galicia.

Artigo 2º.-Beneficiarios.

Poderán acceder a esta liña de axudas os titulares de autorizacións administrativas de transporte vixentes, documentadas en tarxetas da serie VT-N, expedidas pola Dirección Xeral de Transportes ou órganos periféricos desta consellería competentes para o efecto, e domiciliadas en Galicia. Para tal fin, xerará dereito á axuda cada unha das autorizacións das que sexa titular o solicitante.

Estas autorizacións deberán estar vixentes no momento da presentación da solicitude.

Non poderán ser beneficiarios desta convocatoria de axudas aqueles que o foran, respecto da mesma autorización de transportes e para o mesmo fin, con base nas ordes desta consellería do 8 de setembro do 2003, do 23 de febreiro e do 8 de setembro do 2004, do 27 de maio de 2005 ou do 5 de abril de 2006.

Artigo 3º.-Imputación orzamentaria e contía.

Esta convocatoria realízase con cargo á aplicación orzamentaria 2007.08.04.512A.770.0 dos orzamentos xerais da comunidade autónoma para o 2007, na cal existe un crédito para este efecto de 120.000 euros, e limitarase ás dispoñibilidades orzamentarias. Todo isto sen prexuízo de ulteriores variacións producidas como consecuencia da existencia dunha maior dispoñibilidade orzamentaria.

Os equipamentos que se prevén nesta orde como obxecto da subvención poderán acadar unha axuda económica do 50% do seu prezo (sen IVE), incluíndo neste tanto o do propio equipamento como os correspondentes aos gastos de colocación, man de obra, equipamento adicional necesario e verificación do seu funcionamento; en todo caso, e para os efectos do previsto neste artigo, considerarase como importe máximo da subvención, por equipamento e tarxeta, o de cincocentos euros (500 €).

Artigo 4º.-Solicitudes.

1. As solicitudes de subvención serán formuladas polo titular da autorización administrativa de transportes VT-N, segundo o modelo normalizado que se xunta como anexo I a esta orde, e dirixiranse á directora xeral de Transportes; fíxase como prazo límite para a súa presentación un mes contado a partir do día seguinte ao da publicación desta orde.

Así mesmo, os modelos de solicitude, independentemente da súa publicación como anexos a esta orde, poden atoparse na páxina web institucional da Dirección Xeral de Transportes: http://www.cptopt.xunta.es/portal/cidadan/pid/667.

A presentación da solicitude, segundo o referido modelo, determinará a autorización expresa á Dirección Xeral de Transportes, para solicitar de calquera organismo público cantos documentos sexan precisos para a verificación dos datos indicados polo solicitante, así como para a tramitación informatizada dos seus datos de carácter persoal que fosen precisos para os fins desta orde de axudas.

Para os efectos do disposto na disposición adicional do Decreto 132/2006, do 27 de xullo, polo que se regulan os rexistros públicos creados nos artigos 44 e 45 da Lei 7/2005, do 29 de decembro, de orzamentos xerais da Comunidade Autónoma de Galicia para o ano 2006 e no artigo 13 da Lei 4/2006, do 30 de xuño, de transparencia e de boas prácticas na Administración pública galega, mediante a presentación da solicitude de subvención e a sinatura do anexo I, o solicitante presta expresamente o seu consentimento á Consellería de Política Territorial, Obras Públicas e Transportes para incluír e facer públicos nos referidos rexistros e páxina web os datos relevantes referidos ás axudas e subvencións recibidas, así como as sancións impostas. De conformidade coa Lei orgánica 15/1999, do 13 de decembro, de protección de datos de carácter persoal, poderán exercerse os dereitos de acceso, rectificación, consulta, cancelación e oposición, mediante un escrito dirixido á Consellería de Economía e

Facenda.

Igualmente, na propia solicitude, incorpórase a declaración responsable referente aos aspectos seguintes:

a) Ser titular da autorización do servizo de transporte público da serie VT-N, co número correspondente.

b) Cumprimento dos requisitos necesarios para acollerse a esta orde de axudas, así como das obrigas e compromisos que nela se establecen.

c) Autenticidade dos datos facilitados e da documentación presentada.

d) Non ter sido beneficiario das axudas convocadas con base nas ordes desta consellería do 8 de setembro de 2003, do 23 de febreiro e do 8 de setembro de 2004, do 27 de maio de 2005 ou do 5 de abril de 2006, respecto da mesma autorización de transportes e para o mesmo fin. .

e) Compromiso de facilitar a documentación complementaria que se poida requirir, así como de permitir as comprobacións e inspeccións que para o efecto esta Administración considere oportunas, ou previstas nesta orde.

f) Compromiso de non beneficiarse nin se ter beneficiado de máis subvencións ou axudas doutras administracións públicas ou doutros entes públicos ou privados, nacionais ou internacionais, que illada ou conxuntamente coa outorgada por esta Administración superen o custo da actividade obxecto desta orde.

2. A presentación das solicitudes efectuarase no rexistro auxiliar desta Dirección Xeral de Transportes da Consellería de Política Territorial, Obras Públicas e Transportes, sito en Santiago de Compostela, na Praza Europa, 5-2º andar, Área Central-Fontiñas, ou por calquera das formas previstas no artigo 38.4º da Lei 30/1992, do 26 de novembro, de réxime xurídico das administracións públicas e do procedemento administrativo común.

3. Xunto coa solicitude unirase a seguinte documentación (orixinal ou copia compulsada por órgano oficial competente):

-Fotocopia compulsada do DNI e do NIF ou CIF, cando corresponda, do solicitante.

-Copia da tarxeta de transportes a nome do solicitante, para a que se solicite a axuda.

-Certificación bancaria do número de conta.

-Marca e modelo do sistema de seguridade elixido polo interesado con factura pro forma do provedor.

-Certificado de homologación do sistema de seguridade.

-Informe de validación do sistema GPS expedido polo Centro de Atención de Emerxencias 112 Galicia; en caso de non dispor del en tal momento, deberá achegarse a certificación de telo solicitado e que estea pendente de realización das oportunas probas previstas na disposición adicional desta orde.

Artigo 5º.-Resolución e procedemento.

1. Delégase na directora xeral de Transportes o exercicio das competencias para resolver os procedementos de concesión, aprobación do gasto e demais actuacións para o desenvolvemento das axudas obxecto desta orde.

2. Para tal efecto a Subdirección Xeral de Ordenación do Transporte exercerá as funcións de instrución do procedemento previstas polo artigo 9 do Decreto 287/2000, do 21 de novembro, polo que se desenvolve o réxime de axudas e subvencións públicas da Comunidade Autónoma de Galicia.

Examinadas as solicitudes, instarase do solicitante a emenda ou complemento destas nos termos da Lei 30/1992, do 26 de novembro, de réxime xurídico das administracións públicas e do procedemento administrativo común, elevando proposta de consideralo desistido no caso de non se ter emendado ou achegado o solicitado.

O indicado órgano instrutor poderá solicitar cantos informes técnicos considere convenientes para os seus fins.

Revisados os expedientes e completados, se é o caso, o órgano instrutor emitirá, con carácter previo á súa avaliación, un informe relativo ao cumprimento dos requisitos que para os solicitantes se establecen no artigo anterior.

3. Unha vez informadas as solicitudes polo órgano instrutor, procederase á súa avaliación, con base nos criterios establecidos nesta orde, por unha comisión de valoración, que funcionará como órgano colexiado segundo se establece no artigo 78.8º do Decreto lexislativo 1/1999, do 7 de outubro, polo que se aproba o texto refundido da Lei de réxime financeiro e orzamentario de Galicia.

A comisión de valoración prevista nesta orde estará composta polos xefes de Servizo de Informes, Autorizacións e Xunta Arbitral, de Estudos e Apoio Xurídico e de Concesións, da Dirección Xeral de Transportes; en caso de ausencia, vacante ou enfermidade dos anteriores, a directora xeral de Transportes poderá nomear substitutos de entre funcionarios dos grupos A ou B da referida dirección.

4. Publicarase a relación provisional das valoracións na páxina web da Consellería de Política Territorial, Obras Públicas e Transportes (http://www.cptopt.xunta.es/portal/cidadan/pid/667), podendo os interesados formular cantas observacións estimen oportunas nos termos previstos na lexislación xeral pertinente.

Examinadas as alegacións, de ser o caso, a comisión de valoración elevará a proposta de resolución ao órgano competente, que ditará resolución definitiva.

5. O prazo para resolver as solicitudes e notificar esta resolución ao abeiro desta orde será de seis meses, que se computarán a partir do seguinte ao de publicación desta orde no Diario Oficial de Galicia. Transcorrido este prazo sen que se dite e notifique resolución expresa, os interesados poderán entender desestimadas as súas pretensións por silencio administrativo, consonte co previsto polo artigo 44.1º da Lei 30/1992, do 26 de novembro, de réxime xurídico das administracións públicas e do procedemento administrativo común.

6. Fíxanse os seguintes criterios de selección para o outorgamento da subvención respecto das solicitudes formuladas, por orde de preferencia:

1º A menor antigüidade do vehículo en que se vaia instalar o sistema de seguridade; para tal fin tomarase en consideración o vehículo que estea efectivamente adscrito á autorización de transportes da serie VT-N no momento de conclusión do prazo de presentación das solicitudes.

2º En caso de igual antigüidade do vehículo, a maior antigüidade do solicitante na titularidade da autorización de transporte da serie VT-N.

3º A prioridade temporal na presentación da solicitude; para este fin, considerarase como elemento temporal para considerar o do día da súa presentación.

7. Considerando o importe máximo obxecto das subvencións, a Dirección Xeral de Transportes publicará no seu taboleiro de anuncios, durante 10 días, a relación definitiva de beneficiarios, con expresión da convocatoria, do programa e o crédito orzamentario a que se imputen, da cantidade concedida a cada beneficiario e da finalidade da subvención..

Artigo 6º.-Compatibilidades.

Esta subvención será compatible coas que poida conceder calquera outra Administración pública ou organismo público ou privado, nacional ou internacional, sempre e cando, e en ningún caso, o importe das subvencións ou axudas concedidas, illada ou conxuntamente, poida ser tal que supere o custo da actividade subvencionada que debe desenvolver o beneficiario, segundo o disposto no artigo 78.9º do Decreto lexislativo 1/1999, do 7 de outubro, polo que se aproba o texto refundido da Lei de réxime financeiro e orzamentario de Galicia.

Artigo 7º.-Xustificación e pagamento.

Unha vez notificada a resolución a que se refire o artigo 5º desta orde, os interesados que resulten beneficiarios das subvencións concedidas disporán dun prazo de dous meses para proceder á instalación do equipamento e presentar perante a Administración o correspondente certificado da empresa instaladora, documentos xustificativos de pagamento, e certificado expedido polo organismo responsable do Centro de Atención de Emerxencias 112 Galicia xustificativa da alta do sistema GPS; esta documentación deberá ser achegada no referido prazo ante a Subdirección Xeral de Ordenación do Transporte, presentándoa no rexistro auxiliar da Dirección Xeral de Transportes sito en Santiago de Compostela, na Praza Europa, 5-2º andar Área Central-Fontiñas ou por calquera das formas previstas no artigo 38.4º da Lei 30/1992, do 26 de novembro, de réxime xurídico das administracións públicas e do procedemento administrativo común.

No caso de omisión da antedita xustificación no prazo sinalado na alínea anterior, ou de demora na materialización da alta no Centro de Atención de Emerxencias 112 Galicia por causa que non sexa imputable á Administración, entenderase que o beneficiario renuncia á axuda concedida, e procederase de conformidade co establecido no artigo 42.1º da Lei 30/1992, do 26 de novembro, de réxime xurídico das administracións públicas e do procedemento administrativo común.

Procederase ao pagamento das subvencións, tras a comprobación de que a documentación antedita se axusta ao contido desta orde, mediante transferencia bancaria ao número de conta expresado na certificación bancaria que se xunte, segundo o artigo 4º desta orde.

De existir substitución de vehículo durante este proceso de concesión de subvencións, deberá achegar xustificante do inicio do procedemento de autorización da substitución do anterior vehículo, adscrito á tarxeta de transporte, polo novo en que se instalará o sistema de seguridade; debendo achegar o certificado e demais documentación, especificada no parágrafo primeiro deste artigo, no mesmo prazo de dous meses.

Artigo 8º.-Condicionantes.

1. Toda alteración das condicións tidas en conta para a concesión da subvención, e en todo caso, a obtención concorrente de subvencións ou axudas outorgadas por outras administracións ou entes públicos ou privados, nacionais ou internacionais, poderá dar lugar á modificación da resolución de concesión. As persoas ou entidades beneficiarias están obrigadas a comunicarlle á Dirección Xeral de Transportes calquera circunstancia ou eventualidade que poida afectar substancialmente o destino ou correcta aplicación da axuda concedida.

2. Os beneficiarios das subvencións non poderán alterar de ningún xeito a finalidade delas, para o cal a Consellería de Política Territorial, Obras Públicas e Transportes poderá realizar as inspeccións e comprobacións que considere necesarias co fin de asegurar o cumprimento das normas e requisitos fundamento da concesión. Por tanto, os equipamentos obxecto desta liña de subvención deberán estar instalados e operativos, durante toda a súa vida útil, en todo momento e, en todo caso, durante un prazo mínimo de dous anos, no vehículo adscrito á autorización administrativa de transporte VT-N, mesmo no suposto de substitución ulterior do material móbil en que inicialmente se instalasen.

3. Os solicitantes e beneficiarios das subvencións deberán permitir que a devandita dirección xeral realice as comprobacións e inspeccións que considere oportunas co fin de comprobar a veracidade dos datos e da documentación presentada, así cómo o lóxico seguimento e control das axudas concedidas; tamén facilitarán toda a información que lles sexa requirida pola Intervención Xeral da Comunidade Autónoma, o Tribunal de Contas e o Consello de Contas, no exercicio das súas funcións de fiscalización e control das axudas.

4. Os beneficiarios das subvencións deberán facer constar en todo tipo de publicidade e información ao respecto, a condición de subvencionada pola Dirección Xeral de Transportes da Consellería de Política Territorial, Obras Públicas e Transportes, empregando para isto a normativa da imaxe corporativa da Xunta de Galicia.

Para tal fin, e concretamente, establécese a obriga dos beneficiarios de inserir e manter permanentemente, en lugar visible para o usuario, na totalidade dos vehículos dotados con estes equipamentos, información da súa dotación do referido sistema de seguridade e a colaboración para o efecto das consellerías de Política Territorial, Obras Públicas e Transportes e de Presidencia, Administracións Públicas e Xustiza.

5. O incumprimento de calquera obriga mencionada nesta orde poderá ser causa determinante da revogación da subvención, así como do reintegro, se é o caso, das subvencións percibidas e dos xuros de mora correspondentes, todo isto de acordo e nos termos previstos polo artigo 78 do Decreto lexislativo 1/1999, do 7 de outubro, polo que se aproba o texto refundido da Lei de réxime financeiro e orzamentario de Galicia; de xeito concreto, terase en consideración o previsto no punto 9 do referido artigo.

Artigo 9º.-Réxime xurídico e de recursos.

1. A convocatoria desta axuda, as súas bases e todos cantos actos administrativos deriven dela poderán ser impugnados polos interesados nos casos e na forma establecidos na Lei 30/1992, do 26 de novembro, de réxime xurídico das administracións públicas e do procedemento administrativo común.

2. As resolucións expresas ou desestimacións presuntas recaídas en aplicación desta orde esgotan a vía administrativa e contra elas poderá interporse potestativamente recurso de reposición perante o órgano que as ditou, no prazo dun mes contado a partir do día seguinte ao da súa notificación se é expresa, ou de tres meses contados a partir do día seguinte a aquel en que se produza o acto presunto, segundo os casos, consonte o disposto polo artigo 117 da Lei 30/1992, do 26 de novembro, de réxime xurídico das administracións públicas e do procedemento administrativo común; ou ben poderá ser impugnada directamente perante a orde xurisdicional contencioso-administrativa, perante a Sala do Contencioso-Administrativo do Tribunal Superior de Xustiza de Galicia, no prazo de dous meses de ser resolución expresa ou no de seis contados a partir do día seguinte a aquel en que se produza o acto presunto, de acordo co previsto polos artigos 10, 14 e 46 da Lei 29/1998, do 13 de xullo, reguladora da

xurisdición contencioso-administrativa.

3. Igualmente, os beneficiarios das subvencións reguladas por esta orde quedan suxeitos ao réxime de infraccións e sancións previsto no artigo 79 do Decreto lexislativo 1/1999, do 7 de outubro, polo que se aproba o texto refundido da Lei de réxime financeiro e orzamentario de Galicia e ao previsto polo Decreto 287/2000, do 21 de novembro, polo que se desenvolve o réxime de axudas e subvencións públicas da Comunidade Autónoma de Galicia.

Disposición adicional

Cando o titular da autorización solicitante da subvención opte pola instalación dun sistema GPS que non estea validado e operativo polo Centro de Atención de Emerxencias 112 Galicia, a empresa instaladora del deberá presentar previamente para a súa validación un equipamento no Centro de Atención de Emerxencias 112 Galicia.

Os equipamentos deben estar preparados para a súa integración dentro do sistema TAXGAL (Sistema de Emerxencias de Taxis de Galicia, que consta dun número elevado de elementos: sistemas embarcados nos taxis, operador de telefonía, equipos receptores de alarmas, equipo integrador de alarmas e postos de atención e seguimento) no contorno da plataforma de operacións Séneca-Galicia do Centro de Atención de Emergencias 112 Galicia, sendo imprescindible para esta validación a realización dunha batería de probas desde o Centro de Atención de Emerxencias con presenza in situ do persoal da empresa instaladora e do persoal técnico do Centro de Atención de Emerxencias 112 Galicia.

Todos os custos que deriven desta integración e das probas necesarias serán por conta da empresa instaladora, sendo responsable o Centro de Atención de Emerxencias 112 Galicia unicamente da atención das alarmas que entren directamente nel, e o correcto tratamento destas.

De non se ter obtido e acreditado perante a Dirección Xeral de Transportes, a validación e integración do equipo proposto no sistema do Centro de Atención de Emerxencias 112 Galicia no prazo máximo dun mes contado dende o vencemento do prazo de presentación de solicitudes, a Administración non admitirá a solicitude formulada.

Disposicións derradeiras

Primeira.-Facúltase a directora xeral de Transportes da Consellería de Política Territorial, Obras Públicas e Transportes para que, no ámbito das súas competencias, dite os actos necesarios para a correcta aplicación e cumprimento desta orde.

Segunda.-Esta orde entrará en vigor o día seguinte ao da súa publicación no Diario Oficial de Galicia.

Santiago de Compostela, 19 de abril de 2007.

María José Caride Estévez

Conselleira de Política Territorial, Obras Públicas

e Transportes